JEREMIAH 13 - Zotung Bible 2016

Cce kya Voikupaw Boeining

¹ Bawipaw nynh kae kha, “La cceih lah, tae kya voikupaw boei kha la rekuh lah, na tae kya voikuh, thuasalama tui kya na dung lan khyh,” yn cipya.

² Tukeiccuze Bawipaw bya thyhte cce kya voikupaw boei kha ka rekuh zah ka tae kya ka voiku.

³ Te Bawipaw bya tuh vae ningnaw ka kya yn thua zah,

⁴ “Na rekuh zah na voikupaw ccevoiboei kha lawkuh lah, atu Zufrates vaw lang la cciatua, te tuh-e tuh lungpi karung kyakhe la thuruhtua,” yn cipya.

⁵ Tukeiccuze Bawipaw nynh kaw yn pya thyhte ka cceih zah tuh-e tuh Zufrates vaw kin khe ka thuruh.

⁶ Ccyh hynhsepi aro te Bawipaw nynh kae kha, “Atu Zufrates lang la cceih lah, tuin kya thuruh lan kaw kae pyapaw ccevoiboei kha la lah,” yn cipya.

⁷ Tetuh Zufrates vaw lang ka cceih zah, ka thuruhnaw hmin kya-e ccevoiboei kha ka thaebia zah ka law. Thuasalama ccevoiboei tuh baluh mawe vae zah, pawpaw lang mah hoy vae khyh.

⁸ Te Bawipaw bya tuh ka kya yn thua zah:

⁹ Bawipaw nynh hynhte a ho: E hawte Judah nynh a lysakunaw te Jerusalem nynh myarya a lysakunaw kha ka roh cih.

¹⁰ Ka bya a thae ry lei hae paw, mimaw rynaw kha lungkhungte a zui hae paw, te ccangpaw pachia hae kha ryalawpya khylan te beik khylan tuh-e pachia hae nulang a zuikuh hae paw, e ccungccaw hoylei hae paw hynh pawpaw lang mah ahoy lei vae paw, e ccevoiboei hawte athua cih hae.

¹¹ Ccevoiboei tuh ccungccaw tae kya a beku hawte, Israel hae balyn te Judah hae balyn tuh kamaw hanlan minphuin phuin kheit, min minkheit, thehoynaw ccangkheit te phu-enaw ccangkheit athua ccaw hae cite kamaw kya a bekuh lante ka rae hae. Thuasalama ka bya ngae khyh hae, cite Bawipaw nynh a ci.

Misu Tui-ung Syntawnaw

¹² E bya hynh minmin kalan na hopah cih hae: Bawipaw , Israel Pachia nynh hynhte a ho: Misu tui-ung miakaw kya misutui phe abeih cih. Te minmin nynh nang kha, “Misu tui-ung miakaw kya misutui bia lanpaw tuh nyh lan khyh hae cite tou nae tua?” ae cipah cih hae.

¹³ Tetuh nang nynh minmin kyakhe, Bawipaw nynh hynhte a ho: E ram kya a um hae paw balyn, David kya-e bawitungkhung vawlan a haungpaw siapharan hae, ranpibawi hae, profeh hae te Jerusalem kya a um hae paw kha marya ka ruisah cih hae.

¹⁴ Te lu kheit te lu kheit, nungpaaw hae te ccaaw hae kha rawsekute ka ziasakuh cih hae; minmin kha he ka roh hae te, ngaethyaumsahnaw, synkunaw te thawccinaw ka hoi lan khyh, cite Bawipaw nynh a ci.

Ramccang lang Kyngkunaw

¹⁵ Ngae oh lah, nae nakaring kha tuaku tua oh; lysakuh nan oh, pawccecize Bawipaw nynh a ho vae.

¹⁶ Zetepakaw amohdyn, nae ccu tuh mua vawlan a thyku mawkhe thuasah, aning nynh mohnaw a thuakhae mawkhe thuasah, te awnaw kha na ngaehoi zah, tuh-e awnaw tuh ngaethyanaw te marae zipingkuhpaw mohnaw lang a rae mawkhe thuasah Bawipaw nae Pachia kha phu-esah oh.

¹⁷ Nanning nynh na ngae khyh oh zetuh, nanning na lysahkunaw oh keiccuze ka thinlung tuh aruh lante a rah a khui cih; Bawipaw tuuphu hae kha kyng hae zah a cciakhae vae hae keiccuze thawte ka rah cih zah ka mitphi alua cih.

¹⁸ Siapharan te siapharan nung kyakhe, “Haungnaw anenaw kya haung oh, pawccecize apuithyapaw nae bawilukhung tuh nae lu kyate accah vae,” cite hopah hae.

¹⁹ Alia lang e khua hae tuh lu kheit nynh sanmah hung lei lante khaw athua vae hae; Judah hae balyn kha see lang cciakhae athua hae, mih balyn mawte see lang cciakhae athua hae.

²⁰ Ngawran do oh lah, thahlang te oun thua hae paw khuh dotua oh. Nang kae pyapaw tuuphu, apuithyapaw na tuuphu kha teimou a um?

²¹ Na ruiban lang tang khylan na ccangpya hae paw kha na tungvaw uktu lang nung he athua hae te pawtemou na ho cih? Neitangia accihpaw nopi hawte ccinaw na teing lan khyh tou?

²² Na thinlung kyakhe, “Pawccemou e uccaw hae hynh ka tungvaw yn thua?” cite na ciku lanze, na seinaw myarya ale keiccuze na boeipae kha kalyng na thua zah, seikhae na thua.

²³ Ethiopia ccungccaw hae nynh mih ving kha a rulaekuh kho hae tou? Kaesing nynh a pyaa kha a rulaekuh kho tou? A la rulaekuh kho lanze, hoyleinaw palei na rae oh paw nanning nynh mah hoynaw kha na rae kho cih oh.

²⁴ Laesia ram e khisan nynh a mungpaw vaekang hawte, nanning kha phiariphiarae kae nung cih oh.

²⁵ Nanning nynh kae kha nae ning oh zah hynbya kha na doliaku oh keiccuze nanning elang kae toupya oh paw nae hanpaw tuh e hynh nynh thua.

²⁶ Kamaw ccaccei nynh nae boeipae kha nae mae kyacia kae kalyngpah cih oh zah, nae maethyanaw kha ka langsah cih.

²⁷ Na nungsikunaw oh, na ohhuakunaw oh, rangtepaw siate na sianaw oh ramkaw e mua vawlan khe maethya ny leite na ohhuakunaw oh kha ka muih vae. Pou Jerusalem, na hanlan ngaethya lan kou um! Nang kha thyaasah na thua maw hohseciamou hynhte na um ung cih?