JEREMIAH 12 - Zotung Bible 2016

Pachia kya Jeremiah Lungccing leinaw

¹ Pou Bawipaw , nang kha rawsete bya he ka hotua tuh, nang tuh a dingpaw nynh na thua; thuasalama ka byathan hynh na kalan beih kae thuakhae sah. Pawccemou ccungccaw hoylei hae paw tuh mih laan mih sui a ua? Pawccemou mihyn hae balyn tuh a hoirum hae?

² Nang nynh minmin kha na lin hae zah, mih tharui asaw; lethung hae zah athae a thae hae; nang tuh mih munglae te na naekuh, tuhzemah mih thinlung te tuh na sawkuh.

³ Thuasalama, pou Bawipaw , kae tuh phe nae ny; ka thinlung tuh na kya a umpaw kha na muih zah nae syntawtua. Chia lanpaw tuu hae hawte minmin kha ccaring sue hae lah, chia nin hanlan taetynte nung hae.

⁴ Kae ram hynh hohseciamou rawkhuite a um cih zah, ram pynpi e lonua hae tuh hohseciamou arou cih? Ram lungkhu e ccungccaw hae hoyleinaw keiccu thuasah, ccungccaw hae nynh “Ah cyi oh paw hynh Pachia nynh muih lan khyh,” cite a ho hae keiccu thuasah sarangpaw hae te pavaw hae tuh phe mih hae.

Pachia nynh Jeremiah kha Bya A Leih

⁵ Nang tuh ccungccaw te na ccuesuekuh oh zah na bang lanze, pawtemou marang hae ryte na taekuh kho cih? Akhynnaw ram kya na khuliaku lanze, thabu alungnaw Jordan vaw kin kya pawmou na cyih kho cih?

⁶ Na uno te na innbyn hae nynh heize, na tungvaw mih lungzi vae khyh; na nulang te thawte ae sianua vae hae; minmin nynh nawnekute bya ae hopya hae zemah zyn nan hae.

⁷ Ka inn kha ka vua vae, ka rho kha ka cciataw vae. Ka thinlung te myarya ka sungsahpaw kha a rhaw hae kuih kalan ka pya vae.

⁸ Ka rho tuh ka hanlan ramkaw e chindeih hawte nynh athua vae; kae kha thawte yn sianua keiccuze aning kha ka hua.

⁹ Ka rho hynh kae ka hanlan tuh sawhepaw a aepaw pavaw apyaapaw te nynh aloku. Sawhepaw a aepaw pavaw hae nynh aning kha phang a koihlu hae. Rang oh, loramsaw balyn, nae balynte sueluakuh oh; aning kha tei khylan loramsaw hae kha oun ko oh.

¹⁰ Tuurin hae patae nynh ka misu khokhu kha a ro vae hae, minmin nynh ka hanpaw kha a syde vae hae, ka lungrythuakhaekuhpaw ka hanpaw kha ccungccaw a um leinaw ramkaw lang a rae vae hae.

¹¹ Minmin nynh ram rohpaw lang a rae hae; ram tuh aro keiccuze ka kalan yn rawnua. Ram pynpi mawte phe roh vae, thuasalama humhung nynh mah pawlangria khyh.

¹² Ramkaw ahangnaw hmin balyn kyakhe luadetu hae a thua vae hae; Bawipaw thaloi nynh ram voikheit langte voikheit lang cia a ro vae hae; lu kheit sanmah khyn lan khyh hae.

¹³ Minmin nynh chanvuih kha ccou hae zah, hinpaw kha a rue hae, mimaw toulou kha myarya a bangsakuh hae zemah athanenaw um khyh. Bawipaw tuh myaryamaw a thinria keiccuze minmin nynh a mue hae paw khate mih maethyakhaekuh cih.

¹⁴ Bawipaw nynh hynhte a ho: Ka ccungccaw Israel hae nynh rho lang ccou hae sah cite ka pya hae paw ka rho kha a rohtu hae, ahoy leipaw ka innpaw hae balyn kha mih ram kyate poh ka khoi cih hae, te minmin laku kyate Judah phin kha poh ka khoi cih.

¹⁵ Minmin kha poh ka khoi kou hae te, mih tungvaw ngaethya ka umsah thui cih hae zah, mih balynte mih rho athuapaw mih ram langkhe bua ka cciakhae cih hae.

¹⁶ Ka ccungccaw hae kha Baal pachia min te byakinku lan a ccangpya hae hawte, “Bawipaw tuh a hiin,” cite ka min phyate byakinku khylan, minmin nynh ka ccungccaw hae beiknaw phung kha zuakute a ccangku hae zetuh, ka ccungccaw hae laku ka tynsah cih hae.

¹⁷ Thuasalama bya a ngae leipaw minphuin miakaw tuh abalyn mawte poh ka khaee cih hae zah ka roh cih hae, cite Bawipaw nynh a ci.