JEREMIAH 1 - Zotung Bible 2016

¹ Benjamin ram Anathoth khua kya umpaw ranpibawi hae kyaze lu kheit athua buapaw Hilkiah ccapaw Jeremiah bya:

² Amon ccapaw Siapharan Josiah nynh Judah ram a uknaw kum haw lae thumnaw kum khe Bawipaw bya tuh Jeremiah kya a thua.

³ Josiah ccapaw Judah Siapharan Jehoiakim ccyh lya thuasah, Josiah ccapaw Siapharan Zedekiah nynh Judah ram a uknaw kum haw lae kheitnaw kum kyacia thuasah, tuh-e kum kya Jerusalem khuaccaaw hae a kyng ccyh hae sawpaw sah pangawnaw kyacia thuasah tuh-e Bawipaw bya tuh Jeremiah kya a thua.

Jeremiah Konaw te Ryalaw

⁴ Bawipaw bya tuh ka kya yn thua zah yn hopyapaw tuh:

⁵ “Na nung vue lungkhu kae rae mawze nang kha kae ny vae; na pui mawze nang kha kae thyaasah vae; minphuin hae hanlan nang kha profeh lang kae khang vae,” a ci.

⁶ Tetuh kae nynh, “Pou Bawipaw PACHIA, kae tuh ka imua ung keiccuze pawte ho lan cipaw ka nyh ccaccing khyh,” ka ci.

⁷ Thuasalama Bawipaw nynh kae kha, “ ‘Imua nynh ka thua ung,’ cite ho nan; kae sawnaw lang ccungccaw balyn kalan khe na cceih cih zah, kaw kae pyapaw miakaw kha na ho cih.

⁸ Minmin kha rih nan hae, pawccecize nang khum khylan na kya ka um cih, cite Bawipaw nynh a ci,” yn cipya.

⁹ Tuinte Bawipaw nynh a kuih kha dyng zah ka mung kha yn hae; te Bawipaw nynh kae kha, “Atu ka bya hynh na mung kya ka nung vae.

¹⁰ Dotua, atunin nang kha minphuin hae te peenaw hae tungvaw phoh khylan te suebung khylan, ro khylan te khulia khylan, sak khylan te lin khylan kae khang vae,” yn cipya.

¹¹ Bawipaw bya tuh ka kya yn thua zah, “Jeremiah, Pawmou na muih?” yn cipya. Te kae nynh, “Almond ku ange ngekheit kha ka muih,” ka cipya.

¹² Tetuh Bawipaw nynh kae kha, “Hoyte phe na muih vae, pawccecize ka bya ccingsah lanpaw kha phang ka ngaw,” yn cipya.

¹³ Bawipaw bya tuh ka kalan vae ningnaw yn thua zah, “Pawmou na muih?” yn ci. Te kae nynh, “Accoh cciamangpaw, palung lang apahaekuhpaw ang kha ka muih,” ka cipya.

¹⁴ Tetuh Bawipaw nynh kae kha yn hopah zah: Ram lungkhu um hae paw balyn tungvaw khe palung langte shethya yn thua cih.

¹⁵ Pawccecize atu palung lang peenaw kya-e minphuin hae balyn kha ka ko hae, cite Bawipaw nynh a ci; minmin nynh oun thua cih hae zah, Jerusalem koikua teenaw kya, po koihlukuhpaw khualungrua hae kya te Judah ram e khua hae balyn kyakhe mih bawitungkhung hae kha ccarou a nung cih hae.

¹⁶ Minmin tungvaw bya ka piapaw kha ka ho cih, pawccecize kae kha yn vua hae zah a sei hae, ccangpaw pachia hae kalan silawnaw rae hae zah, mih kuih te a raeku hae paw kha a beik hae.

¹⁷ Thuasalama nang tuh na taevoiboei kha voiku tua; thadyn lah kaw kae pyapaw balyn kha hopah hae. Mih malang khe rih nan, tuhkhyhze tuh mih malang khe maethya kae lah cih.

¹⁸ Judah siapharan hae, a kuihkaw e bawi hae, ranpibawi hae te ramccungccaw hae athuapaw khah-e ram pynpi te arawsekuh lante, nang kha rhawlungrua te akoihlukuhpaw khuapi, sivaw tung, sohin pang lang atunin kae rae vae.

¹⁹ Minmin nynh nang kha rhaw ae tuk hae zemah ae tae lan khyh hae, pawccecize nang kha luesah khylan na kya ka um cih, cite Bawipaw nynh a ci.