ISAIAH 9 - Zotung Bible 2016

Yn Thua Cih paw Siapharan

¹ Thuasalama lungriathaete um hae paw hanlan ngaethyanaw um vae lan khyh. Langmawlya tuh Zebulun ram te Naftali ram kya theihryanaw kha a la thuakhae, thuasalama nyalang tuh rili kin a cceihpaw laanpi, Jordan vaw khuraw lang, minphuin ccangpaw hae a umnaw hae Galilee ram kha a phu-epaw lang a rae cih.

² Mohnaw kya a cceih hae paw ccungccaw hae nynh awnaw alepaw kha a muih vae hae; marae amohnaw ram kya a um hae paw kyakhe awnaw tuh a ak vae.

³ Nang nynh minphuin kha na pungthungsah vae, mih lung houhouh na tuasah vae hae; loohrue lya-e lungtuanaw hawte thuasah, ccungccaw hae nynh luadepaw uccaw a neeku lya hae mih lungtua hawte thuasah namaw malang mih lungtua.

⁴ Pawccecize mih phupaw aripaw a puihnaw hae paw ccong, mih raw vawlan e ccong te tuaasahtu hae kya-e ccungngue kha Midian ccyh lya hawte na khyapya vae hae.

⁵ Rhawdoutu hae kya-e ccukoh balyn te chii kya ohkuhpaw boeining balyn kha maeesoinawpaw morei hawte u athua cih hae.

⁶ Pawccecize aening hanlan imua lu kheit a pui vae, ccapaw lu kheit pya ah thua oh; aning tuh uknaw kaw a hoi cih; amaw kha Ngaeang lan umpaw Tuanaw pyatu, Athungpaw Pachia, Zungzae tynpaw Paaw, Daenaw Siapharan cite minphu athua cih.

⁷ A uknaw kaw tuh houhouh a lethung cih, David kya-e bawitungkhung te a peenaw hanlan athangthya leipaw daenaw a um cih. Tuh-e tuh aning nynh byading te dingnaw khate atu te malang zungzae cia a tynsah cih zah a uk cih. E hynh vaaw Bawipaw nynh lungthote a cyih cih.

Lysakunaw te Tuaasahkunaw kha Byapianaw

⁸ Bawipaw nynh Jakob ciihan kha bya sawnua zah, tuh-e bya tuh Israel hae tungvaw accah;

⁹ Efraim ccungccaw hae te Samaria ram um hae paw ccungccaw balyn nynh tuh-e tuh a ny hae, thuasalama minmin nynh lysakute lungkhungte a ho hae paw tuh,

¹⁰ “Anglae inn tuh ating vae, thuasalama lung inn lante kae sak cih; saikamor thaeku thing hae tuh nge athua vae hae, thuasalama tuh-e thing hae umnaw kyakhe sidar thing hae khate kae sanlae cih,” a ci hae.

¹¹ Tukeiccuze Bawipaw nynh minmin a rawsetu hae kha hangthung hae zah, mih rhaw hae kha a tuhou hae,

¹² Nithua langte Siria hae, niccaw langte Filistin hae nynh mih khalang aw hae zah Israel kha a laang hae. Tuinte mah a thinrianaw tuh daelae khyh zah, a kuih kha po a dyng ung.

¹³ Tuh-e ccungccaw hae nynh minmin tungvaw de a tahtupaw kalan khe ki khyh hae, vaaw Bawipaw kha ccung khyh hae.

¹⁴ Tukeiccuze Bawipaw nynh Israel phin kyate alu te aleihmae kha thuasah, ungcci ku ange te phaeku kha thuasah nin kheit lungkhu a bae cih;

¹⁵ lu tuh piccan hae te sawtua lan um hae paw kha thua zah, leihmae tuh hynbya a ccangpah hae paw profeh hae kha nynh thua;

¹⁶ e ccungccaw hae a cciakhaetu hae nynh minmin kha cciakhaesei hae zah, ccungccaw hae kha mih lungnuasah hae.

¹⁷ Tukeiccuze Bawipaw nynh mih ccangvae hae kha ngaethyaumsah khyh hae, ngawraw hae te nomae hae kha mah thawccih khyh hae, pawccecize mih balyn mawte Pachia pawlangria lei hae paw te hoyleinaw a rae hae paw thua zah, ngaeepaw bya kha a ho hae. Tuinte mah a thinrianaw tuh daelae khyh zah, a kuih kha po a dyng ung.

¹⁸ Hoyleinaw tuh maee hawte arua, thabu te hinpawbu kha phe ccung lan a u; tuhpi kya-e thing hae kha u zah, aku hae tuh maeekhuh ryte a zouthung hae.

¹⁹ Vaaw Bawipaw thinrianaw keiccuze ram tuh u zah, ccungccaw hae tuh maee-unawpaw maeelooh lang a tang hae; lu kheit te lu kheit thawccihkuh khyh hae.

²⁰ Mih ranglang kuih te karankute a ae hae zemah, mih vuelaw mamin, mih voilang kuih te a ae hae zemah, bynlae khyh hae; mih puiziapaw ngesaw toulou kha a ae hae;

²¹ Manasseh phin hae te Efraim phin hae tuh a doukuh hae, e phin ning hae nynh parouhte Judah phin kha a dou hae. Tuinte mah a thinrianaw tuh daelae khyh zah, a kuih kha po a dyng ung.