ISAIAH 64 - Zotung Bible 2016

¹ Mua hae tuh na malang khe a hy ccaw hae, vaawlui kha hung lah, yn rungbung tua,

² Na min kha na rhaw hae nysah khylan, maee nynh thabu kha a u hawte thuasah, tui kha a ccohsah hawte thuasah yn rungbung tua; tuhteze nynh minphuin hae tuh na malang khe a thyngkuh cih hae!

³ Kaening nynh kae la tua leipaw ri lan umpaw uccaw hae kha he na rae te, nae rungbung zah mua hae tuh na malang khe a hy hae.

⁴ Amaw a ngaehoikuh hae paw hanlan rya a lawpah hae paw Pachia, namaw laelan ccangpaw kha langmawlya mawte humhung nynh mah thae boi khyh, a nakaring te thae boi khyh, a mit te mah muih boi khyh.

⁵ Ahmepaw kha lungtuate a cyih hae paw te na laanpi kya nang ae tua hae paw kha na ccuepe hae. Kae tungvaw na thinria zemah kae sei mamin; kaening kha nae retawku keiccuze kae sei vae.

⁶ Kaening balyn tuh athyaa leipaw ccungccaw hawte kae thua vae zah, adingpaw kae cyisahnaw balyn tuh anungsikuhpaw boeining hawte nynh thua. Kaening balyn tuh thingnaw hawte kae naan zah, kae hoyleinaw nynh kaemaw kha khisan hawte ccaring oun mung.

⁷ Na min ae kopaw te na kya kyngku lan a zuakuhpaw lu kheit san um khyh; pawccecize kaening kha na mae ccanglang nae hawitaw zah, kae hoyleinaw lungkhu langkhe nae ap vae.

⁸ Tuhzemah, pou Bawipaw , nang tuh kae Paaw nynh na thua, kaening tuh anglae kae thua zah, nang tuh kaening oun raetupaw ang raetu nynh na thua; kaening balyn tuh na kuih te nae raekupaw nynh kae thua.

⁹ Pou Bawipaw , thawte na thinria nan sah, hoyleinaw kha palei liathui nan. Atu tuatua, kaening balyn tuh na ccungccaw hae nynh kae thua.

¹⁰ Athyaapaw na khuapi hae tuh ramkaw lang nynh a tang vae hae, Zion tuh ramkaw lang tang vae zah, Jerusalem tuh arohpaw lang nynh a tang vae.

¹¹ Kae minpaaw hae nynh ae thehoysahnaw hae hmin, athyaapaw te apuithyapaw kae beikinn tuh maee te u thua vae zah, kae lungrythuanaw hmin balyn tuh arohpaw lang nynh a tang vae hae.

¹² Pou Bawipaw , e hae balyn koute, phang na synkuh ung cih tou? Yccae leite phang umte kaening hynh myarya ccih lante de nae tah ung cih tou?