ISAIAH 61 - Zotung Bible 2016

Luesahnaw Thehoypaw

¹ Bawipaw PACHIA Muisaw tuh ka tungvaw a um, pawccecize Bawipaw nynh kae kha chitui yn thuh vae; tuaasahkunaw a teing hae paw kalan thehoypaw thuakhaepya khylan kae hynh yn saw vae, thinlung akoi hae paw vaemaw kha dansah khylan, a kyng hae paw kya luenaw kong hopya khylan te thongccah hae paw kha luesah khylan thuasah,

² Bawipaw thawccinaw kum te ah Pachia kya-e liarunaw nin kha siakhae khylan thuasah, a rah a khui hae paw kha lungtangnaw pya khylan thuasah,

³ Zion kya a rah a khui hae paw kha bawm khylan— buhhaw hanpaw haetapawsi, rawkhuinaw hanpaw lungtuanaw chitui, ngaethyanaw hanpaw lungtuanaw boeining kha minmin kalan pya khylan thuasah kae kha yn saw vae. Bawipaw nynh a phu-enaw langsaku khylan a linpaw dingnaw thingku cite minmin kha ko athua cih hae.

⁴ Minmin nynh langmawlya e aroh hae paw kha a sakthui cih hae, khawlya e aroh hae paw kha a thadynsah cih hae; she patae kya a la roh vae paw khuapi hae kha a sakthui cih hae.

⁵ Minphuin ccangpaw hae nynh thadynte nae tuuphu hae kha ae rinpah cih oh, ramccang hae nynh nae loo ae phopah cih oh zah, misu khokhu kha ae do-oihpah cih oh;

⁶ nanning kha Bawipaw ranpibawi hae cite ko na thua cih oh, ah Pachia rya a lahtu hae cite ko na thua cih oh; minphuin ccangpaw hae sisua kha na ae cih oh zah, mih hoirumnaw kyakhe nae lungpawkhaekuh cih.

⁷ Nae maethyanaw elang leit ning na mueru cih oh, nae thethyanaw elang na mue oh paw kyakhe nae lungtua cih, tukeiccuze nae hanpaw leit ning kha na ccouru cih oh; zungzae tynpaw lungtuanaw tuh nae kya-e athua cih.

⁸ Pawccecize kae, Bawipaw tuh byading kha ka ry, luadenaw te ahme leipaw cyisahnaw kha ka hua; mih ryalaw mee kha lungzite ka pya cih hae zah, minmin ryte zungzae tynpaw byakinnaw kha ka rae cih.

⁹ Mih ccaaw mih no hae te mintaw hae tuh ccungccaw hae kya te minphuin hae kya mih minthaan cih; minmin tuh Bawipaw nynh hythua a pya hae paw nynh thua cite minmin a muih hae paw balyn nynh a nyh cih hae.

¹⁰ Bawipaw kya myaryamaw ka lungtua cih, ka muisaw tuh ka Pachia kya a lungpaw cih; pawccecize haetapawsi te a ccaankuhpaw zudy ccangvaepaw hawte thuasah, aphutepaw a uccaw te a ccaankuhpaw akaenung liaccanung hawte thuasah khumnaw boeining kha yn lawsakuh zah, dingnaw angkiccua kha yn kisahku vae.

¹¹ Laephi nynh aku kha a posah hawte thuasah, khokhu nynh a lungkhu ccoukuhpaw kha a lesah thung hawte thuasah Bawipaw PACHIA nynh minphuin hae balyn malang khe dingnaw te thehoysahnaw kha a langsakuh cih.