ISAIAH 58 - Zotung Bible 2016

Ahmepaw Looh-aesungnaw

¹ Synku leite siatua! Na roi kha mungkae roi hawte ccaesah tua! Ka ccungccaw hae rawsenaw kha mimaw kalan hopah hae lah, Jakob ciihan hae seinaw kha mah mimaw kalan hopah hae.

² Minmin nynh kae kha nin takyh yn ccung hae zah, ka laanpi ny kha mih lungrythuakhaekuh, dingnaw a raepaw minphuin thua hae zah, mih Pachia phungzae kha vua khyh hae; adingpaw byapianaw kha yn ngia hae zah, Pachia kalan naeku kha mih lungrythua.

³ “Kaening nynh looh-ae kae sung zahmah pawccemou nae muihpya khyh? Zakaw kae sangsaku zahmah pawccemou nae nypya khyh?” a ci hae. Nanning nynh looh-ae na sung nin oh khe, naemaw rynaw kha na rae oh zah, nae ryalahtu hae balyn kha na tuaa na sah oh.

⁴ Nanning nynh peku khylan, ziaku khylan, arysawthahpaw kuihlung te thungku khylan looh-ae na sung oh. Atunin looh-ae na sung tahaw oh paw looh-ae sungnaw nynh tuh nae roi kha ahangnaw kyate thae thua lan khyh.

⁵ Nin kheit lungkhu mawtemaw zakawsangsakute looh-aesungnaw tahawpaw kha ka rypaw athua zawtou? Thing akoikuhpaw hawte lu tebing lanpaw te buriboei te buhhaw kya i lanpaw athua zawtou? E hynh looh-aesungnaw na ci cih oh tou? Bawipaw nynh a nawccawpaw nin na ci cih oh tou?

⁶ Kae nynh ka rypaw looh-aesungnaw tuh: ahme leipaw khiikunaw kha supyapaw, phupaw ripaw kha khahpyapaw, tuaasahkunaw a teingpaw kha luesahpaw te puihnawpaw ccong miakaw khyapaw kha thua khyh tou?

⁷ A vuelawpaw kha na looh neethung buapaw, inn a hoi leipaw ryachipaw kha na inn lang thuakhaepaw, a sasete a umpaw kha na muih ze, boeining pyabuapaw te na puizia hae sibia leipaw kha thua khyh tou?

⁸ Tuhte na cyi zetuh, na awnaw tuh awkhua takaw e awnaw hawte yn langkuh cih zah, arangte na dan cih; nang kha thyaa ae ccousahtupaw tuh na malang khe a cceih cih, Bawipaw phu-enaw tuh na nulang te ae rintu athua cih.

⁹ Tetuh Bawipaw kha na ko cih zah, ae oi cih; bawmnaw mue khylan na sia cih zah, aning nynh, E kya mang ka um, ae cipah cih. Puihnawpaw ccong kha thuasah, kuihdung te khikunaw kha thuasah, ahoy leipaw byaho kha thuasah na vua zah,

¹⁰ a vuelawpaw kha na looh na pya zah a vawsawpaw a hobounaw kha na bawm lanze thuasah, na awnaw tuh mohnaw kya a aw cih zah, na mohnaw tuh ninthuccynglyn hawte a aw cih.

¹¹ Bawipaw nynh nang kha tyty ae cciakhae cih zah, ramrou kya na hanlan ahoboupaw kha ae ccingsahpah cih, na ru hae kha thungnaw a pya cih; nang tuh tui abukuhpaw khokhu hawte na thua cih zah, tui akan boi leipaw tuidy hawte na thua cih.

¹² Langmawlya aroh vae hae paw kha sakthui athua cih; khawlya e arynpaw aleihpaw kyakhe na bingchih cih oh; nang tuh ting athua vae paw khualungrua kha a raethuitu, ccungccaw umnaw laanpi hae kha a raethuitu cite ko na thua cih.

¹³ Nang nynh sabbath nin kha thethyasah leite, athyaapaw ka nin kyakhe namaw rynaw kha zui leite, sabbath nin kha lungrythua lan umpaw nin, sawtua lan umpaw Bawipaw nin athyaapaw cite na ko ze thuasah, namaw rynaw kalan ccia leite, namaw rynaw kha zui leite, namaw pekipaw kha cyi leite, sabbath nin kha saw na tua ze thuasah

¹⁴ nang tuh Bawipaw kyakhe na lungrythuakhaekuh cih zah, laephi ahangpaw vawlan khe kae ccisakuh cih; na minpaaw Jakob rho khate looh kae dang cih, cite Bawipaw munglae nynh a ho vae.