ISAIAH 56 - Zotung Bible 2016

Kawngaepaw Balyn hanlan Byakinnaw

¹ Bawipaw nynh a hopaw tuh: Byading kha ccykekuh lah, ahmepaw kha cyitua, ccyh aro mawze ka khumnaw tuh yn thua cih zah, ka kya-e luenaw tuh yn langkuh cih.

² Sabbath nin kha thusah leite sungkuh zah, hoyleinaw miakaw kha rae leite a sungkuhpaw tuh lungtuapaw nynh thua; hynh-e hae hynh tynkaring lan a kyngkuhpaw tuh lungtuapaw nynh thua.

³ Bawipaw kya a kyngkuhpaw ramccang ccungccaw nynh, “Bawipaw nynh a ccungccaw hae kyate kae kha yn phia ccaccing cih,” cite ho nan sah; tinriapaw ccungccaw nynh mah, “Kae tuh thingku aroupaw nynh ka thua,” cite ho nan sah.

⁴ Bawipaw nynh a hopaw tuh: Ka sabbath kha sung zah ka lungrypaw uccaw kha pokute ka byakin kha tynkaring lan a kyngkuhpaw tinriapaw ccungccaw hae kalan khe

⁵ ccanung ccapaw hae laeze aphute huapaw liathuinawpaw uccaw te min kha ka inn te ka khualungrua lungkhu khe ka pya cih hae; azo kho leipaw zungzae tynpaw min kha ka pya cih hae.

⁶ Bawipaw rya kha law khylan, a min kha sungsah khylan te amaw ryalahtu lang tang khylan Bawipaw kya a kyngkuhpaw ramccang hae kha thuasah, sabbath kha thusah leite sung zah, ka byakin kha tynkaring lan a kyngkuhpaw balyn kha thuasah

⁷ athyaapaw ka mua kalan ka cciakhae cih hae zah, sawsangnawpaw ka inn kyakhe mih lung ka tuasah cih hae; maee-ute si a law hae paw te si a lawnaw hae paw kha ka silawhang vawlan khe ccoupya athua cih hae; ka inn tuh ccungccaw balyn hanlan sawsangnaw inn cite a ko cih hae.

⁸ Phiariphiarae um hae paw Israel hae kha a suelua hae paw Bawipaw Pachia nynh hynhte a ho, “A sueluakuh vae hae paw laelan ccangpaw hae kha mah minmin kalan ka sueluabua ung cih hae,” a ci.

Israel Uktu hae Ozia Ronaw

⁹ Nanning, loramsaw hae balyn, ramkaw e loramsaw hae balyn, tei khylan rang oh!

¹⁰ Israel rhawviatu hae tuh mih mit amoh, mih balyn mawte nythyanaw hoi khyh hae; minmin balyn tuh ngoh kho leite yccae leipaw ui hae nynh thua hae; ih hae zah maan a sah hae, i kyalya kha a ry hae.

¹¹ Myarya ae kho hae zah a byn kho leipaw ui hae nyn thua hae. Tuurin hae nynh mah nythyanaw hoi khyh hae; mimaw laanpi langkhe nynh pong a maeku vae hae, mih balyn mawte mimaw thanenaw kyalya kha a ccungku hae.

¹² Minmin nynh, “Rang oh, misutui neih oh sih; ruithyapaw kha phe byn lan neih oh sih. Awkhualan tuh atunin hawte athua cih zah, ho kho um lei lan ahoyhua cih,” a ciku hae.