ISAIAH 55 - Zotung Bible 2016

Hiin Hoynaw kalan Konaw

¹ Pou tui a hawpaw miakaw, tui a umnaw lang rangtua oh; phua a hoi lei hae paw, rang oh lah, rekute aetua oh! Rang oh lah, misutui te mateitui kha phua leite, amee leite reku tua oh.

² Pawccemou looh thua leipaw hanlan nae phua kha na mang oh zah, byn lan a um leipaw hanlan nae ryalaw mee kha na thangsah han oh? Ka bya hynh hoyte yn ngaepah oh lah, ahoypaw looh kha ae oh, athuapaw aepaw kyakhe nae lungrythuakhaekuh sah.

³ Nae nakaring kha oun tuakuh oh lah, ka kalan rang oh; na hiin ccaw oh ngaetua oh. Nanning ryte zungzae tynpaw byakinnaw kha ka rae cih zah, David kya ka kinpyakupaw atynpaw sungsahnaw kha kae pya cih oh.

⁴ Dotua oh, David kha ccungccaw hae hanlan ccaekia lang ka rae zah, cciakhaetu te kawpyatu lang ka rae vae.

⁵ Dotua, na ny leipaw minphuin hae kha na ko cih hae, Israel Pachia Athyaapaw, Bawipaw na Pachia liate, nang ae nyh leipaw minphuin hae nynh na kalan oun ccue cih hae, pawccecize tuh-e Pachia nynh nang kha phu-enaw ae pya vae.

⁶ Bawipaw kha muih kho a um lyakhe ccung oh, anaenaw a um lyakhe amaw kalan sawsang oh;

⁷ ccungccaw hoylei hae paw nynh mih laanpi kha vua hae sah lah, a ding lei hae paw nynh mih tuanaw kha vua hae sah; minmin nynh Bawipaw kalan naekuh hae sah, tuhteze nynh minmin kha thaw a ccih cih hae, ah Pachia kalan maekuh hae sah, tuhteze nynh seinaw kha marya a ngaethya cih hae.

⁸ Ka tuanaw tuh nae tuanaw te lokuh khyh, ka cyisahnaw mah nae cyisahnaw te lokuh khyh.

⁹ Vaawlui tuh laephi laeze ahanghua hawte, ka cyisahnaw tuh nae cyisahnaw laeze hanghua zah, ka tuanaw tuh nae tuanaw laeze ahanghua.

¹⁰ Khuaa te vuiraw tuh vaawlang te yn ccahbung zah, laephi nynh aku posah zah athae a thaesah nawlan te ccacii a ccoutu kha ccacii pya zah, looh a aetu kha looh a pya nawlan, laephi kha tui a ciasah mawlaezung ki khyh,

¹¹ tuhawte nynh ka khalang kyate a poupaw ka bya tuh athua cih; alakaw lante kamaw kalan yn ki lan khyh, ka eenaw kha a ccingsah cih zah, ka sawnuathepaw kha a ccingsah cih.

¹² Nanning tuh lungtuate na pou cih oh zah, daenaw te kikhae thui na thua cih oh; mua hae te sangpyng hae tuh nae malang khe lungtuate hlaw a sah cih hae, loram kya-e thingku balyn tuh mih kuih a bia cih hae.

¹³ Hinpaw ku a umnaw khe maeccaw ku a poru cih; thabu a umnaw khe amynkhuhpaw martal ku a poru cih; tuh-e tuh Bawipaw malang liathuinaw athua cih zah, azo kho leipaw zungzae tynpaw muihsahnaw athua cih.