ISAIAH 51 - Zotung Bible 2016

Pachia Ccungccaw hae hanlan Hythuanaw

¹ Dingnaw lang a zui hae paw te Bawipaw a ccung hae paw nanning, ka bya hynh ngaetua oh. Nanning nae pounaw oh lungpi te nanning ae thaebianaw oh paw lungkarung kha tuatua oh.

² Nae paaw Abraham te nanning ae saahtu oh paw Sarah kha tuatua oh; Abraham ka la ko lya tuh a makhae nynh thua, thuasalama hythua ka pya zah patae lang ka rae.

³ Pawccecize Bawipaw nynh Zion kha ngaengannaw a pya cih; ccungccaw a um leinaw a hmin balyn kha ngaengannaw a pya cih, a ramkaw kha Eden hawte a rae cih zah, a laesia ram kha Bawipaw khokhu hawte a rae cih; Zion kyakhe lungtua lungpawnaw, lungtuabya honaw te hlawsahnaw roi kha a um cih.

⁴ Ka ccungccaw hae, ka bya hynh ngaetua oh, ka minphuin hae, ka hopaw hynh hoyte ngaetua oh; pawccecize ka kyate ccangpyanaw a toikuh cih zah, ka byading tuh ccungccaw hae hanlan awnaw lang a tang cih.

⁵ Ka kya-e luenaw kha arangte kae thuakhae cih, ka khumnaw tuh pou vae zah, ka kuih nynh ccungccaw hae kha a uk cih hae; rili khunglang e ram hae nynh kae kha yn ngaehoikuh hae zah, ka kuih kha a doliaku hae.

⁶ Vaawlui khuh dotua oh lah, akaw lang e laephi kha mah dotua oh; vaawlui tuh maeekhuh hawte a zo cih zah, laephi tuh boeining hawte a pue cih, laephi vawlan a um hae paw tuh maseih hawte a chih cih hae; thuasalama ka khumnaw tuh zungzae atyn cih zah, ka kya-e luenaw tuh thang boi vae lan khyh.

⁷ Dingnaw kha nyh hae zah mih thinlung kya ka ccangpyanaw a hoi hae paw nanning, ka bya hynh ngaetua oh; ming hae nynh sei ae be oh ze rih nan oh, ae sarya oh zemah nae lungriathae nan sah.

⁸ Pawccecize laehaw nynh minmin kha boeining hawte a ae cih hae zah, ripaw nynh tuuming boei hawte a ae cih hae; thuasalama ka kya-e luenaw tuh zungzae atyn cih zah, ka khumnaw tuh she takyh po atyn cih.

⁹ Pou Bawipaw kuih, thoku tua, thokuh lah thawzung lawku tua! khawlya e langmaw she lya hawte thoku tua! Rahab kha zoihtatyh lan pae zah, nakaa-hupi kha a thuingtupaw tuh namaw na thua khyh tou?

¹⁰ Myarya akhupaw rili kha karae rousah zah, a shawkhawpaw ccungccaw hae nynh rili a zua nawlan hae cite akhupaw rili kha laanpi lang a raetupaw tuh namaw na thua khyh tou?

¹¹ Tukeiccuze Bawipaw nynh a luesah hae paw tuh a ki cih hae zah, hlawsah biate Zion khuapi a thua cih hae; zungzae tynpaw lungtuanaw lukhung kha a khungkuh cih hae; lungtua lungpawnaw kha a mue cih hae zah, ngaethyanaw te riathaenaw tuh azo vae cih.

¹² Nanning kha ngaengannaw ae pyatu oh paw tuh kamaw nynh ka thua; a chih cih paw ccungccaw, lonua hawte a naanthyapaw ccungccaw maesae kha pawccemou na ripya?

¹³ Vaawlui kha tharae daw zah laephi thonaw aleihpaw a bingtu, nang ae Raetupaw Bawipaw kha phe na ning vae. Nang ae tuaasahtupaw a thinrianaw te nang kha ro khylan a paccynkuhtupaw keiccuze nang tuh anin ninlang po na rih. Thuasalama nang ae tuaasahtupaw a thinrianaw tuh teimou a um vae?

¹⁴ Tuaasahkunaw a teing hae paw kha arangte luesah athua cih hae; minmin tuh chih lan khyh hae, Hunghuapi lungkhu lang ccah lan khyh hae zah, looh leite um lan khyh hae.

¹⁵ Pawccecize kae tuh rili tuileih kha thosah zah, rili roi a ccaesahtupaw Bawipaw nae Pachia nynh ka thua, amaw min tuh vaaw Bawipaw nynh thua.

¹⁶ Ka bya kha na mung kya ka nung zah, nang kha ka kuih a mynlyh kya kae thuruh vae, vaawlui kha tharae ka daw zah, laephi aleihpaw kha ka tynsah, te Zion kha, “Nang tuh ka minphuin nynh na thua,” ka cipya.

¹⁷ Pou Jerusalem, thoku tua, namaw te namaw thoku tua, namaw thoku tua! Nang tuh Bawipaw kuih kya umpaw a thinrianaw banang kha phe na nia vae, ruinawpaw pakekhupaw kya-e ahaw kha mah a neihtupaw nynh na thua.

¹⁸ Amaw nynh a saahku hae paw a ccaaw hae balyn laku kya aning kha a cciakhae lanpaw lu kheit san um khyh; aning nynh a do-oih hae paw a ccaaw hae laku kya aning kha a kuih te a kyng lanpaw lu kheit san um khyh.

¹⁹ Vawsawnaw phuin ning athuapaw ccakanccinaw keiccu ronaw te thaloi rhaw keiccu ronaw nynh na tungvaw ae thuanua vae, hum nynh mou nang kha a ngae ae thyakhae cih? Hum nynh mou lungtangnaw ae pya cih?

²⁰ Na ccaaw hae tuh mih thawzya vae, kaang a kaepaw saccung hawte laanpi atungkunaw miakaw kya a huekuh hae; Bawipaw thinrianaw, na Pachia thuiheinaw khate minmin tuh phe a beih hae.

²¹ Tukeiccuze vaemaw a mue hae paw, misutui te thua leite ccangpaw te a rui hae paw nanning, e hynh ngaetua oh:

²² Nanning kya-e Alesae huapaw, Bawipaw , a ccungccaw hae byathan kha a pankhawtupaw nae Pachia nynh a hopaw tuh: Dotua, ruinawpaw pakekhupaw kha na kuih kyate ka law vae; ka thinrianaw banang kya-e kha na neih vae lan khyh oh.

²³ Nae ke kha laephi hawte na tuapakuh oh zah, minmin ccianaw lanpaw laanpi hawte na raepya oh. “Bakhung, na tungvaw kae cceih cih,” cite ae hopah oh paw, nanning ae tuaa ae sah oh paw kuih hae kyakhe khah-e banang kha ka nung cih.