ISAIAH 43 - Zotung Bible 2016

Pachia nynh A Ccungccaw hae A Poukhae hae

¹ Pou Jakob, pou Israel, nang ae raetupaw Bawipaw nynh a hopaw tuh: Nang kha kae shawkhaw vae keiccuze rih nan; nang kha na min te kae ko vae, nang tuh ka kya-e nynh na thua.

² Tui alepaw kha he na ke vae ze, na kya ka um cih; vawpi hae kha he na ke vae ze, ae vu lan khyh; maee lungkhu he na ccia vae ze, ae u lan khyh, maeephu nynh nang kha ae u kho lan khyh.

³ Pawccecize kae tuh Bawipaw na Pachia nynh ka thua, nang ae Khumtu Israel Pachia Athyaapaw nynh ka thua. Nang kha shawkhaw khylan Izip hae kha ka vua hae zah, Ethiopia te Seba kha mah ka vua hae.

⁴ Nang tuh ka muihnaw kya aphutepaw na thua keiccuze sawtuanaw kae pya zah kae sungsah, tukeiccuze nang kha khum khylan ccungccaw hae kha ka vua hae zah, nang na hiinnaw hanlan minphuin hae kha ka vua hae.

⁵ Rih nan, na kya phang ka um; nithua langte na ciihan hae kha ka cciakhae cih hae zah, niccaw langte nang kha kae suelua cih.

⁶ Palung lang hae kyakhe, “Minmin kha saw oh,” cite ka hopah cih hae, alia lang hae kyakhe, “Kang nan oh; ka ccapaw hae kha asawnaw kyate cciakhae oh lah, ka ccanung hae kha laephi adianaw kyate cciakhae oh,

⁷ minmin tuh ka min te ko athua hae paw, ka phu-enaw hanlan ka raeku hae paw nynh thua hae,” a ci.

⁸ Mit a hoi zemah ngawmuih leipaw te nakaring a hoi zemah nawthae leipaw ccungccaw hae kha cciakhae oh!

⁹ Minphuin balyn tuh pynkheihlan sueluakuh hae sah lah, ccungccaw hae tuh pumkuh hae sah. Minmin laku e hum nynh mou atu acyihkuhpaw e hynh la hoty zah, hum nynh mou a la cyihkuh vae paw kha aening kya oun la hopah ty? Minmin nynh a sei khyhnaw hae paw kha langsaku khylan mih ccaekia hae kha oun thuakhae hae sah, minmin nynh thae hae sah lah, “E tuh ahme,” cite ho hae sah.

¹⁰ Bawipaw nynh a hopaw tuh: Kae tuh Pachia ka thuapaw kha nae nyh oh zah nae zyn nawlan oh, nanning tuh ka ccaekia hae te kae po oh paw ka ryalahtu nynh na thua oh. Kae ka mawze pachia um boi khyh zah, kae ka koute mah um vae lan khyh.

¹¹ Kae kyalya nynh Bawipaw ka thua, kamaw laelan khumtu um khyh.

¹² Ka la hodaety thyhte kae khum oh, tuh-e tuh phe ka la hoty vae; tuh lyaze nanning laku kya ccangpaw pachia um khyh; nanning tuh ka ccaekia hae nynh na thua oh, cite Bawipaw nynh a ci.

¹³ Kae tuh Pachia ka thua zah, Pachia ka thua zungzae cih; ka kuih kyate a lue khopaw pawpaw mah um khyh; ka ryalaw kha hum nynh mou yn khee kho cih?

¹⁴ Nanning ae shawkhawtu oh paw Bawipaw , Israel Pachia Athyaapaw nynh a hopaw tuh: Nanning hanlan Babilon lang ka saw cih zah, khua koihnawpaw accaw hae kha pong ka khya cih, Khaldi hae nynh lungtuate a siaruanaw hae kha rawkhuinaw roi lang a tang cih.

¹⁵ Kae tuh Bawipaw , Athyaapaw na Pachia, Israel Raetu, na Siapharan nynh ka thua.

¹⁶ Bawipaw tuh rili lungkhu laanpi a raetupaw te tuileih lungkhu laanpi a raetupaw thua zah,

¹⁷ marangle te marang, rhawkaw te a rawthungpaw kha a thuakhaetupaw nynh thua; minmin tuh khuliakuh hae zah thokuh kho khyh hae, minmin kha maeekhua the hawte zosah athua hae.

¹⁸ Langmaw lyaze acyihkuhpaw kha liathui nan vae oh, khawlyaze acyihkuhpaw kha tua nan vae oh.

¹⁹ Uccaw thawpaw kha ka cyih cih; tuh-e tuh atu yn langkuh cih zah, na muih cih oh. Ramkaw kya laanpi ka rae cih zah, laesia ram kya vaw ka luasah cih.

²⁰ Sarangpaw hae, suizaw hae te kalauh pavaw hae nynh kae kha saw yn tua cih hae; pawccecize ka popaw ka ccungccaw hae nynh a nia lan hae cite, ramkaw kya tui ka pya hae zah laesia ram kya vaw ka luasahpya hae.

²¹ Kamaw hanlan ka raekupaw tuh-e minphuin nynh kamaw thehoysahnaw kha a siakhae cih.

²² Thuasalama, pou Jakob, nang nynh ka kalan saw na sang khyh. Pou Israel, na tungvaw ka lungthang vae!

²³ Maee-ute silawnaw lang na mangpaw na tuu kha ka kalan nae cciakhae khyh, silawnaw raete saw nae tua khyh. Ahlu yn pya, cite na phupaw kae risah khyh, mynkhuhpaw kha yn pya, cite na thaw kae bangsah khyh.

²⁴ A-epaw ccazung kha phua te nae repah khyh, silawnawpaw athopaw kha phe ka byn lan nae dang khyh. Na seinaw khate ka phupaw na risah; na hoyleinaw khate ka thaw nae bangsah.

²⁵ Kae tuh kamaw hanlan athua keiccuze, na cyiseimenaw kha ae thyaasahpaw Pachia ka thua zah, nae seinaw kha ka liathui vae lan khyh.

²⁶ Kae hynh sei yn betua, byapiazung lang cceih sih. Na sei leinaw kha na langsaku nawlan, na byathan kha yn thuakhae tua.

²⁷ Masaty lya-e na minpaaw nynh a la sei, na sazae hae nynh ka tungvaw a la mesei hae.

²⁸ Tukeiccuze beikinnthyaa kya-e bawi hae tungvaw ka lua ka aethua, Jakob kha ronaw kalan ka ap zah, Israel kha thethya ka ccousah.