ISAIAH 42 - Zotung Bible 2016

Minphuin hae hanlan Awnaw

¹ Ka bawmpaw ka ryalahtu, ka popaw, a tungvaw ka lungrythuapaw tuh hein kya a um; ka muisaw kha a tungvaw ka biasah vae, aning nynh byading kha minphuin hae kalan a thuakhae cih.

² Aning nynh sia lan khyh, a roi mah saw lan khyh, laanpi kya a roi kha thaesah lan khyh hae;

³ a vaemaw umpaw phaeku kha khya lan khyh, thyhthyhte aruapaw maeekhua kha the lan khyh; byading kha lungzite a thuakhae cih.

⁴ Laephi vawlan byading a tynsah mawlaezung, a lungthawzya lan khyh zah a lungroh lan khyh; rili khunglang e ram hae nynh a ccangpyanaw kha a ngaehoi hae.

⁵ Vaawlui kha rae zah tharae a dawtupaw, laephi te laephi kyate yn thuapaw miakaw kha a pazaesakuhtupaw, laephi vaw e ccungccaw hae kha hiinnaw hy a pyatupaw te laephi vawlan a cceihthya hae paw kha muisaw a pyatupaw Bawipaw Pachia nynh a hopaw tuh:

⁶ Kae tuh Bawipaw nynh ka thua, nang kha dingnaw hanlan kae ko vae, na kuih te kae kyng cih zah kae rin cih; nang na liate minphuin hae ryte byakinnaw ka rae cih zah awnaw kha a umsah cih.

⁷ Amohpaw mit hae kha na awsah cih, thongccah hae paw kha thonginn kyate na luesah cih hae zah, mohnaw lungkhu a haung hae paw kha thonginn kyate na pousah cih hae.

⁸ Kae tuh Bawipaw nynh ka thua, tuh-e tuh ka min nynh thua; ka phu-enaw kha ming hae kalan ka pya khyh, ka thehoynaw kha zohtuh hae kalan ka pya khyh.

⁹ Langmawlya ka la hoty hae paw kha phe ccing vae, atu tuh athawpaw uccaw hae kha ka ho cih; tuh-e hae a langku mawze, nanning kha kae hopah cih oh.

Thehoysahnaw Hlaw

¹⁰ Bawipaw kalan hlaw thawpaw sah oh, laephi adianaw kyate amaw thehoysahnaw hlaw kha sah oh! rili vawlan cceih hae paw te rili kya a umpaw balyn nynh thuasah, rili khunglang e ram hae te tuin kya a um hae paw nynh thuasah thehoysahnaw hlawsah hae sah.

¹¹ Laesia ram te tuin kya umpaw khua hae nynh thuasah, Kedar ccungccaw hae a umnaw hae khua hae nynh thuasah, Sela khua a um hae paw nynh thuasah lungtuate hlawsah hae sah, mua dung hae kyate sia hae sah.

¹² Bawipaw kha phu-enaw pya hae sah lah, rili khunglang e ram hae kyakhe amaw kha thehoysah hae sah.

¹³ Bawipaw tuh rhawkawpaw hawte toikuh zah, a rawthungpaw hawte amaw te amaw kha a thinriasaku; thawte sia zah, a rhaw hae kha rawsete a thungnaw kha a langsaku.

¹⁴ “Daebabi lan khaw cia ka um vae, kamaw te kamaw phang ka synkuh ung; atu tuh neitangia accihpaw nopi hawte ka sia vae cih, ka cyih ccaccing vae cih.

¹⁵ Mua hae te sangpyng hae kha ka roh cih hae zah, mih kya-e aku hae balyn kha ka rousah cih; vaw hae kha laelung lang ka tangsah cih zah, tuili hae kha ka rousah cih.

¹⁶ Mitmoh hae kha mimaw nynh a ny lei hae paw laanpi te ka cciakhae cih hae, mimaw nynh a la ny boi lei hae paw laanpi khate laandy ka hoei cih hae. Mih malang khe mohnaw kha awnaw lang ka tangsah cih, karynkare a umpaw kha ka nginsah cih. E hae hynh ka cyi lanpaw thua hae zah, minmin kha ka vua lan khyh hae.

¹⁷ Raekupaw zohtuh hae kha doliakuh hae zah, a laeeku hae paw zohtuh hae kyakhe, “Nang tuh kae pachia nynh na thua,” cite a ho hae paw tuh nulang maeleihsaku athua cih hae zah, maethyanaw a mue cih hae.

¹⁸ Nawpan hae paw nanning, thaetua oh; mih mitmoh hae paw nanning, do oh lah muihtua oh!

¹⁹ Ka ryalahtu holeite hummou a mitmoh? Ka sawpaw ka locceihtu hawte hummou a nawpan? Ka thyaasahpaw ccungccaw hawte hummou a mitmoh? Bawipaw a ryalahtu hawte hummou a mitmoh?

²⁰ Aning nynh uccaw patae a muih zemah hoyte tuabia thya khyh; naw a ngae zemah thae khyh.

Israel nynh Kaw-einaw

²¹ Bawipaw tuh amaw a dingnaw liate a lungrythua, a ccangpyanaw kosah lanpaw te tuh-e a ccangpyanaw phu-esah lanpaw kha a lungrythua.

²² Thuasalama e minphuin tuh ming hae nynh a luade hae paw minphuin nynh thua, mih balyn mawte akhu kya kaangkae hae zah, thonginn lungkhu thuruh athua hae; a luesahtu lu kheit san um leite, teipaw saw hawte nynh a thua vae hae, luadenaw a um vae ze, “Pyathui!” cite a hopaw lu kheit san um khyh.

²³ Nanning lakuze hum nynh mou e bya hynh a peki cih? Hum nynh mou malang ccyh hanlan pekite a ngae cih?

²⁴ Hum nynh mou Jakob kha luadetu kalan ap zah, Israel kha damiah hae kalan a pya? Kaening nynh a tungvaw kae seipaw Bawipaw nynh a pyapaw thua khyh tou? Minmin nynh a laanpi kha zui ry khyh hae, a ccangpyanaw kha zui khyh hae.

²⁵ Tukeiccuze maee lang ruapaw a thinrianaw te rhawtuk thinrianaw kha minmin tungvaw a ccawsah; mih pepan balyn khe maee a soi zemah, minmin nynh thaethya khyh hae; maee nynh a u hae zemah, mih thinlung kya pawlangria khyh hae.