ISAIAH 41 - Zotung Bible 2016

Israel hae Byakinpyaku hae

¹ Pou rili khunglang e ccungccaw hae, daebabi lan um oh lah, ka bya hynh ngaetua oh; minphuin hae nynh thawzung thawpaw hoi hae sah, naekuh hae sah lah, ho hae sah; byapianaw hmin kya pynkheihlan tungkuh oh sih.

² Hum nynh mou taetu kha nithua langte yn langsakuh zah, amaw rya kha lawsaku khylan a kokuh? Aning nynh minphuin hae kha amaw kalan ap hae zah, siapharan hae kha a uksah hae; a thaloi khate rhaw hae kha vuiping lang tangsah hae zah, a li khate khisan nynh a mungpaw ccatanphue lang a tangsah hae.

³ Minmin kha deehui hae zah khyndadyh lante laan po a thoih hae, a ccu nynh laanpi kha ccadyhte kyalya nynh a nae.

⁴ E hae hynh hum nynh mou rae zah a cyih? Athotakawnaw kyate ccungccaw she miakaw kha a umsahtu tuh hummou athua? Kae, Bawipaw tuh masaty a umpaw ka thua zah, nyathyakou a umpaw mah ka thua cih.

⁵ Rili khunglang e ram hae nynh muih hae zah a rih hae, laephi adianaw e ccungccaw hae tuh thyngkute oun naekuh hae zah a sueluakuh hae.

⁶ Lu kheit te lu kheit bawmkuh hae zah, “Na rawthung sah!” cite mimaw te mimaw a hoku hae.

⁷ Lehccama nynh suitheithyapaw kha thawzung a pya, khynlyng te a tudethyapaw nynh lungde vawlan naebabing lan atudethyapaw kha thawzung pya zah, “Sivaw na piadepaw ahoy,” a cipya; te minmin nynh tuh-e tuh anueku khyh nawlan thingkhia te a khiade hae.

⁸ Thuasalama ka ryalahtu Israel, ka po vae paw Jakob, nang tuh ka banpaw Abraham ciihan nynh na thua;

⁹ nang tuh laephi adianaw kyate kae cciakhaepaw na thua zah, “Nang tuh ka ryalahtu nynh na thua, nang kha kae pokuh zah kae vua khyh!” cite hopyate myarya asawnaw laephi apaki kyate kae kopaw nynh na thua;

¹⁰ kae tuh na kya ka um keiccuze na thinphang nan sah, kae tuh na Pachia ka thua keiccuze rih nan; nang kha thawzung kae pya cih zah, kae bawm cih, taenaw a hoipaw ka ranglang kuih te nang kha kae thungkhaw cih.

¹¹ Na tungvaw a thinriapaw balyn tuh maethyanaw te thethyanaw a mue cih hae; nang ae rawse hae paw tuh accakaepaw hawte athua cih hae zah a roh cih hae.

¹² Nang ae rawsepaw kha na ccung zemah na muih lan khyh; nang kha rawsete rhaw a tho hae paw tuh accakaepaw lang marya a tang cih hae.

¹³ Pawccecize kae, Bawipaw na Pachia nynh na ranglang kuih kha phang kae kyng; “Na thinphang nan sah, nang kha kae bawm cih,” cite ae hopahtupaw tuh kamaw nynh ka thua.

¹⁴ Pou tangkaria Jakob, minphuin dihpaw Israel, na thinphang nan sah! Kae bawm cih cite Bawipaw nynh a ci; nang ae shawkhawtupaw tuh Israel Pachia Athyaapaw nynh thua.

¹⁵ Nang kha haw hoi zah ahepaw, ccatan tinnawpaw seh athawpaw lang kae rae cih; mua hae kha ccatan tin hawte na tin cih hae zah na miade cih hae, sangpyng hae kha vaekang lang na tangsah cih hae.

¹⁶ Minmin kha na zaw cih hae zah khisan nynh a mung cih hae, khise nynh kaheikalah a nung cih hae. Tetuh Bawipaw kya na lungtua cih zah, Israel Pachia Athyaapaw kha the na hoysah cih.

¹⁷ Ryachi hae te ahobou hae paw nynh tui kha ccung hae zah, muihku leite tui kanmawte mih dang he arou vae ze, kae, Bawipaw nynh mih bya kha ka thaepah cih hae, Israel Pachia, kae nynh minmin kha ka vua lan khyh hae.

¹⁸ Mua roupaw vawlan khe vawpi ka luasah cih zah, accya khe tuidy ka phyhsah cih; ramkaw kha tuili lang ka rae cih zah, ramrou kha tuisung lang ka rae cih.

¹⁹ Ramkaw khe sidar ku, eri ku, mura ku te oliv ku kha ka posah cih; te laesia ram kya maeccaw ku te plane ku te tumaeccaw ku kha pynkheihlan ka posah cih hae,

²⁰ tuhteze nynh, e hynh Bawipaw nynh cyih zah, Israel Pachia Athyaapaw nynh a rae cipaw kha ccungccaw balyn nynh a muih cih hae zah a nyh cih hae, a tua cih hae zah a thaethya cih hae.

Zohtuh Ccungkia Leinaw

²¹ Nae byathan kha oun poukhae oh, cite Bawipaw nynh a ci; atynpaw nae ccaekia hae kha oun thuakhae oh, cite Jakob phin hae Siapharan nynh a ci.

²² Mih zohtuh hae kha oun cciakhae hae sah lah, yn cyihkuh cih paw kha kaening oun hopah hae sah. Acyihkuh vae paw kong kha pawte nynh acyiku cipaw oun hopah oh, tuhteze nynh kaening nynh minmin kong kha kae tuase cih zah, mih ccungkianaw hae kha kae nyh cih; tuhkhyhze yn cyihkuh cih paw kha kaening oun hopah oh.

²³ Nanning tuh pachia hae na thua oh paw kha kae ny nawlan, atu koute yn cyihkuh cih paw kha oun hopya tua oh; kaening nynh kae rih zah kae siiku nawlan, ahoypaw khyhze athahpaw kha raetua oh.

²⁴ Nanning tuh accakaepaw na thua ccaccing oh zah, nae ryalaw mah accakaepaw nynh thua; nanning ae pokuh oh paw miakaw tuh anungsikuhpaw nynh thua hae.

²⁵ Thahlang umpaw kha lungthobya ka hopah zah yn thua vae, khuanin a thuanaw langte yn thua zah, ka min kha yn ko cih. Ang raetu nynh anglae kha a syde hawte, aning nynh uktu hae kha anglae hawkhate a syde cih hae.

²⁶ Kaening nynh kae ny kho nawlan, laephi athotakawnaw kyate hum nynh mou a la ho? “Aning nynh a hopaw tuh akyh,” cite kae ho kho nawlan, langmawlya te hum nynh mou a la ho? A hopaw lu kheit san um khyh, thaesahtu lu kheit san um khyh, nae bya a thaepaw lu kheit san um khyh.

²⁷ E kong hynh kae nynh Zion kya masaty ka hopya, thehoypaw a phutu kha mah Jerusalem lang kae nynh ka saw.

²⁸ Thuasalama he ka do hae tuh lu kheit san um khyh hae; bya he ka khia hae tuh, minmin laku kya bya yn khungpaw tuanaw pyatu lu kheit san um khyh.

²⁹ Minmin tuh accakaepaw cci nynh thua hae; mih ryalaw tuh alakawpaw nynh thua; mih zohtuh hae tuh accakaepaw khivae nynh thua hae.