ISAIAH 35 - Zotung Bible 2016

Zion lang Kithuinaw

¹ Ramkaw te ram roupaw tuh a lungtua cih, laesia ram tuh a lungpaw cih zah karokas haetapaw hawte apaw cih.

² Haetapaw patae apaw cih zah, lungtua hlawsahte a lungpawkhaekuh cih. Lebanon mua hawte a phu-e cih zah, Karmel mua te Sharon bialae hawte sawtuanaw huhan a hoi cih. Ccungccaw miakaw nynh Bawipaw phu-enaw te ah Pachia lesaenaw kha a muih cih hae.

³ Athawzyapaw kuih hae kha thawzung pya oh lah, athyngkuhpaw ccukharu hae kha tynsah oh.

⁴ Rinaw thinlung a hoi hae paw kyakhe, “Nae thawsae sah, rih nan oh! E kya nae Pachia phang um. Nae rhaw hae kha phulaw khylan te detah khylan yn thua cih. Aning nynh yn thua cih zah nanning kha ae khum cih oh,” cite hopah oh.

⁵ Mitmoh hae nynh ngaw a muih cih hae zah, mih nawpan hae paw nynh naw a thae cih hae;

⁶ ccukhou hae nynh sazuh hawte a thohkuh cih hae, byahothya lei hae paw nynh lungtuate hlaw a sah cih hae. Pawccecize ramkaw kya tuidy apou cih zah, laesia ram kya vaw alua cih;

⁷ Phaephae ak lan asopaw laesia tuh tuili lang a tang cih zah, aroupaw laephi tuh tuidy lang a tang cih; suizaw a umthyanaw hmin tuh tuinoh lang a tang cih zah, lonua hae tuh phaeku hae te tuinoh kya apopaw lonua hae lang a tang cih hae.

⁸ Tuin kya laanluepi a um cih zah, Athyaapaw Laanpi cite ko athua cih; athyaa lei hae paw nynh tuh-e laanpi kya cceih lan khyh hae, tuh-e laanpi tuh Pachia ccungccaw hae hanlan athua cih; mingaee nynh heize laanpi vae lan khyh.

⁹ Tuin kya chindeih um lan khyh zah, sarepaw mah cceihthung lan khyh, tuh-e hae tuh tuin kya muih thua lan khyh hae; thuasalama shawkhaw athuapaw ccungccaw hae rou nynh tuh-e laanpi tuh a zui cih hae.

¹⁰ Bawipaw nynh a shawkhaw hae paw tuh a ki cih hae zah, hlawsah biate Zion a thua cih hae; zungzae tynpaw lungtuanaw kha mih lu kya a khungkuh cih hae; lungtuanaw te lungpawnaw kha a mue cih hae zah, ngaethyanaw te hawkhaekunaw tuh azo vae cih.