ISAIAH 31 - Zotung Bible 2016

Izip te Nawccawkheih tuh Alakaw

¹ Bawmnaw ngiaku khylan Izip ram lang a cceihbung hae paw hanlan ngaethya lan kou um! Minmin nynh marang hae kha a doliaku hae, myarya lungpaw marangle hae te myarya thungpaw marang rhawkaw hae kha a doliaku hae, thuasalama Israel Pachia Athyaapaw kha doliakuh khyh hae, Bawipaw kha tuanaw ngiakuh khyh hae.

² Tuhzemah Bawipaw tuh myaryamaw haw zah minmin tungvaw vawsawnaw a thuakhae; aning nynh a bya kha ro leite, hoyleinaw a rae hae paw te ahoy leipaw rya a lah hae paw a bawmtu hae kha rawsete a thonuakuh cih hae.

³ Izip hae tuh Pachia thua khyh hae, ccungccaw nynh thua hae; mih marang hae tuh muisaw thua khyh hae, ngesaw nynh thua hae. Bawipaw nynh a kuih he a dyng te, a bawmtu hae tuh a thy a pawkuh cih hae zah, a bawm hae paw ccungccaw hae kha mah a khuliakuh cih hae, mih balyn mawte a rohkheih cih hae.

⁴ Bawipaw nynh kae yn hopyapaw tuh, A teikupaw saw vawlan a umpaw chindeih khyhze chindeih taraw tuh tuurin hae nynh a o hae zemah, a sia a rua hae paw roi kha rih khyh zah siikuh khyh, tuhawte vaaw Bawipaw tuh Zion Mua vawlan te a mua sangpyng vawlan khe rhawtuk khylan yn rungbung cih.

⁵ Pavaw nynh a taw kha thungkhaw khylan a bu luki a zou bungthung hawte, vaaw Bawipaw nynh Jerusalem kha a thungkhaw cih; Jerusalem kha a thungkhaw cih zah a luesah cih, a haang cih zah a khum cih.

⁶ Pou Israel ccungccaw hae, thawte na la dou oh paw Pachia kalan kithui ccavae oh.

⁷ Tuin nin khe nanning balyn nynh seibupite nae kuih te na la raeku oh paw nae sui zohtuh hae te nae ngun zohtuh hae kha ccaring na vua cih oh.

⁸ “Assiria hae tuh ccungccaw thaloi athua leipaw thaloi khate a khuliakuh cih hae; ccungccaw thaloi athua leipaw thaloi nynh minmin kha a roh cih hae; thaloi kyate a ccue cih hae, mih ccangvae hae kha nangsete ryalawsah athua cih hae.

⁹ Mih siapharan tuh rikawte a ccue cih, a rhawbawi hae tuh siikute mih alan kha heize a ccuetaw cih hae,” cite a maee tuh Zion kya um zah, a maeephupi tuh Jerusalem kya a umpaw Bawipaw nynh a ho.