ISAIAH 3 - Zotung Bible 2016

¹ Atu alesaepaw Bawipaw, vaaw Bawipaw nynh Jerusalem khua te Judah ram kyate bawmnaw te a doliaku hae paw ccungccaw hae kha a lah vae cih— a bawm hae paw sanlou te tui—

² a rawthungpaw te rhawkaw, byapiatu te profeh, a pawepaw te kum tangpaw,

³ rhawbawi te uktu bawi, tuanaw pyatu te mitleihthyapaw, byaho apuakuh hae paw kha a lah cih hae.

⁴ Pise taraw hae kha minmin uktu lang ka nung cih hae zah, nosi hae nynh minmin kha a uk cih hae.

⁵ Ccungccaw hae tuh lu kheit te lu kheit, innpaw lu kheit te lu kheit, vawsaw a pyakuh cih hae; mino nynh piccan kha sawtua lan khyh, ccungccalei hae paw nynh sawtuaruapaw ccungccaw hae kha sawtua lan khyh hae.

⁶ Lukhakheit nynh phin kheit athua hae paw a puizia kha heize a kyngde cih zah, “Nang tuh boeining na hoi; kaening oun cciakhaetu lang oun umpah lah, hynh-e arohpaw apumkuhpaw hynh na uknaw zakaw a um cih,” a cipah cih hae.

⁷ Thuasalama aning nynh, “Kae tuh a raethuitu ka thua kho lan khyh; ka inn kya sanlou um khyh, boeining mah um khyh; ccungccaw cciakhaetu lang yn nung nan oh,” cite siaruate a ho cih.

⁸ Jerusalem tuh a pu vae, Judah tuh a khuliakuh vae, pawccecize mih byaho te mih cyisahnaw nynh Bawipaw kha rawse zah a umnaw aphu-epaw kha a thusah hae.

⁹ Mih maesue nynh minmin kha rawsete ccaekia a khan; Sodom khuaccaaw hae hawte mih seinaw kha pheiku leite a phyku hae. Minmin hanlan ngaethya lan kou um! Pawccecize mimaw tungvaw hoyleinaw kha a thuakhaeku hae.

¹⁰ Miding hae tuh mih lungtua cih cipaw kha miding hae kha hopah hae, pawccecize mih ryalaw mee athae kha a ae cih hae.

¹¹ Ccungccaw hoylei hae paw hanlan ngaethya lan kou um! Hoyleinaw a tung hae paw nynh thua hae, pawccecize a la cyi hae paw kha mih tungvaw kya cyiru athua cih.

¹² Imua hae nynh ka ccungccaw hae kha a tuaa a sah hae, nopi hae nynh minmin kha a uk hae. Pou ka ccungccaw hae, nanning ae cciakhae oh paw nynh nanning kha ae cciakhaesei oh zah na ccianaw oh paw laanpi kha ae ropya oh.

¹³ Bawipaw tuh a byathan kha ho khylan a paccynkuh vae; a ccungccaw hae kha byapia khylan a thadyn vae.

¹⁴ Bawipaw nynh a ccungccaw hae kya-e piccan hae te uktu bawi hae kha byapianaw lungkhu lang a teekhae hae: Nanning nynh misu khokhu kha na lua oh; ryachi hae uccaw na luade oh paw kha nae inn kya a um.

¹⁵ Pawccemou ka ccungccaw hae kha na miade oh zah, ryachi hae mae kha na tude oh? cite Bawipaw vaaw Pachia nynh a ci.

¹⁶ Bawipaw nynh a hopaw tuh: Zion ccanung hae tuh lysakuh hae zah, maemae angthungte a cceih hae, pise hae kha darote phalah do hae zah a ccia vae hae ze byabyate a kaw hae, mih ccu kya a khiiku hae paw khinling taraw kha a ccaesah bia hae.

¹⁷ Bawipaw nynh Zion ccanung hae lu kha a o cih hae, Bawipaw nynh mih ccakaete a nung cih hae zah maethya a law cih hae.

¹⁸ Tuin nin khe Bawipaw nynh ccu kya ccaankunawpaw hae, lu kya voikupaw hae, nging kya oikupaw hae,

¹⁹ si alungmung hae, khawccan hae, mae kya bongkupaw hae;

²⁰ lukhung hae, kuih kya khiikupaw hae, taeccia hae, zimuin bawng hae te mitleih uccaw hae;

²¹ tazeih kuihpu hae te naduhhuing hae;

²² ahoypaw boei hae, angkiccua, poi toonawpaw angki hae te kuihccyng zaw hae;

²³ myarya pahpaw boeining, pavua hae, pungde hae te mae bongkupaw boei hae kha a lawpah cih hae.

²⁴ Zimuin hanpaw athuhpaw, taeccia nebaleihpaw hanpaw tangkaraepaw arui; akhekuhpaw sang nebaleihpaw hanpaw lu-o; ahoypaw boei nebaleihpaw hanpaw buriboei ahuikuhpaw; puithyanaw nebaleihpaw hanpaw maethyanaw athua cih.

²⁵ Na ccungccaw hae tuh thaloi te a khuliakuh cih hae zah, na rhawkaw hae tuh rhawtuknaw kya a khuliakuh cih hae.

²⁶ Khuapi koikua hae tuh mih ngaethah cih zah a rah a khui cih hae; khuapi tuh boeining leite laekhu a haungpaw nopinung hawte athua cih.