ISAIAH 24 - Zotung Bible 2016

Laephi vawlan Bawipaw Byapianaw

¹ Bawipaw nynh laephi kha a roh mamia cih zah daetedae lan a nung cih, a mia bungthung cih zah ccungccaw hae kha phiariphiarae a nung cih hae.

² Tetuh ranpibawi tuh zapi hawte, a bawipaw tuh a seepaw hawte, a bawinung tuh a seenung hawte, a zuatu tuh a retu hawte, a hohsakuhtu tuh a hohtu hawte, laebah a umsahtu tuh laebah a umtu hawte athua cih.

³ Laephi tuh khaleih aroh cih zah khaleih akoi cih; pawccecize e bya hynh Bawipaw nynh phe a ho vae.

⁴ Laephi tuh karae arou, laephipi tuh a thawzya zah arou; vaaw te lae tuh aroh hae.

⁵ Laephi tuh ccungccaw hae keiccuze anungsikuh; pawccecize minmin nynh kawbya kha a ei hae, phungbya kha zui khyh hae, zungzae tynpaw a byakinnaw kha a ro hae.

⁶ Tukeiccuze thyalawnaw nynh laephi kha po laang zah, laephi ccungccaw hae tuh mih cyiseinaw keiccuze a teing hae; tukeiccuze laephi vawlan a um hae paw tuh houhouh zyabung hae zah, ccungccaw beihtaraw kyalya alae hae.

⁷ Misutui tuh rou zah, misu ku tuh a thawzya, mih lungtuanaw balyn tuh ngaethyate a hawkhaekuh hae.

⁸ Tyng taraw hae roi tuh adae vae, lungpawnaw roi mah adae vae, tang-oi roi mah adae vae.

⁹ Hlawsah biate misutui kha neih vae khyh hae; ruithyapaw atui a neihthya hae paw hanlan tuh-e atui tuh akhah vae.

¹⁰ Keisukeilae umpaw khuapi tuh aroh vae, hum nynh sanmah a tee kho khyh ccaw cite inn miakaw kha a khaw hae.

¹¹ Misutui a um khyh keiccuze laanpi kya a sia a rua hae; lungtuanaw balyn tuh azo vae; laephi lungpawnaw tuh azo vae.

¹² Khuapi tuh daetedae vae, koikua hae kha phe roh lan a bua hae.

¹³ Laephi vawlan minphuin hae kya tuhcite acyihkuh cih, oliv ku kha hybia koute aku kya a laehypaw athae hawte athua cih zah, misu thae lo koute aku kya a laehypaw athae hawte athua cih.

¹⁴ Tuh-e a laehy hae paw tuh mih roi a saw cih hae zah, lungtuanaw hlaw a sah cih hae; Niccaw langte Bawipaw lesaenaw kha a siakhae cih hae.

¹⁵ Nithua langkhe Bawipaw kha phu-enaw a pya cih hae, rili kin khe Bawipaw min, Israel Pachia kha a thehoysah cih hae.

¹⁶ Adingpaw Pachia hanlan phu-e thehoysahnaw hlaw a sahpya hae paw kha, laephi adianaw kyate kae thae. Thuasalama ka hanlan ngaehoinaw um khyh, ngaehoinaw um khyh. Myaryamaw ka ngaethah! Pawccecize mih lungzi lei hae paw nynh ming hae tungvaw mih lungzi khyh, mih lungzi lei hae paw nynh ming hae tungvaw papinmaw mih lungzi khyh.

¹⁷ Pou laephi ccungccaw hae, nanning tuh ri lan umpaw, hunghua te kaang kya nynh na um vae oh!

¹⁸ Ri lan umpaw kyate a ccuepaw miakaw tuh hunghua lungkhu lang a ccah cih; hunghua lungkhu te a poupaw miakaw tuh kaang a kae cih. Pawccecize vaawlui thanlan-aw tuh hung thua zah, laephi ccusy tuh ahy.

¹⁹ Laephi tuh pong koi zah, laephi tuh zoihtatae lan akoi, laephi tuh thawmawte ahy.

²⁰ Laephi tuh samaw ruipaw hawte vyavya khuliakuh zah, bu taraw hawte hebung hethung a hekuh; laephi tuh a seinaw nynh rikalae lan phang ne zah, a khuliakuh, bua thokuh vae lan khyh.

²¹ Tuin nin vae tuh Bawipaw nynh vaaw hae kha vaawram khe de a tah cih hae zah, laephi siapharan hae kha laephi vawlan khe de a tah cih hae.

²² Minmin tuh thongccah hae hawte, hunghua lungkhu khe pynkheihlan suelua athua cih hae; minmin kha thong lungkhu khe khawsung athua cih hae zah, kum patae aro koute detahnaw a ing cih hae.

²³ Tetuh sawpaw tuh a maesue aroh cih zah, khuanin tuh a maethah cih; pawccecize vaaw Bawipaw nynh Zion Mua vawlan te Jerusalem khua kyakhe a uk cih zah, a phu-enaw tuh a piccan hae malang khe a langsakuh cih.