ISAIAH 2 - Zotung Bible 2016

Malang Ccyh e Pachia Inn

¹ Amoz ccapaw Isaiah nynh Judah te Jerusalem konglang a thaepaw Pachia bya tuh:

² Malang ccyh vae tuh Bawipaw inn a umnaw mua hynh mua hae kyaze ahang huaccepaw hawte atyn cih zah, mua taraw hae luki lang hangthung athua cih; minphuin balyn nynh tuh-e mua langkhe a cceih cih hae.

³ Ccungccaw patae nynh oun thua cih hae zah, “Rang oh, Bawipaw mua, Jakob Pachia inn lang cceihthung oh sih; a laanpi kha oun ccangpah cih zah, aening nynh amaw ccunoh kha ah zui cih oh,” cite oun ho cih hae. Pawccecize Zion kyate ccangpyanaw yn pou cih zah, Jerusalem kyate Bawipaw bya yn langkuh cih.

⁴ Bawipaw nynh minphuin hae kha bya oun pia cih hae zah, ccungccaw patae kha oun hopia cih hae; mih zunghe hae kha tamuin lang oun suhkuh cih hae zah, mih ccoi hae kha tangpaw lang oun suhkuh cih hae; minphuin ccangkheit te ccangkheit rhawtukkuh vae lan khyh hae, rhawtukkunaw kha mah ccangkuh vae lan khyh hae.

Lungkhungnaw tungvaw Byapianaw

⁵ Pou Jakob ciihan hae, rang oh, Bawipaw awnaw kyakhe cceih oh sih!

⁶ Pachia, nang nynh na ccungccaw Jakob ciihan hae kha na vua vae hae. Minmin tuh nithua lang e naawthyanaw te thuasah, Filistin hae hawte beidin dothyanaw te thuasah phe beih hae zah, ramccang hae phung kha a zuibua hae.

⁷ Mih ram tuh sui te ngun te phe beih zah, mih sisua tuh thang kho khyh; mih ram tuh marang te phe beih zah, marangle hae tuh riatae um khyh.

⁸ Mih ram tuh zohtuh hae te phe abeih; mih kuih nynh a raepaw, mimaw kuihdung ccaccei nynh a raepaw kha a beik hae.

⁹ Tukeiccuze ccungccaw hae tuh nyaasah bung thua hae zah, mih balyn mawte nesah bung athua hae, minmin kha ngaethya nan hae!

¹⁰ Bawipaw thinrianaw, a lesaenaw te a phu-enaw keiccuze lungpi lungkhu lang tee lah, laenoi kya reku tua.

¹¹ Tuin nin kya tuh ccungccaw hae kya-e lysakunaw mit kha nesah bung athua cih zah, mih lysakunaw kha nyaasah athua cih; Bawipaw lu kheit kyalya kha hangthung athua cih.

¹² Tuin nin khe vaaw Bawipaw nynh a lysakuhpaw balyn, a tansakuhpaw balyn te a hangsakuhpaw balyn kha a nyaasah cih hae;

¹³ Lebanon e ahangpaw sidar thing balyn te Bashan ram e phaesi thing balyn kha a nge cih hae.

¹⁴ Ahangpaw mua hae te sangpyng hae kha thuasah,

¹⁵ rhawviainn hae balyn te khua a koihlupaw rhawlungrua hae balyn kha thuasah a ting cih hae zah a bialaesah cih hae.

¹⁶ Tarshish ccingbaw te kuih te raepaw apuithyapaw balyn kha a roh cih hae.

¹⁷ Ccungccaw hae lysakunaw kha a zosah cih zah, a tansakunaw hae balyn kha a roh cih; tuin nin khe Bawipaw kyalya kha hangthung athua cih.

¹⁸ Zohtuh hae tuh a zo cih hae.

¹⁹ Bawipaw nynh laephi kha bungzousah khylan he yn thokuh te, Bawipaw rawrinaw, a lesaenaw te a phu-enaw keiccuze lungkarung lungkhu lang te laekarung lungkhu lang tee oh.

²⁰ Tuin nin vae tuh ccungccaw hae nynh beik lan a la raeku hae paw sui zohtuh hae te ngun zohtuh hae kha theihmung hae te balaw hae kalan khe oun vuapah cih hae.

²¹ Bawipaw nynh laephi kha bungzousah khylan he yn thokuh te, Bawipaw rawrinaw, a lesaenaw te a phu-enaw keiccuze lungkarung hae te laekarung hae kya tee khylan khahcite oun rekuh cih hae.

²² Mih naduh kya hy kyalya a hoi hae paw ccungccaw hae kha ngaehoikuh nan oh, minmin kha pawlangria lan a um hae zawtou?