ISAIAH 16 - Zotung Bible 2016

¹ Ram uktu kalan tuutaw hae kha ky oh; laesia ram a umpaw Sela khua kyate Zion ccanung mua langkhe mah ky oh.

² A bu kyate zousahpaw pavaw taw hawte, Moab ccanung hae tuh Arnon vaw zuanaw vaw kin khe a um hae.

³ “Tuanaw yn pyatua oh, ahmete bya yn pia oh; ninthu khuaninso kyakhe khuazi hawte nae mynlyh kha yn raepah oh; a dee hae paw ccungccaw hae kha thuruh oh, a ccue hae paw kha langsakuh nan oh;

⁴ Moab ram kyate a dee hae paw kha nae kya umsah bua oh; rohtu hae kyate minmin kha thungkhaw oh,” a cipya hae. Tuaasahtu um vae leite, ronaw tuh dae vae zah, ram kyate syrotu hae he adae tetuh,

⁵ David bu kyakhe atynpaw sungsakunaw te bawitungkhung kha tynsah athua cih, ahmepaw kha arangte cyih zah byading a ccungpaw uktupaw tuh lungzinaw te phe beih zah tuh-e bawitungkhung vawlan khe a haung cih.

⁶ Moab nynh a lysakunaw kha phe kae thae vae, aning tuh myaryamaw a lysakuh! Lysakunaw, tansakunaw te rysawthyanaw hoi zah, accakaepaw pookunaw bya kha a ho.

⁷ Tukeiccuze Moab hae tuh rah hae sah, milu takyhte Moab ram hanlan rah hae sah. Vawsaw a tung raria hae paw, rawkhuite um oh, Kir-hareseth khua kya-e misu thae aroupaw kha liathuite rah oh.

⁸ Heshbon khua e loo hae te Sibmah khua e misu ku hae tuh a nyaabung vae hae, vaekheih lyaze tuh-e misu ange hae nynh minphuin uktu bawi hae kha a la ruisah hae, tuh lyaze tuh-e ange hae tuh Jazer khua cia phe la phah zah, ramkaw lang cia phe la thua; misu ku atoih thawpaw hae tuh po lo zah rili khuraw lang phe la thua.

⁹ Tukeiccuze Jazer khua hanlan ka raw hawte Sibmah khua e misu ku hae hanlan ka rah; Pou Heshbon khua te Elealeh khua, nanning kha ka mitphi te kae ciasah cih oh; pawccecize na thingthae rue lya te na ccathae rue lya-e lungtua siaruanaw tuh zya adae vae.

¹⁰ Thingthae athaenaw loo kyate lungtuanaw te lungpawnaw kha phe zo vae; misu khokhu kya hlawsah vae khyh hae, lungtua siaruanaw mah um vae khyh; misu thae nonnaw kya athae a nontu mah non vae khyh; misu thae lo ccyh lya-e siaruanaw mah zya dae vae.

¹¹ Tukeiccuze ka bung tuh Moab hanlan, ka vue ka ring tuh Kir-heres hanlan, tintang hawte accae.

¹² Moab nynh ahangnaw hmin kya amaw toulou kha a thawbangsakuh zah, a beikinnthyaa kalan sawsang lan a ccia zemah a laan a sui ua lan khyh.

¹³ E bya hynh Bawipaw nynh Moab konglang a la hopaw bya nynh thua.

¹⁴ Te atu Bawipaw nynh, “Vaeluatu riapyanawpaw kum thyhte, kum thum lungkhu Moab phu-enaw tuh a ccungccaw hae patae ryte theihrya athua cih; a hiinhypaw myarya azya cih zah mih thawzya cih,” a ci.