ISAIAH 15 - Zotung Bible 2016

Moab Konglang Hotypaw Bya

¹ Moab konglang hotypaw bya tuh: Ar khua tuh zi kheit lungkhu aro keiccuze Moab ram tuh aroh; Kir khua tuh zi kheit lungkhu aro keiccuze Moab ram tuh aroh.

² Dibon khuaccaaw hae tuh hminthyaa kya raw khylan ahangnaw hmin lang a kae hae; Moab hae tuh Nebo khua te Medeba khua khe a rah hae. Mih lu kha okuh hae zah, mih khawming kha phe thyaa lan a ngoku hae;

³ laanpi khe buriboei kha zingkute, innccukaly kya te laanluepi kyakhe ccungccaw miakaw rah hae zah mih mitphi alua.

⁴ Heshbon khua te Elealeh khua tuh rah hae zah, mih rawnaw roi tuh Jahaz khua cia accae; tukeiccuze Moab rhawkaw hae tuh rawthyate a thyngkuh hae.

⁵ Moab hanlan ka thinlung myarya ccih; a ccungccaw hae tuh Zoar khua te Eglath-shelishiyah khua lang a ccue hae. Luhith kaethung khe raw biate a kae hae; Horonaim lang cceihpaw laanpi khe ronaw roi a saw hae;

⁶ Nimrim vaw tuh kan zah, lonua tuh arou, apo thawpaw lonua mah a chih, hinlalyhpaw aku kukheit sanmah um vae khyh.

⁷ Tukeiccuze minmin nynh a hoi hae paw uccaw patae te a ccakhungku hae paw uccaw hae kha Su ku Accya langkhe a ccyngku hae.

⁸ Pawccecize Moab ram pepan kya rawnaw roi accae; rawkhuinaw roi tuh Eglaim khua te Beerelim khua cia accae.

⁹ Pawccecize Dibon khua e tui tuh chiise te phe abeih; tuhzemah Dibon khua langkhe tuh-e laeze aru huapaw vawsawnaw kha ka thuasah cih zah, lue khylan a ccue hae paw Moab hae hanlan te tuin ram kya a laehy hae paw hanlan chindeih kha ka thuasah ung cih.