ISAIAH 14 - Zotung Bible 2016

Judah Kithuinaw

¹ Bawipaw nynh Jakob kha ngaethya a umsah cih zah Israel kha bua a po cih, te minmin kha mimaw ram kya a umsah cih hae; ramccang hae nynh minmin ryte a mungkuh cih hae zah Jakob ciihan te a umkheih cih hae.

² Minphuin hae nynh minmin kha mimaw umnaw kalan a cciakhae cih hae, te Israel ciihan hae nynh Bawipaw ram kyakhe ramccang hae kha seenung te seepaw lang a hoi cih hae; minmin a la kyngtu hae kha a kyng cih hae zah, minmin a la tuaasahtu hae kha a uk cih hae.

Babilon Siapharan Shungnaw

³ Bawipaw nynh nanning kha ccinaw, teingnaw te nangsekute nawkupaw ryalaw rupaw kyate haeungnaw he ae pya oh te,

⁴ Babilon siapharan kha hynhte na sarya cih oh: Yn tuaa yn sahtupaw tuh phe chih vae hynhsa! A puathonaw tuh phe adae vae hynhsa!

⁵ Bawipaw nynh ccungccaw hoylei hae paw kya-e hoitang kha a khyapya vae,

⁶ ccungccaw hae kha thindynte, apaekuh lei lan thung hae zah, ram hae kha tuaasahnawte thindynte a uk hae paw kya-e ccoi kha a khyapya vae hae.

⁷ Tetuh laephi pynpi tuh daenaw te ngaengannaw te um zah, lungtuate hlaw a sah hae.

⁸ Lebanon ram e maeccaw ku hae te sidar ku hae tuh mih lungtua zah, “Nang tuh na khuliakuh vae zah, kaening kha nge khylan hum sanmah yn thua vae khyh,” a ci hae.

⁹ Nang he nae thua vae ze, nang te tungku khylan akawlan e michi khua tuh a paccynkuh; nang kha cciadue khylan michi hae te laephi cciakhaetu hae balyn kha a thosah hae; ram hae kya-e siapharan hae balyn kha mih bawitungkhung kyate a thosahku hae.

¹⁰ Mih balynte nang kha ae hopah cih hae zah: “Nang mah kaening hawte na thawzyabua vae! Kaening hawte na thuabua vae!” ae cipah cih hae.

¹¹ Na lesaenaw te na tintang hae roi tuh michi khua lang sawbung athua vae; zanpaw vawlan na ih zah, na thykupaw boei mah tangkaria nynh thua.

¹² Pou awkhua ccapaw, Nizy Awsi, nang tuh vaawlui kyate na ccah vae! minphuin hae kha a la taepaw nang tuh laephi kya khuliasaku na thua vae!

¹³ Na thinlung kyakhe nang nynh, “Vaawlang ka kae cih; ka bawitungkhung hynh Pachia awsi hae luki lang ka hangthung cih; palung lang e a pumkunaw hae mua vawlan khe ka haung cih;

¹⁴ maeking dung lang ka kaethung cih zah, Ahang Huaccepaw hawte ka um cih,” na ciku.

¹⁵ Thuasalama nang tuh Hunghua akhunaw lang, Michi khua lang sawbung na thua vae.

¹⁶ Nang ae muih hae paw nynh nang kha riri dote na konglang a tua cih hae zah: “E ccungccapaw hynh laephi a thyngsakuhpaw, ram hae kha a siisakuh hae paw athua tou?

¹⁷ Laephi kha laesia ram lang tangsah zah, khuapi hae a rohtupaw, amaw nynh thong a saw hae paw kha mih inn lang a kisah lei hae paw athua tou?” cite a ho cih hae.

¹⁸ Laephi vaw e siapharan balyn tuh alypaw mih shaw raveih kya a ih hae;

¹⁹ thuasalama nang tuh anungsikuhpaw sathuhpaw hawte na shawku te asawkunaw langkhe ccaring ae vua hae; michi rhua te thuasah, thaloi te thuingpaw michi khate thuasah, Hunghua lungkhu e lung vawlan a ccahpaw michi khate thuasah nang kha bong na thua zah, ccu te sydepaw michi rhua hawte nynh na thua.

²⁰ Ming hae ryte uukheih na thua lan khyh, pawccecize na ram kha na roh zah, na ccungccaw hae kha na chia vae hae. Hoyleinaw a rae hae paw ciihan hae mih min tuh papinmaw um nan vae sah!

²¹ Mih minpaaw hae seinaw keiccuze siapharan ccapaw hae chianaw kha paccyn oh. Minmin nynh laephi uk khylan te laephipi kya khuapi raeku khylan kha papinmaw thokuh nan vae hae sah.

²² Vaaw Bawipaw nynh a hopaw tuh, minmin kha ka thonuakuh cih hae zah, Babilon min te a laehy hae paw kha thuasah, ciihan te ccaawno hae kha thuasah ka roh cih hae cite Bawipaw nynh a ci.

²³ Babilon kha sazi umnaw, tui a ynku nawlan ka rae cih, ronaw innphi te ka phi cih, cite vaaw Bawipaw nynh a ci.

Assiria Konglang Hotypaw Bya

²⁴ Vaaw Bawipaw nynh byakinkute a hopaw tuh: Khua ka khan thyhte acyihkuh cih; ka paccyn thyhte cyi athua cih:

²⁵ Ka ram kyakhe Assiria hae kha ka theih cih hae zah, ka mua vawlan khe ccu te ka syde cih hae; Assiria hae kya-e puihnawpaw ccong tuh ka ccungccaw hae kyate vua athua cih zah, Assiria kya-e phupaw aripaw kha ka ccungccaw hae raw kyate khah athua cih.

²⁶ E hynh laephi pynpi te asekuh lante a paccynpaw nynh thua; e hynh minphuin balyn tungvaw a dyngpaw a kuih nynh thua.

²⁷ Vaaw Bawipaw nynh a paccyn vae paw kha hum nynh mou a roh kho cih? A dyngpaw a kuih kha hum nynh mou a khingsah kho cih?

Filistin Konglang Hotynaw

²⁸ Ahaz Siapharan a chi kum khe e bya hynh a hoty:

²⁹ Pou Filistin hae balyn, nanning buanawpaw ccungngue akhya keiccuze nae lungtua nan sah, khah-e hupaw phin kyate huparepaw yn langkuh cih, tuh-e huparepaw a taw tuh azouthyapaw hupaw, maeesoi tahawpaw athua cih.

³⁰ Ryachi hae lakuze a ryachihua hae paw tuh a ae cih hae, ahobou hae paw tuh khyndadyh lan a ih cih hae; thuasalama na ciihan hae tuh ccakannaw te ka chisah cih hae, na kya-e a laehy hae paw kha ka theih cih hae.

³¹ Pou koikua, rawtua; Pou khuapi, rawte siaruatua; Pou Filistin, nae balynte rawrite um oh! Pawccecize thahlang te maeekhuh yn pou zah, tuh-e aphu kyatuin a rawthahpaw lu kheit san um khyh.

³² Filistin ram kyate oun thua hae paw locceihtu hae kha pawtemou byakhung lan hae? “Bawipaw nynh Zion khua kha a rae vae, a ccungccaw hae kyaze a ryachi hae paw nynh tuh-e khua kya khynnaw a muihkuh cih hae,” cite byakhung lan hae.