ISAIAH 13 - Zotung Bible 2016

Babilon kha Rawsete Honaw

¹ Babilon te asekuh lante Amoz ccapaw Isaiah nynh Pachia kyate yn thuapaw a thaepaw bya tuh hynhte nynh thua.

² Mua otung vawlan khe rhawtuknaw alan kha sae oh lah, thawte sia oh; apuathopaw khuapi koikua lungkhu lang tee khylan nae kuih kha hepah oh.

³ Ka thyaasahpaw ccungccaw hae kha kamaw ccaccei nynh kaw ka pya vae hae, ka thinrianaw kha daesah khylan ka lesaenaw liate mih lungtuapaw ka rhawkaw hae kha ka pum vae hae.

⁴ Ccungccaw patae roi hawte, mua vawlan e ngaluin-ngaluin ccaepaw roi tuh ngaetua oh! Peenaw ram hae te pynkheihlan a sueluakuh hae paw minphuin hae roi tuh ngaetua oh! Vaaw Bawipaw nynh rhawtuknaw hanlan rhawkaw hae kha a paccynsaku hae.

⁵ Bawipaw amaw ryte a thinrianaw zunghe hae tuh ram pynpi kha ro khylan asawnaw ram, vaawlui adianaw kyate oun thua hae.

⁶ Bawipaw nin anae vae keiccuze rawkhuite um oh; Athunghuapaw kyate yn thuapaw ronaw hawte nynh yn thua cih.

⁷ Tukeiccuze ccungccaw kuih balyn tuh a thawzya cih zah, ccungccaw miakaw lungthangte a rih cih hae.

⁸ Teingnaw te riathaenaw a tung cih hae; neitangia a ccihpaw nopi hawte a teing cih hae. Lu kheit te lu kheit rikute a dokuh cih hae zah, mih maesue tuh maeesoi hawte athua cih.

⁹ Laephi kha ro khylan te misei hae kha laephi kyate maemih khylan, thawccikunaw a um leipaw Bawipaw nin tuh thinria bungpaw te yn thua cih.

¹⁰ Vaawlang awsi hae te aphuphute um hae paw awsi hae tuh aw vae lan khyh hae; khuanin tuh he a thua vae ze amoh cih zah, sawpaw mah aw vae lan khyh.

¹¹ Laephipi kha a seinaw keiccu de ka tah cih zah, ccungccaw hoylei hae paw kha mih hoyleinaw hanlan de ka tah cih; a lysakuhpaw kya-e lysakunaw kha ka zosah cih zah, a puatho hae paw te rysawthah hae paw kha ka biabung cih hae.

¹² Ccungccaw kha sui hoypaw laeze ka khinsah hua cih zah, Ofir sui laeze akhinpaw lang ka rae cih.

¹³ Tukeiccuze vaaw Bawipaw tuh myarya a thinria nin khe, vaawlui kha ka hysah cih zah, laephi kha a umnaw kyate ka nuesakuh cih.

¹⁴ Sawdepaw kyate a ccuepaw sakhi hawte thuasah, a rintu um leipaw tuu hae hawte thuasah mimaw minphuin hae kalan a hawi cih hae zah, mimaw ram lang a ccue cih hae.

¹⁵ Muihpaw ccungccaw miakaw kha thaloi te thuing athua cih zah, kyngpaw ccungccaw miakaw tuh thaloi te a chih cih.

¹⁶ Mih ccaaw hae kha mih muihnaw kyakhe palae tui lan a noidepah cih hae; mih inn kha a luade cih hae zah, mih zu hae kha kyngdete a ikhaepah cih hae.

¹⁷ Dotua oh, Babilon hae kha dou khylan ngun pawlangria lei hae paw te sui a ry lei hae paw Media ccungccaw hae kha ka tuhou cih hae.

¹⁸ Mih the hae nynh ccangvae hae kha a theih cih hae; nosi hae tungvaw thawccinaw hoi lan khyh hae; mih mit nynh imua hae kha ngaethyaumsah lan khyh.

¹⁹ Ram hae kyaze a puithya huapaw thua zah, Babilon hae kya-e huhan te lunglekhaekuh lan umpaw Babilon tuh Pachia nynh a ro hae paw Sodom te Gomorrah hawte athua cih.

²⁰ Babilon tuh ccungccaw nynh kharouh a umnaw leipaw, she takyh a umnaw lei vae hae paw athua cih; Arab hae nynh tuin kya bu kha sakkuh lan khyh hae, tuurin hae nynh mih tuuphu hae kha tuin kya tuukhia raepah lan khyh hae.

²¹ Tuin kyakhe loramsaw hae nynh a um cih hae, mih inn tuh asiathyapaw ahysuepaw hae te phe abeih cih; kalauh pavaw hae tuh tuin kya a um cih hae zah, sathaw hae tuh tuin kya a law cih hae.

²² Ram-ui hae tuh rhawviainn kya a sia cih hae zah, suizaw hae tuh um ry a umnaw siapharan hae inn kya a sia cih hae; Babilon ccyh tuh myarya nae vae zah, a she sae vae lan khyh.