ISAIAH 10 - Zotung Bible 2016

^1-2 A hobou hae paw kha ahme lei lante byapia khylan thuasah, ka ccungccaw hae laku e ryachi hae nynh mue lan accanpaw kha luade khylan thuasah, nomae hae te ngawraw hae uccaw kha luade khylan thuasah ahme leipaw byapianaw a rae hae paw, tuaasahkunawpaw phungbya a zeitu hae nanning hanlan ngaethya lan kou um!

³ Detah nin kya thuasah, asawnaw langte yn thua cih paw shethya ccyh kya thuasah nanning nynh pawmou na cyih cih oh? Bawmnaw mue khylan hum kalan mou na ccue cih oh? Nae sisua kha teimou na cciataw cih oh?

⁴ Rhawtukkunaw kya na chih cih oh, athua khyhze thongccah hae paw hawte ccaring ae sue cih oh. Tuinte mah a thinrianaw tuh daelae khyh zah, a kuih kha po a dyng ung.

Assiria kha A Mang

⁵ Ka thin yn riasah hae paw kha detah nawlan ccungngue lang ka mangpaw Assiria hae hanlan ngaethya lan kou um, mih kuih kya umpaw tungbang tuh ka thinrianaw kya ka mangpaw nynh thua!

⁶ Pachia pawlangria leipaw minphuin kalan khe Assiria kha ka sawnua, ka thin yn riasahpaw ccungccaw hae kha luade lan, kyngde lan te, laanpi e tuiccua hawte syde lan, Assiaria kha kaw ka pya vae.

⁷ Thuasalama e hynh aning nynh a paccynpaw thua khyh, a thinlung kya a nungpaw mah thua khyh; ro rynaw te minphuin patae syro rynaw kha a thinlung kya a um.

⁸ Aning nynh, “Ka rhawbawi hae tuh mih balynte siapharan hae khaw athua hae?

⁹ Kalno khua tuh Karkhemish khua hawte khaw athua? Hamath khua tuh Arpad khua hawte khaw athua? Samaria khua tuh Damaskas khua hawte khaw athua?

¹⁰ Jerusalem te Samaria laeze zohtuh alunghua a hoipaw peenaw hae kha detah khylan ka kuih ka dyngnua hae hawte thuasah,

¹¹ Samaria te a zohtuh hae kya ka cyi hawte thuasah, Jerusalem te a zohtuh hae kyakhe ka cyih lan khyh tou?” a ci.

¹² Thuasalama Bawipaw nynh Zion Mua te Jerusalem kya a ryalaw he a thangsah te, Assiria siapharan a pookunaw te a lysakunaw kha de a tah cih.

¹³ Assiria siapharan nynh, “Ka thawzung te e hynh ka cyi vae, ka hawnaw te ka thaethya vae; ccungccaw hae ramri kha ka nuepah hae zah, mih sisua kha ka luade vae hae; bawitungkhung kya a haung hae paw kha tangnuapaw hawte ka suebung cih hae.

¹⁴ Pavaw bu kha muih hawte ka kuih nynh ccungccaw hae sisua kha a muih vae; vuapaw pavaw tui hae kha suelua hawte laephi pynpi kha ka suelua vae; a sake yn bianua nganpaw, a khalang yn awnua nganpaw, yn sianua nganpaw lu kheit san um khyh,” a ci.

¹⁵ Hae nynh a mangtupaw laeze ka lehua cite a ho kho tou? Thing-aw nynh a awnahpaw ccungccaw laeze abyapi huapaw lang a riakuh tou? Ccungngue nynh amaw a hangtupaw laeze a hangsakuh cih tou? Hoitang nynh amaw a hangthungtupaw kha a hangthung cih tou?

¹⁶ Tukeiccuze Alesaepaw, vaaw Bawipaw nynh tuh-e siapharan kya-e athawsaepaw rhawkaw hae laku khe ngethyasahnawpaw ccinaw kha a saw cih; a phu-enaw kyakhe maee aruapaw hawte a ruasah cih.

¹⁷ Israel awnaw tuh maee lang a tang cih, a kya-e Athyaapaw Pachia tuh maeesoi lang a tang cih zah, hinpaw hae te thabu hae kha nin kheit lungkhu marya a u cih.

¹⁸ Tuhpi phu-enaw te athae umpaw loo phu-enaw kha thuasah, pyn te muisaw kha parouh mawte thuasah Bawipaw nynh a roh cih zah, ccinaw nynh ccungccaw a ro hawkhate a roh cih.

¹⁹ Tuhpi kya-e alaepaw thingku hae tuh imua nynh ria kho lan ciate myarya azya vae cih.

A Ngaesikuhpaw Israel hae Beihtaraw

²⁰ Tuin nin vae tuh a laehypaw Israel hae te ahiinhypaw Jakob ciihan hae nynh minmin a la rohtu hae kha doliaku vae leite, Bawipaw , Israel Pachia Athyaapaw kha thanccingte a doliakuh vae cih hae.

²¹ A laehypaw Jakob ciihan hae tuh athungpaw Pachia kalan a kithui cih hae.

²² Pou Israel, na ccungccaw Israel hae tuh rili kya-e laesia zeih cih hae salamah a laehy hae paw rou nynh a kithui cih hae. Khah-e ccungccaw hae nynh dingrarih lan byapianaw te phe beihpaw athangnaw kha a tung ccaccing cih hae.

²³ Vaaw Bawipaw PACHIA nynh a ho vae thyhte laephi pynpi kya ronaw a thuakhae cih.

²⁴ Tukeiccuze vaaw Bawipaw PACHIA nynh hynhte a ho: Zion kya um hae paw, pou ka ccungccaw hae, Izip hae nynh ae la cyi oh hawte, Assiria hae nynh ccungngue te ae bua oh zah, mih hoitang kha ae hangnua oh ze, minmin kha rih nan oh.

²⁵ Sosoh aro te nae tungvaw ka thinrianaw tuh adae cih zah, ka thinrianaw khate minmin kha ka roh cih hae.

²⁶ Vaaw Bawipaw nynh Oreb lungpi kya Midian hae kha rhaw a tuk hae hawte, minmin kha a ccungngue te a bua cih hae; a hoitang tuh rili vawlan a hang cih zah, Izip ram kya a la cyi hawte hoitang kha a hangthung cih.

²⁷ Tuin nin khe Assiria hae kya-e phupaw ripaw kha na raw kyate lawpya athua cih zah, mih puihnawpaw ccong kha na nging kyakhate khyapya athua cih. Ngesaw thonaw liate nanrui kha pae athua cih.

²⁸ Rhaw hae tuh Aiath khua kya a thua vae hae, Migron khua kha po a lue vae hae, mih uccaw kha Mikmash khua kya a nungku hae;

²⁹ mua hae laku po cceih hae zah, Geba khe a rya hae; Ramah khuaccaaw hae tuh a thyngkuh vae hae, Saul siapharan khua Gibeah khuaccaaw hae tuh a ccue vae hae.

³⁰ Pou Gallim khuaccaaw hae, siatua oh! Pou Laishah khuaccaaw hae, ngaetua oh! Pou Anathoth khuaccaaw hae, Gallim khuaccaaw hae nynh a sia hae paw kha khungru tua oh!

³¹ Madmenah khuaccaaw hae tuh a nuekuh hae, Gebim khuaccaaw hae tuh khyn khylan a ccue hae.

³² Rhaw hae tuh atunin ccaccei khe Nob khua kya um hae zah, Zion ccanung Mua, Jerusalem khua kha mih kuihlung a lungnua hae.

³³ Alesaepaw, vaaw Bawipaw nynh ri lan umpaw huhan khate thingkaran bae hawte a bae cih hae; ahang huaccepaw thingku hae kha a nge cih hae zah, ahang hae paw kha akaw a sangsah cih hae.

³⁴ Tuhpi kya-e thingku hae kha hae te a nge cih hae, Lebanon mua tuh a thing hoypaw hae rykhate a pu cih.