ISAIAH 1 - Zotung Bible 2016

¹ Amoz ccapaw Isaiah nynh Judah te Jerusalem kong te asekuhte Judah siapharan hae Uzziah, Jotham, Ahaz te Hezekiah she lya a muihpaw vizin tuh.

Judah A Hoyleinaw

² Pou vaawlui, thaetua, pou laephi, ngaetua; pawccecize Bawipaw nynh a hopaw tuh: ka kua hae paw te ka do-oih hae paw ccaaw hae nynh kae kha yn dou vae hae.

³ Vaetua nynh a hoitupaw kha nyh zah, lann nynh mah a bawipaw nynh looh a pyanawpaw kua kha a ny; thuasalama Israel hae nynh kae kha yn nyh khyh hae, ka ccungccaw hae nynh nyhthya khyh hae.

⁴ A seipaw minphuin, hoyleinaw te phe abeihpaw ccungccaw hae, hoyleinaw a raepaw ciihan, ozia athahpaw ccaaw hae, Bawipaw kha na vua vae oh, Israel Pachia Athyaapaw kha na theihrya oh zah, nulang na sangsah vae oh.

⁵ Pawccemou detahkunaw kha na ccungku ung oh? Pawccemou palei na dou ung oh? Nae lu balyn tuh vaemaw te phe beih zah, nae thinlung balyn tuh a thawzya.

⁶ Nae ccukaw te nae lu kyacia dannaw um khyh, aduinpaw te vaemaw te anae aluapaw vaemaw kha nynh a um; mih vaemaw hae kha singpya, heepya, chitui te thuhpya thua khyh hae.

⁷ Nae ram tuh ccungccaw um vae khyh, nae khuapi hae tuh maee nynh a u; na muihnaw oh ccaccei khe minphuin ccangpaw hae nynh nae ram kha a ro hae; ramccang hae nynh phe a ro vae hae paw hawte, ccungccaw um vae khyh.

⁸ Misu khokhu kya umpaw buhang hawte thuasah, zinae loo kya umpaw bu hawte thuasah, rhaw hae nynh a koihlu hae paw khuapi hawte thuasah Zion ccanung kyalya nynh a laehy vae.

⁹ Vaaw Bawipaw nynh aening elang ciihan beihtaraw san oun la haangpya khyh ze, aening tuh Sodom khua hawte ah thua cih oh zah, Gomorrah khua te ah lokuh vae cih oh.

¹⁰ Sodom khua a uktu hae nanning, Bawipaw bya kha thae oh! Gomorrah khua e ccungccaw hae nanning, ah Pachia kya-e ccangpyanaw kha ngae oh!

¹¹ Bawipaw nynh, “Ka kalan na rae oh paw silawnaw patae hynh a ry cih cite tou na tua oh? Maee-ute silawnaw na raenaw oh paw tuu hae te looh na dang oh paw sahiin hae tho khate phe ka byn vae; vaetua chii, tuutaw chii te miaa chii kha ka ry khyh.

¹² Nanning nynh ka malang langku khylan he nae ccia vae oh ze, hum nynh mou e hynh ae ngia oh? ka voidu kha syde nan vae oh;

¹³ nae ccyngpah oh zah nae pya oh paw hynh accakaepaw nynh thua; nae pya oh paw amynkhuhpaw hynh ka hanlan anungsikuh. Sawpaw sah thawpaw poi, sabbath te zapi pumkunaw— hoyleinaw te apykuhpaw beiknaw pumkunaw hae kha ka ngaesang kho khyh.

¹⁴ Nae sawpaw sah thawpaw poi hae te nae poi hae kha ka hua; khah-e hae tuh ka hanlan phupaw ripaw lang tang zah ka phunaw phe ka bang.

¹⁵ Nae kuih he na dyng vae oh ze, ka mit kha ccanglang kae hawitaw cih oh; patae saw na sang oh zemah kae ngaepah lan khyh oh; nae kuih tuh chiise te phe abeih.

¹⁶ Naemaw te naemaw singkuh oh; naemaw te naemaw thyaasakuh oh; na cyi oh paw hoyleinaw kha ka mit nynh a muihnaw kyate vua oh; hoyleinaw kha rae nan vae oh,

¹⁷ hoynaw rae kha ccangkuh oh lah, dingnaw kha ccung oh, tuaasahkunaw a teing hae paw kha khum oh, ngawraw hae kha thungkhaw oh, nomae hae kha pankhaw oh,” a ci.

¹⁸ Bawipaw nynh hynhte a ho: atu rang oh lah, hoyte tua kalang oh sih: Nae seinaw tuh sekakin lan se salamah, vuiraw hawte araw cih; sephaphuh lan se salamah tuuming hawte athua cih.

¹⁹ Nanning nynh lungthote kaw na ngae oh zetuh ram kyate apoupaw uccaw hoypaw kha na ae cih oh;

²⁰ thuasalama nanning nynh kaw-eite nae dou oh zetuh, thaloi rhaw te na chih cih oh; pawccecize Bawipaw nynh a ho vae.

Aseipaw Khuapi

²¹ A lungzipaw khuapi nynh pawtemou ohhuanung lang phe a tang! Aning tuh byading te phe beih zah a lungkhu kya dingnaw a um, thuasalama atu vae tuh ccungccaw theihtu hae nynh a um vae hae!

²² Na ngunphua hae tuh athupaw lang tang vae zah na misutui tuh tui te phe pykuh vae.

²³ Na bawi hae tuh rhawthotu hae te miruh hae ruiban nynh thua hae. Mih balyn mawte pyaruh kha ry hae zah lasung kha a ae hae. Ngawraw hae kha thungkhaw khyh hae zah, nomae hae byathan kha ngaepah khyh hae.

²⁴ Tukeiccuze alesaepaw Bawipaw, vaaw Bawipaw , Athungpaw Israel Pachia nynh a hopaw tuh: ka rhaw hae tungvaw kya ka thinrianaw kha ka ccawsah cih zah, kamaw ccaccei nynh ka rhaw hae kha ka liaru cih hae!

²⁵ Ka kuih kae hangnua vae cih; sivaw kha tuisahte a thyaasah hae hawte kae thyaasah cih zah, na kya-e sivawthuhpaw balyn kha ka vua cih.

²⁶ Langmawlya kae nungpya hawte, byapiatu hae te tuanaw pyatu hae kha kae nungpah thui cih. Tetuh nang kha dingnaw khuapi, a lungzipaw khuapi cite ae ko cih hae.

²⁷ Zion khuapi kha byading liate shawkhaw athua cih zah, a ngaesikuh hae paw khuapi lungkhu e ccungccaw hae kha dingnaw liate shawkhaw athua cih hae.

²⁸ Thuasalama misei hae te amaw a doutu hae kha tuh pynkheihlan ro athua cih hae, Bawipaw a vua hae paw kha maemih athua cih hae.

²⁹ Nae lungry a la thuakhaekupaw athyaapaw phaesi ku hae keiccuze nae maethah cih; na la poku oh paw khokhu hae keiccuze nae maesue aroh cih.

³⁰ Pawccecize nanning tuh anaw anaanpaw phaesi thing te na lokuh cih oh, tui um leipaw khokhu hawte na thua cih oh.

³¹ Athawsaepaw tuh maeetuanawpaw thingthyh hawte athua cih zah, a ryalaw tuh maeesoi hawte athua cih; mimaw te mih ryalaw tuh a ukheih cih hae, tuh-e maee tuh a thetu lu kheit san um lan khyh.