HOSEA 8 - Zotung Bible 2016

Israel A Lungzi leinaw

¹ Mungkae kha tutua! Rhaw tuh Bawipaw inn luki khe lantaw hawte yn zou, pawccecize minmin nynh ka byakinnaw kha roh hae zah, ka kawbya kha a ei hae.

² Israel hae nynh ka kalan khe, “Kae Pachia, kaening tuh Israel hae kae thua zah, nang kha kae ny!” a ci hae.

³ Israel hae nynh hoynaw kha a vua vae hae; rhaw hae nynh minmin kha a deehui cih hae.

⁴ Minmin nynh ka kaw leite siapharan hae kha a poku hae; ka ny lei lante bawi hae kha a khangku hae. Mimaw ronaw hanlan mih sui mih ngun khate zohtuh hae kha a raeku hae.

⁵ Pou Samaria, na vaetuataw kha ka hua. Ka thinrianaw tuh mih tungvaw maee lang arua. Hohseciamou mih seinaw thyaa leite a um cih hae?

⁶ E vaetuataw hynh Israel hae kyate nynh yn thua, a kuihhae hoypaw nynh a raepaw nynh thua; e vaetuataw hynh Pachia thua khyh. Samaria kya-e vaetuataw kha zoihtatyh lan khya athua cih.

⁷ Minmin nynh khivae ccacii kha tu hae zah, khiccung looh kha a rue cih hae. A thadynpaw loohku nynh avui vui khyh zah, looh kha pousah lan khyh; looh a la pou zemah ramccang hae nynh a ae cih hae.

⁸ Israel kha po laang athua vae; atu tuh ccungkia leipaw angphe hawte minphuin ccangpaw hae laku kya a um.

⁹ Minmin tuh Assiria langkhe a cceihthung vae hae, a makhaete a khiavuikuhpaw ramkaw e lann hawte a khiavuikuh vae; Efraim tuh a sungsah hae kalan amaw toulou kha a zuakuh vae.

¹⁰ Minphuin ccangpaw hae kalan a zuaku hae zemah, minmin kha ka suelua cih hae; ccyh aro mawze siapharan hae te bawi hae kya-e phupaw ripaw kha riathaete a phu cih hae.

¹¹ Efraim nynh seishawku nawlan silawhang kha patae houh rae zah, tuh-e hae tuh amaw hanlan seinaw lang houh a tang hae.

¹² Aning hanlan ccangpyanaw kha patae ka zeipya zemah, aning te asekuh leipaw lang a ria.

¹³ Silawnaw kha rae hae zah, silawnawpaw saw kha a ae hae zemah Bawipaw nynh ccoupah khyh hae. Mih hoyleinaw kha a liathui cih zah, mih seinaw hanlan de a tah cih hae; Izip lang a kithui cih hae.

¹⁴ Israel nynh amaw a Raetupaw kha ning zah, inn ahoyhoypaw kha a sakku vae; Judah nynh mah khualungrua koihkuhpaw khuapi patae kha a raeku; thuasalama a khuapi hae kha maee te ka soi cih hae zah, koihlupaw a khuapi hae kha maee nynh a u cih hae.