HOSEA 7 - Zotung Bible 2016

¹ Ka ccungccaw hae kha ka kikhae hae zah, Israel kha he ka dansah te, Efraim a ozia hoyleinaw te Samaria kya-e ahoy leipaw cyisahnaw tuh alang cih; pawccecize minmin nynh ahme lei lante cyih hae zah, ru khylan kia biate a tee hae, atolang khe mah kyngdete uccaw a luade hae.

² Mih hoyleinaw balyn kha phe ka ny cipaw minmin nynh tua khyh hae. Atu mih cyisahnaw nynh mimaw kha a koihlu vae hae, minmin tuh ka malang a um hae.

³ Mih hoyleinaw khate siapharan kha a lungtuasah hae zah, mih hynhunaw khate bawi hae kha mih lungtuasah hae.

⁴ Minmin balyn tuh milae zu milae vawpaw kya a sei hae paw nynh thua hae; minmin tuh asopaw talyng-ang te nynh aloku hae, sanlou thoutu nynh vaekhui kha a nonde koute sanlou athoo makhia talyng-ang kha maee noihnua leite a nung.

⁵ Ah siapharan poi nin khe a kuihkaw e bawi hae tuh misutui a rui hae; siapharan tuh ccungccaw a saryatu hae ryte a kuih a dyngbua.

⁶ Minmin tuh talyng-ang hawte myarya aso hae, mih thinlung tuh mih lungkhu kya maee lang arua; azi zidae mih thinrianaw tuh byabyate maee lang arua; awkhua takaw vae tuh aruapaw maee hawte thawte arua.

⁷ Mih balyn mawte talyng-ang hawte so hae zah, mih uktu bawi hae kha a chia hae. Mih siapharan hae balyn tuh a chih vae hae; kae yn kopaw lu kheit sanmah um khyh.

⁸ Efraim tuh minphuin ccangpaw hae ryte a mungkuh hae; Efraim tuh buhleih leite voikheit lang kyalya thoupaw sanlou nynh thua.

⁹ Ramccang hae nynh a thawzung kha a aepya hae, thuasalama tuh-e tuh nyh khyh; a lu kya sangpaw patae a um, thuasalama tuh-e tuh nyh khyh.

¹⁰ Israel a lysakunaw nynh amaw toulou kha a rawse; tuhzemah Bawipaw mih Pachia kalan kithui khyh hae, e balyn hynh acyiku zemah amaw kha ccung khyh hae.

Minphuin hae Doliakunaw

¹¹ Efraim tuh angaeepaw, tuanaw hoi leipaw vahu te nynh aloku vae; minmin nynh Izip kha ko hae zah, Assiria langkhe a cceih hae.

¹² A ccia lya hae khe, minmin kha ka miabu te ka bong cih hae; vaawlang e pavaw hawte laekhu lang ka sahbung cih hae; a pumkunaw hae kya a thae hae thyhte, minmin kha ka thuihei cih hae.

¹³ Ka kyate ccanglang a cciasei vae hae keiccuze, minmin hanlan ngaethya lan kou um! Kae kha yn dou vae hae keiccuze ronaw nynh thuanua hae sah! Minmin kha ka shawkhaw hae zemah, kae kha rawsete hynbya a ho hae.

¹⁴ Thinlung ccaccing te ka kalan sia leite, mih ikhung vawlan khe rawkhuite a um hae; ccathae te misutui mue khylan mimaw saw toulou kha a awku hae; kae kha yn dou hae.

¹⁵ Thungnaw kuih a pyatu hae te a thuiheitu hae tuh kamaw nynh ka thua, tuhzemah kae kha rawsete ahoy leipaw khua kha a khanku hae.

¹⁶ Ccungkia leipaw kalan khe a maeku hae; minmin tuh ahynthyapaw li te nynh aloku vae hae; mih bawi hae tuh mih lysakunaw bya keiccuze thaloi te a chih cih hae. Izip ram kya saryanaw a teing cih hae.