HOSEA 4 - Zotung Bible 2016

Israel tungvaw Seisahnaw Bya

¹ Pou Israel ccungccaw hae, Bawipaw bya hynh ngaetua oh; pawccecize Bawipaw tuh ram kya um hae paw tungvaw kya seisahnaw bya a hoi. E ram kya lungzinaw, sungsakunaw um leite, Pachia nynaw um khyh.

² Pekunaw, hynhunaw, ccungccaw chianaw, runaw te milae zu milae vawpaw te seinaw a um; chiise luasakunaw ccangkheit koute ccangkheit a um.

³ Tukeiccuze ram tuh rawkhuite um zah, ram lungkhu um hae paw balyn tuh thawthyate a um hae; loramsaw hae, vaawlang e pavaw hae, rili kya-e ngasaw hae heize a zo hae.

⁴ Tuhzemah hum nynh sanmah rawse nan sah, hum nynh sanmah ae seisah nan sah, pawccecize, pou ranpibawi, na tungvaw ka lungccing leinaw a um.

⁵ Ninthu khe nang tuh na thy na pawkuh cih; khuazi khe profeh mah nang ryte a thy a pawkuh bua cih, na nung kha mah ka roh cih.

⁶ Ka ccungccaw hae tuh hawnaw azya hae keiccuze aroh hae; nang tuh hawnaw kha na vua keiccuze ka hanlan ranpibawi lang tangnaw kyate nang kha kae vua. Na Pachia kawbya kha na ning vae keiccuze kae nynh mah na ccaaw hae kha ka ning cih hae.

⁷ Ranpibawi hae tuh houh lung hae zah, kae kha rawsete houh a sei hae; mih phu-enaw kha maethyanaw lang ka paleih.

⁸ Minmin nynh ka ccungccaw hae seinaw khate a hoirum hae; houhouh sei hae sah ci a ry hae.

⁹ Ccungccaw zapi hae kya acyiku hawte ranpibawi hae kya mah acyihkuh cih; mih ozia keiccu de ka tah cih hae zah, mih cyisahnaw hanlan ka liaru cih hae.

¹⁰ Minmin tuh a ae hae zemah byn lan khyh hae; a ohhuaku hae zemah pungzae lan khyh hae; pawccecize mimaw toulou kha ohhuakunaw kalan pyakuh hae zah,

¹¹ Bawipaw kha a vua vae hae. Misutui te athawpaw misutui nianaw nynh nythyanaw kha a zosah.

Israel Zohtuh Beiknaw

¹² Ka ccungccaw hae nynh thingphe kha tuanaw ngiakuh hae zah, phuring-unawpaw mih ccungngue nynh a ny ry hae paw kha a hopya hae. Pawccecize ohhuaku rynaw thinlung nynh minmin kha cciakhaesei hae zah, mih Pachia kha vuate a ohhuaku hae.

¹³ Mua dung hae kyakhe thuasah, sangpyng hae vawlan khe thuasah, a mynlyh ahoypaw phaesi ku kaw, poplar ku kaw, terebint ku kaw khe thuasah silawnaw kha a rae hae. Tukeiccuze nae ccanung hae tuh ohhuakuh hae zah, nae monung hae nynh milae vawpaw te a sei hae.

¹⁴ Nae ccanung hae nynh a ohhuaku hae ze thuasah, nae monung hae nynh milae vawpaw te a sei hae ze thuasah minmin kha de ka tah lan khyh hae; pawccecize pise hae toulou nynh ohhuanung hae ryte cceihsei hae zah, beikinn e ohhuanung hae ryte silawnaw a raekheih hae; tuhcite nythyanaw a hoi lei hae paw tuh a roh cih hae.

¹⁵ Pou Israel, nang tuh na ohhuaku zemah Judah tuh a seipaw lang tang nan sah. Gilgal khua lang tee nan lah, Beth-aven khua lang cceihthung nan, “Bawipaw tuh a hiin thyhte,” cite byakinkunaw rae nan.

¹⁶ A lungkhungpaw vaetua tohlaw hawte, Israel tuh a lungkhung; Bawipaw nynh tuutaw kha akopaw ramnonaw kya a paeesaku hawte, Israel kha atu looh a dang kho cih tou?

¹⁷ Efraim tuh zohtuh hae kya phang a kyngkuh, aning tuh a um rythyte um sah.

¹⁸ Mih zu-aenaw kha he a thangsah hae te, ohhuakunaw kyakhe a ciakuh hae; mih phu-enaw laeze ohhuaku rynaw kha a duaahua hae.

¹⁹ Khivae nynh a sake lungkhu khe lungdete a mung vae hae, mih kya-e silawnawpaw hae keiccuze mih maethah cih.