HOSEA 2 - Zotung Bible 2016

¹ Na upaw hae kha Ammi cite ko hae lah, na ccianung hae kha Ruhamah cite ko hae.

Israel Lungzi leinaw, Detahnaw te Shawkhawnaw

² Nae nung kha soihbia oh, pawccecize aning tuh ka zu thua vae khyh zah, kae tuh a vawpaw ka thua vae khyh, a ohhuakunaw kha vua zah, milae vawpaw te a seinaw kha a vua nawlan soihbiatua oh,

³ tuhkhyhze tuh a boeining kha ka phae cih zah, a pui lya hawte a ccakaete ka umsah cih, ramkaw te ka losakuh cih zah, ramrou lang ka tangsah cih, tui kanmawnaw te aning kha ka chisah cih.

⁴ A ccaaw hae tuh ohhuakunaw ccaaw hae athua hae keiccuze, a ccaaw hae kha ngaethya ka umsah lan khyh hae.

⁵ Pawccecize mih nung tuh a ohhuakuh; minmin a poitu hae aning tuh maethya lan umpaw kha a rae vae. Pawccecize aning nynh, “Ka sungsah hae nulang ka zuikuh cih; minmin nynh kae kha sanlou te tui, tuuming te laaw, chitui te niapaw atui kha yn pya hae,” a ci.

⁶ Tukeiccuze a laanpi kha hinpawbu te ka khaw cih; a ccianaw a muihku khyh ccaw cite lungrua ka ruakhaw cih.

⁷ A sungsah hae kha deehui hae salamah phah lan khyh hae; minmin kha ccung hae salamah muih lan khyh hae. Tetuh aning nynh, “Masaty e ka vawpaw kalan ka kithui cih, pawccecize atu laeze langmawlya kha ka hanlan ahoyhua,” cite a ho cih.

⁸ Aning kha ccathae, misutui te chitui a pyatu tuh kae ka thuapaw kha nyh khyh zah, Baal pachia hanlan a mang hae paw sui te ngun kha hysahte a pyatu tuh kae ka thuapaw kha nyh khyh hae.

⁹ Tukeiccuze loohrue ccyh kya ka ccathae kha ka lahthui cih zah, misutui non ccyh kya ka misutui kha mah ka lahthui cih; a ccakaete um zah bong khylan ka pyapaw ka tuuming te ka laaw kha ka lah cih.

¹⁰ Atu a sungsah hae muihnaw khe, a boeining kha phaete maethya ka law cih, humhung nynh mah ka kuih kyate luesah lan khyh.

¹¹ A lungpawnaw, a poi hae, sawpawdia ccyh hae, a sabbath hae te accyh khyapaw a poi hae balyn kha ka thangsah cih.

¹² “E hae tuh ka sungsah hae nynh yn pya hae paw nynh thua,” cite aning nynh a hopaw a misu ku hae te a thaeku ku hae kha ka roh cih. Khah-e hae kha ramkaw lang ka tangsah cih zah, loramsaw hae nynh a ae cih hae.

¹³ Baal pachia hae hanlan mynkhuhpaw kha upyate, a kuihpu te aphutepaw lung khate ccaankuh zah, kae kha ningte, a sungsah hae nulang a zuiku nin, Baal pachia hae poi nin keiccuze aning kha de ka tah cih, cite Bawipaw nynh a ci.

¹⁴ Tukeiccuze, atu aning kha ka soihtua cih, ramkaw lang ka cciakhae cih zah, nebaleih lan ka hopah cih.

¹⁵ Tuin kyakhe a misu khokhu kha ka pya cih, Akhor Accya kha ngaehoinaw thuakaw lang ka rae cih. Tuin kyakhe aning a zawthaw lya, Izip ram kyate yn pou lya hawte yn leihru cih.

¹⁶ Bawipaw nynh a hopaw tuh, tuin nin khe nang nynh, “Ka vawpaw,” cite nae ko cih zah, “Ka Baal,” cite nae ko vae lan khyh.

¹⁷ Baal hae min kha a mung kyate ka vua cih zah, mih min kha ho thua vae lan khyh.

¹⁸ Tuin nin khe loramsaw hae, vaawlang e pavaw hae te laekhu avawthya hae paw ryte nanning hanlan byakinnaw kha ka rae cih; li, thaloi te rhawtuk-zunghe hae kha laephi kyate ka roh cih zah, khyndadyh lan kae isah cih.

¹⁹ Nang kha ka zu lang zungzae kae umkhae cih; dingnaw, byading, zungzae tynpaw sungsahnaw te thawccinaw khate ka zu lang kae umkhae cih.

²⁰ Lungzite zu lang kae umkhae cih; te nang nynh Bawipaw kha na nyh cih.

²¹ Bawipaw nynh a hopaw tuh, tuin nin khe na bya kha kae leih cih, vaawlui bya kha ka thaepah cih zah, vaawlui nynh laephi kha bya a thaepah cih;

²² laephi nynh ccathae, misutui te chitui kha bya a thaepah cih hae zah, minmin nynh Jezreel kha bya a thaepah cih hae;

²³ te aning kha laephi kya kamaw hanlan ccacii lang ka tukuh cih. Te Lo-ruhamah kha ngaethya ka umsah cih, Lo-ammi kha, “Nang tuh ka ccungccaw nynh na thua,” cite ka hopah cih zah, aning nynh, “Nang tuh ka Pachia nynh na thua,” cite a ho cih, a ci.