HOSEA 14 - Zotung Bible 2016

Ngaesiku lan Ngianaw

¹ Pou Israel, Bawipaw na Pachia kalan kithui tua, pawccecize na hoyleinaw keiccuze na khuliakuh vae.

² Sawsangnaw bya kha paccynkute Bawipaw kalan kitua; Amaw kyakhe, “Kae cyiseinaw balyn hynh oun ngaethyatua, thawccinaw te kaening hynh beih oun ccoutua, kae munglae te kae ho hawte kae pya cih.

³ Assiria nynh kaening hynh oun khum lan khyh; rhawtuknawpaw marang kha kae ccikuh lan khyh; Kae kuih te kae raeku hae paw kha, ‘Nang tuh kae Pachia nynh na thua,’ cite kae ho vae lan khyh. Ngawraw hae nynh na thawccinaw kha a mue hae,” cite hopah oh.

Seingaethyanaw

⁴ Mih lungzi leinaw kha ka dansah cih hae; ka lung ccaccing te ka sungsah cih hae, pawccecize mih tungvaw ka thinrianaw phe dae vae.

⁵ Kae tuh Israel hanlan dangtui hawte ka thua cih; aning tuh lili paw hawte a paw cih, Lebanon ramkaw e thingku hawte a tharui a saw cih.

⁶ Aning tuh ange hae atoih cih; oliv thing hawte a puithya cih zah, Lebanon mua hawte a mynkhuh cih.

⁷ Minmin tuh ka mynlyh kaw khe bua a umthui cih hae zah, khokhu hawte hinlalyh lan a um cih hae; misu ku hawte a lethung cih hae zah, Lebanon e misutui hawte mih mynkhuh cih.

⁸ Pou Efraim, zohtuh hae te kae tuh pawmou kae sekuh? Na sawsangnaw ae thaepahpaw te nang ae do-oihpaw tuh kamaw nynh ka thua; kae tuh zungzae hinlalyhpaw maeccaw ku hawte nynh ka thua; na lungzinaw tuh ka kyate yn thuapaw nynh thua.

⁹ A haw hae paw nynh e hae hynh a thaethya hae; a nyhthya hae paw nynh e hae hynh a ny hae. Pawccecize Bawipaw laanpi tuh kyh zah miding hae nynh a zui hae, thuasalama misei hae tuh tuh-e laanpi kya a khuliakuh hae.