HOSEA 12 - Zotung Bible 2016

¹ Efraim nynh khivae kha tuu hawte a rin, nithua lang e khivae kha anin ninlang a deehui; minmin nynh ngaeenaw te puathonaw kha a lungsah thung hae; Assiria te byakinnaw kha mang a rae hae pite chitui kha Izip ram langkhe a phu hae.

Dounaw Ccyh Asae

² Bawipaw nynh Judah tungvaw seisahnaw bya a hoi, Jakob kha a ozia thyhte de a tah cih zah, a cyisahnaw thyhte a liaru cih.

³ Jakob nynh a nung vue lungkhu khe a upaw umnaw kya umru lan zuakuh zah, piccan he yn thua te Pachia kha a rawse.

⁴ Jakob tuh vaawpaw te taekuh hae zah phe a tae, Jakob nynh rah zah hythuanaw kha a ngiaku, Pachia tuh Bethel kya Jakob te tungkuh hae zah bya a hokuh hae.

⁵ Tuh-e vaaw Pachia Bawipaw tuh a min Bawipaw a cikuh!

⁶ Tukeiccuze nanning tuh nae Pachia kalan kithui oh, sungsakunaw te byading kha tynkaring lan kyngkuh oh lah, nae Pachia kha po ngaehoi oh.

⁷ Aning tuh kungkupaw thua zah, ahme leipaw zawccu kha a ccyngku, milae kha vawsawnaw pya a ry.

⁸ Efraim nynh, “Alei, kae tuh ka hoirum vae, sisua patae ka tungkuh vae; ka tungkupaw balyn hynh ahme leite a muepaw nynh thua cite yn seisah lan khyh hae,” a ci.

⁹ Kae tuh Izip ram kyate ae cciakhaepaw Bawipaw na Pachia nynh ka thua; accyh khyapaw poi nin hawte, bu hae kyakhe bua kae umsah cih.

¹⁰ Profeh hae kya ka ho vae; vizin patae ka langsaku vae, profeh hae kyate ronaw kae thuasah cih.

¹¹ Gilead kya hoyleinaw a um, minmin tuh accakaepaw lang a tang ccaccing cih hae. Gilead kyakhe tangnuapaw hae kha si a law hae, tukeiccuze mih silawhang hae tuh leikua lungkhu e the-awnaw kya a umpaw lungpum hawte athua cih hae.

¹² Jakob tuh Aram ram lang a ccue, tuin kyakhe Israel tuh zu mue khylan milae rya kha lah zah tuu a rin.

¹³ Bawipaw nynh profeh lu kheit kha mangte Israel hae kha Izip ram kyate cciakhae thung hae zah, profeh lu kheit nynh minmin kha a do-oih hae.

¹⁴ Efraim nynh Bawipaw kha myarya a thinriasah, tukeiccuze a Bawipaw nynh a seinaw kha a tungvaw a ccawsah cih zah, a sarya keiccuze a liaru cih.