HABAKKUK 2 - Zotung Bible 2016

Pachia nynh Profeh kha Bya A Khung

¹ Rhaw ka vianaw innhangpaw kya ka thadyn cih zah, atolang e rhawlungrua vawlan khe ka um cih; Bawipaw nynh ka lungccing leinaw konglang kha ka kalan pawtemou yn hopya cipaw te pawtemou bya yn khung cipaw kha phang ka ngaw cih.

² Te Bawipaw nynh kae kha bya yn khungru zah: Vizin kha zeitua; a ccuetupaw nynh a ccue lalia lante a ria kho nawlan, lungphe kyakhe ccaerarih lan zeitua.

³ Vizin accing ccyh zaw loh khyh, tuh-e vizin nynh athangnaw ccyh kha ho zah, hyn khyh. Tuh-e vizin tuh accyh aro ung cih paw alo lanze ngaw hin; soleite accing cih, accyh ro vae lan khyh.

⁴ A lysakuh hae paw kha dotua hae! Mih thinlung tuh ding khyh, thuasalama miding hae tuh mih zynnaw liate a hiin hae.

⁵ Hoirumnaw tuh ling a mang; a lysakuhpaw tuh tyn khyh, mih lotharue kha Michi khua hawte kobalae lan a aw hae; Chinaw hawte azaw vae ci um boi khyh; minphuin hae balyn kha mimaw hanlan suelua hae zah, ccungccaw balyn kha mimaw kalan a pum hae.

Ccungccaw Hoylei hae Vawsawnaw

⁶ Taepaw ccungccaw hae nynh a taetu hae paw kha saryanawpaw kesihkesahpaw bya khate, “Nae uccaw athua leipaw kha a ccakhungkuh hae paw nanning hanlan ngaethya lan kou um!” cite a theihrya cih hae zawtou? Hohseciamou naemaw toulou kha na law oh paw laebah khate nae phupaw na risakuh ung cih oh?

⁷ Laebah ae ungsah oh paw tuh palou oun thua lan khyh hae tou? Nanning ae thyngsakuh oh paw tuh oun thokuh lan khyh hae tou? Tetuh nanning tuh minmin nynh luadete a lawku hae paw lang na tang vae cih oh.

⁸ Nanning nynh minphuin patae kha na luade oh keiccuze, a hiinhypaw ccungccaw hae nynh nanning kha ae luade ru cih oh— ccungccaw na chia oh keiccu thuasah, laephi vaw e ccungccaw hae, khuapi hae te tuin kya um hae paw balyn tungvaw kya puathote rya na law oh keiccu thuasah ae luade ru cih.

⁹ “Vawsawnaw nynh a phya khonaw kyate lue khylan nae bu kha ahangnaw kya raekute nae innbyn hanlan ahme lei lante uccaw a mue hae paw nanning hanlan ngaethya lan kou um!”

¹⁰ Nanning nynh ccungccaw patae kha chiate nae innbyn kha maethyasah lan na paccyn vae oh; nae hiinnaw kha na zosaku vae oh.

¹¹ Pang thungnawpaw lung nynh heize pang kyate a sia cih zah, inn-boeipae nynh a khungru cih.

¹² “Chiise luanaw te khua kha na rae oh zah, hoyleinaw vawlan khe khuapi kha na thadynsah oh paw nanning hanlan ngaethya lan kou um!”

¹³ Ccungccaw hae nynh maeesoi hanlan thawbangte rya a law hae paw te minphuin hae nynh accakaepaw hanlan mih thaw a bangsaku hae paw kha Vaaw Bawipaw nynh a cyipaw thua khyh tou?

¹⁴ Thuasalama rili tuh tui te phe abia hawte, laephi tuh Bawipaw phu-enaw nythyanaw khate phe abeih cih.

¹⁵ “Mih ccakaete a um hae paw nae innpaw hae kha do khylan, a rui makhia hae ruithyapaw kha na bu oh zah, na niasah oh paw nanning hanlan ngaethya lan kou um!”

¹⁶ Nanning tuh phu-enaw te thua leite thethyanaw khate phe na byn cih oh, Naemaw mah neih oh lah, tangkitangkae lante cceih oh! Bawipaw kuih kya umpaw detahnaw banang nynh nanning kha ae koihlu cih oh zah, nae phu-enaw tuh maethyanaw lang a tang cih!

¹⁷ Lebanon tungvaw puathote rya na law oh paw kha nynh naemaw kha ae roh cih oh; sarangpaw hae na chia oh, atu tuh sarangpaw hae nynh naemaw kha nae thin ae phangsah cih oh, ccungccaw na chia oh keiccu thuasah, laephi vaw e ccungccaw hae, khuapi hae te tuin kya um hae paw balyn tungvaw kya puathote rya na law oh keiccu thuasah nae thin ae phangsah cih oh.

¹⁸ A raetupaw nynh a raepaw zohtuh tuh pawmou a thane? Laeepaw zohtuh, ling sazaepaw tuh pawmou a thane? Bya san a ho kho leipaw zohtuh sasaw mang athua pite, zohtuh a raetupaw nynh khah-e zohtuh kha a doliaku!

¹⁹ Thingtung kha, “Inaw kyate tho ccavae!” cite hopah hae zah, yccae leipaw lungtung kha, “Thoku tua!” cite a hopahpaw nanning hanlan ngaethya lan kou um. Zohtuh nynh ae ccangpah kho tou? Zohtuh tuh sui te ngun khate raedepaw thua zah, a lungkhu kya hiinnaw papin um khyh.

²⁰ Bawipaw tuh athyaapaw a beikinn kya a um; laephi ccungccaw balyn nynh amaw malang daebabi lan um hae sah!