GENESIS 38 - Zotung Bible 2016

Jakob Te Tamar

¹ Tuh ccyh lyakhe Judah tuh a uno hae kyate cceih zah Adullam khuapaw Hirah kya a um.

² Tuin kyakhe Judah nynh Kanaan ccungccapaw a min Shua cikuhpaw a ccanung kha a muih; tuh-e nopinung kha zu lang umkhae zah a ikhae.

³ Tuh-e nopinung nynh ccaawpoi zah ccapaw kha a saah; Judah nynh tuh-e ccapaw kha Er cite min a phu.

⁴ Tukoute ccaawpoi zah ccapaw bua saah zah Onan cite min a phu.

⁵ Tukoute ccapaw bua saah zah Shelah cite min a phu. Shelah a pui lya Judah tuh Khezib khua nynh a um.

⁶ Judah nynh a ccatawccaw Er hanlan zu a dypya; a zu min tuh Tamar a cikuh.

⁷ Judah a ccatawccaw Er tuh Bawipaw malang ahoy leipaw thua zah Bawipaw nynh amaw kha phe a chisah.

⁸ Oute Judah nynh Onan kha, “Na upaw zu kha la ikhae lah zu lang la umkhae; na upaw hanlan ccaawno kha la saahpah,” a cipya.

⁹ Thuasalama Onan nynh kae saahpaw hynh kamaw ccaaw lang tang lan khyh cipaw a ny, te a upaw kha ccaawno a pya ry khyh keiccuze a upaw zu kha a ikhae takyh vae ze, a buatui kha laephi kalan leih a pousah han.

¹⁰ A cyisahnaw nynh Bawipaw lung kha tung khyh, tukeiccuze Bawipaw nynh Onan kha mah phe a chisah.

¹¹ Oute Shelah hynh a u hae hawte yn chihsei cih cite Judah nynh a phang keiccuze a monung Tamar kha, “Ka ccapaw Shelah a zaw makhia na paaw inn kya nomaenung lante la um,” a cipya. Tukeiccuze Tamar nynh a paaw inn lang cceih zah a um.

¹² Tuinte aro mawze Shua ccanung Judah zu tuh phe a chih; Judah nynh a rawkhuinaw ccyh he athang te, a bangpaw Adullam khuapaw Hirah ryte Timnah khua e a tuuming ngotu hae kalan a cceih hae.

¹³ Tamar kha, “Na ranpaw Judah tuh Timnah lang a tuuming ngo lan a cceih cih,” cite a hopya hae.

¹⁴ Tamar nynh a nomae uccaw kha liakuh zah mae bongkupaw boei te a mae kha a bongku, a pyn kha mah phang lungkuh zah Timnah lang cceihpaw laanpi kya umpaw Enaim khua teenaw koikua kyakhe a haung. Shelah tuh phe a zaw vae, tuhzemah zu lang yn umkhae sah khyh hae cipaw kha Tamar nynh a ny.

¹⁵ Judah nynh nopinung kha he a muih tuh, a mae a bongku keiccuze ohhuanung nynh thua cite a tua.

¹⁶ Laanpi pe lang ccianua zah, “Rangtua, ikheih tua sih,” a ci, pawccecize a monung nynh thua cipaw nyh khyh. Nopinung nynh, “Ah ihkheih ze pawmou nae pya cih?” a ci.

¹⁷ Judah nynh, “Miaa phu kya-e miaa taraw sa kheit kha kae pya cih,” a ci. Te nopinung nynh, “Tuh-e tuh nae pya mawze byakinku nawpaw ccangkhakheit kha nae pya ze rou,” a cipya.

¹⁸ Judah nynh, “Pawcihawpaw byakinkunaw uccaw mou kae pya cih?” a ci. Nopinung nynh, “Na tazeih, na kya-e akhekuhpaw arui te na ccyngpaw hoitang kha,” a cipya. Tukeiccuze Judah nynh khah-e hae kha pya zah a ikhae, te Judah liate ccaaw kha a poi.

¹⁹ Tukoute nopinung tuh thokuh zah a cceih vae, te a mae bongkupaw boei kha hungkuh zah a nomae boeining kha bua a lawku.

²⁰ Judah nynh nopinung kya byakinku nawpaw uccaw kha bua law khylan a banpaw Adullam khuapaw kyate miaa taraw kha nopinung kalan he a pya tuh, aning nynh nopinung kha muih kho vae khyh.

²¹ Aning nynh tuin kya umpaw khuaccaaw hae kha, “Enaim khua laanpi pe umpaw beikinn ohhuanung kha teimou um?” cite a khia hae. Thuasalama minmin nynh, “Hein kya ohhuanung um boi khyh,” a ci hae.

²² Tukeiccuze aning nynh Judah kalan ki zah, “Nopinung kha ka muih vae khyh, tuhpiaze khuaccaaw hae nynh, ‘Hein kya ohhuanung um boi khyh,’ a ci hae,” cite a hopya.

²³ Oute Judah nynh, “Nopinung kya umpaw uccaw kha amaw la lawkuh sah, tuhkhyhze tuh aening kha oun nuinse cih hae; e miaa taraw hynh nopinung kalan phang ka pya pite amaw kha na muih vae khyh hynhsa,” a ci.

²⁴ Sawpaw sah thum he aro te Judah kyakhe, “Na monung Tamar tuh ohhuanung lang tang zah ahoy leipaw ryalaw keiccuze atu ccaaw a poi vae,” cite a hopya hae. Judah nynh, “Amaw kha atolang poukhae oh lah phe chih lan maee te u oh,” a ci.

²⁵ A poukhae lya hae khe nopinung nynh a ranpaw kha byataw zah, “Ccaaw yn poisahtupaw hynh e uccaw hae a hoitupaw nynh thua, hynh-e tazeih, akhekuhpaw arui te hoitang hynh hum uccaw mou cipaw na syntaw tou, beih dotua hei,” a cipya.

²⁶ Judah nynh khah-e hae kha syntaw zah, “Nopinung hynh kamaw laeze a dinghua, pawccecize ka ccapaw Shelah kha a vawpaw lang ka pya khyh,” a ci. Te nopinung kha ikhae boi vae khyh.

²⁷ Ninsaw a kyh tuh, a vue kya ccaawpheipaw a la um.

²⁸ Neitangia a cci lyakhe ccapaw lu kheit nynh a kuih kha atolang a dyng; te ccaawpuisah nung nynh a kuih kha kyng zah law te khii zah, “E ccapaw hynh masaty a puipaw nynh thua,” a ci.

²⁹ Thuasalama tuh-e ccapaw nynh a kuih kha bua khin zah lu kheit kha nynh poh a puity vae, te ccaawpuisah nung nynh, “Nang tou poh na puity!” a ci. Tukeiccuze Perez cite min a phu hae.

³⁰ Tukoute a kuih kya laaw khiikuhpaw a neitaw tuh yn pui; te Zerah cite min a phu hae.