GENESIS 35 - Zotung Bible 2016

Jakob Bethel lang Bua A Ki

¹ Pachia nynh Jakob kha, “Thokuh, Bethel lang cceihthung lah, tuin kya khuasah. Na upaw Esau kyate na ccue lyaze namaw kya a langkuhpaw Pachia hanlan silawhang ccangkheit kha tuin kya rae,” a cipya.

² Tukeiccuze Jakob nynh a innbyn te amaw kya a um hae paw balyn kha, “Nae kya umpaw ramccang pachia hae kha vua oh, te naemaw te naemaw kha thyaasakuh oh lah nae uccaw kha liakuh oh;

³ rang oh, Bethel lang cceih oh sih, ka vawsaw ccyh lya yn bawmtupaw te ka ccianaw takyh kya yn umkhaepaw Pachia hanlan silawhang ccangkheit kha tuin kya ka rae cih,” a cipya hae.

⁴ Tukeiccuze minmin nynh a hoi hae paw ramccang pachia hae te mih nakua kya umpaw nakuahuing hae kha Jakob kalan a pya hae; te Jakob nynh khah-e hae kha Shekhem pe umpaw phaesi ku kaw khe a thuruh.

⁵ Minmin nynh a ccia lya hae khe Pachia kyate ri lan umpaw kha mih pepan e khua hae kyakhe a ccaw keiccuze humhung nynh mah Jakob ccaaw hae kha deehui vae khyh hae.

⁶ Jakob tuh amaw kya umpaw ccungccaw hae ryte Kanaan ram umpaw Luz khua a thua hae, (Luz tuh Bethel nynh thua),

⁷ te tuin kyakhe silawhang ccangkheit kha rae zah tuh-e hmin tuh El-bethel cite min a phu, pawccecize a upaw kyate a ccue lyaze Pachia nynh a langpyakunaw hmin nynh thua.

⁸ Te Rebekah kha a do-oihtu Deborah tuh chih zah Bethel akawlan umpaw phaesi ku kaw khe a uu hae. Tukeiccuze tuh-e thingku tuh Allon-bacuth cite min a phu hae.

⁹ Jakob nynh Mesopotamia kyate bua a thua tuh Pachia nynh amaw kya bua langkuh zah hythua a pya.

¹⁰ Pachia nynh Jakob kha, “Na min tuh Jakob nynh thua; atu te Jakob cite ko na thua vae lan khyh, thuasalama na min tuh Israel a cikuh vae cih,” a cipya. Tukeiccuze Israel cite ko athua vae.

¹¹ Pachia nynh amaw kha, “Kae tuh Athunghuapaw Pachia nynh ka thua: na pungzae cih zah na lungthung cih; minphuin phuin kheit te minphuin patae kha namaw kyate oun langkuh cih hae, te siapharan hae kha namaw kyate oun pou cih hae.

¹² Abraham te Isak ka pya hae paw ram kha nang kae pya cih, tuh-e ram tuh namaw koute na ciihan hae kha ka pya cih hae,” a cipya.

¹³ Oute Pachia tuh Jakob te bya a hokunaw hae hmin kyate vaawlang a kae vae.

¹⁴ Jakob nynh Pachia te bya a la hokunaw hae hmin kyakhe lungbing ccangkheit bing zah a vawlan khe niapaw silawnawpaw kha bu zah chitui kha mah a bu.

¹⁵ Jakob nynh Pachia te bya a hokunaw hae hmin kha Bethel cite min a phu.

Rachel A Chih

¹⁶ Tukoute Bethel kyate cceih hae zah Efrath khua te tabeih asawnaw kyakhe he a thua hae tuh Rachel tuh a ccaaw pui zaw zah neitangia ccinaw kha myarya a teing.

¹⁷ Tuhte neitangia a cci lyakhe neitaw puisanung nynh Rachel kha, “Rih nan, pawccecize atu ccangpaw ccapaw na hoi vae cih,” a cipya.

¹⁸ Rachel nynh a hy athang dyn khe ccapaw kha Ben-oni cite min a phu; thuasalama a paaw nynh Benjamin cite min a phu.

¹⁹ Rachel tuh chih zah Efrath lang ccianaw laanpi kya a uu hae (Efrath tuh Bethlehem nynh thua),

²⁰ te Jakob nynh a shawku kyakhe lungbing ccangkheit a bing; tuh-e tuh Rachel shawku kya-e lungbing nynh thua, tuh-e tuh atunin cia tuin kya a um.

²¹ Israel nynh cceih zah Eder innhangpaw arawlang khe a bu kha a sak.

Jakob Ccapaw hae

²² Israel nynh tuin ram kya a um lyakhe Reuben nynh a paaw lovaenung Bilhah kha a ikhae; te Israel nynh tuh-e tuh a thae. Jakob ccapaw hae tuh lu haw lae ning acih hae.

²³ Leah ccapaw hae tuh: Reuben (Jakob a ccatawccaw), Simeon, Levi, Judah, Isakhar te Zebulun nynh thua hae.

²⁴ Rachel ccapaw hae tuh: Josef te Benjamin nynh thua hae.

²⁵ Rachel seenung Bilhah ccapaw hae tuh: Dan te Naftali nynh thua hae.

²⁶ Leah seenung Zilpah ccapaw hae tuh: Gad te Asher nynh thua hae. E hae tuh Mesopotamia ram kya a pui hae paw Jakob ccapaw hae nynh thua hae.

Isak Chinaw

²⁷ Jakob tuh Mamre kya umpaw a paaw Isak kya a thua, Mamre tuh Abraham te Isak nynh ramccang ccungccaw hae hawte a la umnaw hae nynh thua, (Mamre tuh Kiriath-arba cite mah cikuh zah Hebron cite mah a cikuh).

²⁸ Isak tuh kum za kheit sung tarya acih vae.

²⁹ Te Isak tuh a kum tang vae zah he a taw vae te a chih, te a ccungccaw hae kalan a sueluabua hae; a ccaaw hae Esau te Jakob nynh amaw kha a uu hae.