GENESIS 23 - Zotung Bible 2016

Sarah Chinaw te Uunaw

¹ Sarah tuh za kheit kum kuin lae sari cia a she sae.

² Te Sarah tuh Kanaan ram Kiriath-arba khua kya a chih (Kiriath-arba tuh Hebron khua nynh thua); Abraham tuh Sarah hanlan rawkhui khylan a cceih.

³ Abraham nynh a zu rhua pe te thokuh zah Hit ccungccaw hae kyakhe,

⁴ “Kae tuh nanning laku a um buapaw ramccang ccungccaw te mikhiapaw ka thua zah ka zu rhua uu nawlan shaw hmin san kheit beih yn pyabua oh,” a ci.

⁵ Te Hit ccungccaw hae nynh Abraham kha,

⁶ “Nang tuh kaening laku a thawsaepaw bawi lu kheit nynh na thua. Kae shawku hmin kyakhe pokuh lah na zu rhua kha uh; na zu rhua uu nawlan shaw hmin sankhakheit kha namaw hanlan a hysah leipaw kae um lan khyh,” a cipya hae.

⁷ Abraham nynh thokuh zah tuh-e ram e Hit ccungccaw hae malang bakhung zah,

⁸ “Ka zu rhua kha uhsah cite nae ry oh zetuh Zohar ccapaw Efron nynh

⁹ a hoipaw Makpelah lungkaryn kha yn zuapya nawlan beih hopah oh; tuh-e tuh a loo kin umpaw nynh thua. Khah-e shaw hmin kha a mee thathyhte nae malang yn zuapya nawlan yn soihbiapah oh,” a cipya hae.

¹⁰ Efron tuh Hit ccungccaw hae laku a haungbua; te Hit ccungccapaw Efron nynh tuh-e khua koikua lungkhu umpaw Hit ccungccaw hae balyn a thaenaw hae khe Abraham kha,

¹¹ “Bawipaw, tuhte thua khyh, loo thuasah, loo lungkhu umpaw lungkaryn thuasah ka ccungccaw hae malang kae pya; na zu rhua kha uh ccaleih,” a cipya.

¹² Oute Abraham nynh tuh-e ram e ccungccaw hae malang a bakhung.

¹³ Tuh-e ram e ccungccaw hae nynh a thaenaw hae khe Abraham nynh Efron kha, “Ka bya hynh yn ngaepya tua, ka zu rhua kha tuin kya ka uu ccaw, loo mee hynh kae pya cih, yn lawpakuh,” a cipya.

¹⁴ Efron nynh Abraham kha,

¹⁵ “Ka bawipaw, tuh-e laephi tuh phua za pali nynh a mee, nang te kae laku tuh-e tuh pawsang thua zawtou? Na zu rhua tuh uh ccaleih,” a cipya.

¹⁶ Abraham nynh Efron hopaw kha a nawccaw; te aning nynh Efron hanlan Hit ccungccaw hae nynh a thaenaw hae khe, kungku hae nynh a tou hae thyhte phua za pali kha toupah zah a pya.

¹⁷ Tuhcite Mamre nithua lang e Makpelah kya umpaw Efron loo thuasah, loo lungkhu umpaw lungkaryn te thingku hae thuasah,

¹⁸ Hit ccungccaw balyn a umnaw hae, tuh-e khua koikua lungkhu a teepaw ccungccaw balyn malang khe Efron nynh Abraham kha a pya.

¹⁹ Tukoute Abraham nynh a zu Sarah kha Kanaan ram, Mamre te a hawiliakuh hae paw Makpelah loo kya umpaw lungkaryn kyakhe a uu.

²⁰ Tuh-e loo te loo lungkhu umpaw lungkaryn kha Abraham nynh a hoipaw shawku hmin lang Hit ccungccaw hae nynh a pya hae.