GENESIS 22 - Zotung Bible 2016

Isak te Silawnaw

¹ Tukoute Pachia nynh Abraham kha a syntawtua. Pachia nynh, “Abraham,” cite ko zah Abraham nynh, “Hein kya mang ka um,” a ci.

² Pachia nynh, “Na sungsahpaw na ccapaw, lu kheit kyalyapaw Isak kha hoei lah Moriah ram lang cciatua, te kae muihsah cih paw mua muakheit vawlan khe Isak khate maee-ute silawnaw kha raetua,” a ci.

³ Tukeiccuze Abraham nynh awkhua takaw te tho zah a lann kha ade de zah a ccapaw Isak te a ccangvae hae lu ning kha a hoei hae; aning nynh maee-ute silawnaw kha rae nawlan maeething kha tya zah Pachia nynh a hopyapaw asawnaw hmin lang a cceih.

⁴ Nin thumnaw kya Abraham nynh dothung zah tuh-e hmin kha asawnaw kyate a muih.

⁵ Te Abraham nynh a ccangvae hae kha, “Hein kya lann ryte la um oh; imuapaw te kae tuh khuhlang khuin kae la cceih cih; Pachia kae la beik cih zah athang te nae kalan bua kae ki cih,” a cipya hae.

⁶ Abraham nynh maee-ute silawnawpaw unaw lanpaw maeething kha lah zah Isak kha a puihsah, te amaw nynh maee te tangpaw kha ccyng zah lu ning te a cceih hae.

⁷ Isak nynh a paaw Abraham kha, “Apang,” cite ko zah a paaw nynh, “Ka ccaaw, hein kya mang ka um,” a ci. Isak nynh, “Maee te maeething tuh mang um zah maee-ute silawnaw lanpaw tuutaw teimou um?” a ci.

⁸ Abraham nynh, “Ka ccapaw, maee-ute silawnaw lanpaw tuutaw kha Pachia nynh oun pya cih,” cipah zah mih lu ning te pynkheihlan a cceih hae.

⁹ Pachia nynh a la langsahpyapaw hmin kya a thua hae tuh, Abraham nynh silawhang ccangkheit kha rae zah maeething kha a khang. A ccapaw Isak kha he zah silawhang vawlan umpaw maeething vawlan khe a nung.

¹⁰ Te Abraham nynh a kuih kha dyng zah a ccapaw chia nawlan tangpaw kha a law.

¹¹ Thuasalama Bawipaw vaawpaw nynh vaawlang te, “Abraham, Abraham!” cite ko zah Abraham nynh, “Hein kya mang ka um,” a ci.

¹² Vaaw ccungccapaw nynh, “Imuapaw tungvaw na kuih hang nan, amaw kha pawpaw mah cyih nan; nang nynh Pachia kha na ri cipaw atu ka ny, pawccecize na ccapaw lu kheit kyalyapaw kha kamaw hanlan na hysah,” a ci.

¹³ Te Abraham nynh dothung zah a ki te thabu kya phang bawkuhpaw tuutepaw sa kheit kha a muih. Abraham nynh cceih zah a ccapaw ccelang tuutepaw kha lah zah maee-ute silawnaw kha a rae.

¹⁴ Tukeiccuze Abraham nynh tuh-e hmin kha, “Jehovah-jireh,” cite min a phu; atu she cia zemah, “Bawipaw mua vawlan tuh-e tuh paccynpya athua cih,” a ci hae.

¹⁵ Te Bawipaw vaawpaw nynh Abraham kha vaawlang te vaeningnaw ko zah,

¹⁶ “Bawipaw nynh kamaw min ccaccei te byakinnaw ka rae cih ci zah hynhte a ho: Nang nynh na ccapaw lu kheit kyalyapaw kha kamaw hanlan na hysah zah hynh-e hynh na cyi keiccuze,

¹⁷ nang kha hythua kae pya ccaccing cih, na ciihan kha vaawlui kya-e awsi zeih, te rili kin umpaw laesia zeih alung lan kae pungthungsah cih. Te na ciihan nynh mih rhaw hae khua koikua kha a uk cih hae,

¹⁸ te na ciihan liate laephi vaw e minphuin balyn hythuanaw a ccou cih hae, pawccecize ka kaw kha na ngae vae,” a ci.

¹⁹ Te Abraham nynh a ccangvae hae kalan a ki, te minmin nynh thokuh hae zah Beersheba lang pynkheihlan a cceih vae hae; Abraham tuh Beersheba kya khua a sah.

Nahor Ccaaw hae

²⁰ Tukoute, “Na neitawpaw Nahor zu Milkah nynh ccaaw hae kha a saah,” cite Abraham kha a hopya hae:

²¹ Uz tuh ccatawccaw thua zah a neitaw tuh Buz nynh thua, Kemuel tuh Aram a paaw nynh thua,

²² te Khesed, Hazo, Pildash, Jidlaf te Bethuel nynh thua hae.

²³ Bethuel tuh Rebekah a paaw nynh thua. Milkah nynh Abraham neitaw Nahor kha e ccapaw lu tarya hynh a saahpya hae.

²⁴ Tuhpiaze Nahor a lovaenung Reumah nynh Tebah, Gaham, Tahash te Maakah kha a saah hae.