GENESIS 2 - Zotung Bible 2016

¹ Tuhcite vaaw te lae te tuh-e hae kya umpaw atyn-are kha rae kou athua vae.

² Te nin sarinaw nin khe Pachia nynh a lawpaw a ryalaw kha a thangsah, te a lawpaw a ryalaw balyn kyate nin sarinaw khe a haeung.

³ Tukeiccuze Pachia nynh nin sarinaw nin kha hythuapya zah taekhia lante a thyaasah, pawccecize tuh-e nin khe Pachia nynh a raepaw raenaw balyn kha thangsah zah a haeung.

⁴ Hynh-e hae tuh Pachia nynh vaaw te lae a raenaw konglang nynh thua. Bawipaw Pachia nynh vaaw te lae kha a rae nin khe,

Ccangpaw Raenaw Kong

⁵ laephi kya ramkaw e aku mah um loh khyh zah ccoukupaw aku mah um loh khyh, pawccecize Bawipaw Pachia nynh laephi vawlan khuaarawsah loh khyh, te laephi vawlan looh ccoukupaw rya a lahtu mah um loh khyh;

⁶ thuasalama tui tuh laephi kyate pou zah laephi balyn kha a ciasah.

⁷ Oute Bawipaw Pachia nynh laephi kya-e laenoi khate ccungccapaw kha a rae, hiinnaw hy kha a naduh lungkhu lang a sawnua; te ccungccapaw tuh ahiinpaw ahysuepaw lang yn tang.

⁸ Te Bawipaw Pachia nynh nithua langkhe Eden kya khokhu ccangkheit a rae; te a raepaw ccungccapaw kha tuin kya a umsah.

⁹ Bawipaw Pachia nynh do ry umpaw te ae lan ahoypaw thingku miakaw kha laephi kyate a posah, khokhu ngaelung khe hiinnaw thingku kha mah a posah, te athya ahoy nynawpaw thingku mah a posah.

¹⁰ Khokhu kha tui bu khylan Eden kyate vaw vakheit pou zah a lua, tuh-e vaw tuh tuin kyate vaw pali lang a phiakuh.

¹¹ Ccangkheitnaw vaw min tuh Pishon acikuh; tuh-e vaw tuh Havilah ram balyn po lekuh lan lua zah tuh-e kyatuin sui a pou;

¹² te tuh-e laelung kya-e sui tuh ahoy; amynkhuhpaw badelah thingphi te oniks lung mah a um.

¹³ Ccangningnaw vaw min tuh Gihon acikuh; tuh-e vaw tuh Kush ram balyn po lekuh lan a lua.

¹⁴ Ccangthumnaw vaw a min tuh Tigris acikuh, tuh-e vaw tuh Assiria ram nithua lang aluapaw nynh thua. Te ccangpalinaw vaw tuh Zufrates acikuh.

¹⁵ Bawipaw Pachia nynh ccungccapaw kha lah zah Eden khokhu kya ryalaw khylan te do-oih khylan tuin kya a nung.

¹⁶ Te Bawipaw Pachia nynh ccungccapaw kha, “Nang nynh khokhu kya umpaw thingku miakaw kya-e athae hae hynh rythyte na ae cih;

¹⁷ thuasalama athya ahoy nynawpaw thingku kya-e athae hynh tuh na ae lan khyh, hynh-e thingthae hynh na ae lanze, na ae nin khe nang tuh na chih cih,” cite kaw a pya.

¹⁸ Oute Bawipaw Pachia nynh, “Ccungccapaw hynh amaw makhaete um lan hoy khyh; amaw hanlan angaekuhpaw bawmtu lu kheit ka raepah cih,” a ci.

¹⁹ Tukeiccuze laephi kya-e sarangpaw miakaw te vaawlang e pavaw miakaw kha Bawipaw Pachia nynh laephi khate a rae, tuh-e hae tuh ccungccapaw nynh muih zah min a phu ccaw cite amaw kalan a cciakhae hae, ccungccapaw nynh ahiinpaw ahysuepaw miakaw kha min a phu thyhte min ccarou a hoi hae.

²⁰ Ccungccapaw nynh sahiin balyn, vaawlang e pavaw hae, te sarangpaw miakaw kha min a phu hae; thuasalama ccungccapaw hanlan angaekuhpaw bawmtu ccangkheit sanmah muih khyh.

²¹ Tukeiccuze Bawipaw Pachia nynh ccungccapaw kha thuhbabi lan a isah; oute Pachia nynh a naru ccangkheit kha lah zah, tuh-e a lawnaw kyakhe ngesaw khate a pingsah.

²² Te Bawipaw Pachia nynh ccungccapaw kyate a lawpaw naru khate ccungccanung kha rae zah ccungccapaw kalan a cciakhae.

²³ Oute ccungccapaw nynh, “Hynh-e hynh ka ru kya-e ru thua zah ka ngesaw kya-e ngesaw nynh thua; Ccungccapaw kyate lawpaw athua keiccuze hynh-e hynh Ccungccanung cite ko athua cih,” a ci.

²⁴ Tukeiccuze pisepaw nynh a nung te a paaw kha cciataw zah a zu te a umkheih hae, te minmin tuh pyn pynkheit lang a tang hae.

²⁵ Te pisepaw te a zu tuh mih ccakaete um hae zah mih maethah khyh.