GENESIS 16 - Zotung Bible 2016

Hagar te Ishmael

¹ Abram a zu Sarai tuh ccaawsaah khyh. Sarai nynh a min Hagar cikuhpaw Izip minphuin seenung lu kheit a hoi,

² Sarai nynh Abram kha, “Bawipaw nynh kae kha ccaaw yn saah sah khyh; ka seenung hynh ikhae tua; aning nynh imua yn saahpah kho,” a cipya. Te Abram nynh Sarai bya kha a ngae.

³ Abram nynh Kanaan ram kya kum haw a um koute a zu Sarai nynh Izip minphuin a seenung Hagar kha a vawpaw Abram kalan zu lang a pya.

⁴ Abram nynh Hagar kha ikhae zah Hagar tuh ccaaw a poi; Hagar nynh ccaaw a poipaw he nyhkuh tuh a bawinung kha pawlangria vae khyh.

⁵ Tetuh Sarai nynh Abram kha, “Hagar nynh pawlang yn ria khyhpaw hynh nang na meseinaw nynh thua, kae nynh ka seenung kha na by kya kae pya zah ccaawpoipaw he a nyhkuh tuh kae kha pawlang yn ria vae khyh. Bawipaw nynh nang te kae laku byapia vae sah,” a cipya.

⁶ Abram nynh Sarai kha, “Na seenung tuh na kuihkaw nynh um; amaw kha na cyi ry thyhte cyih,” a cipya. Tetuh Sarai nynh Hagar kha thawte reih zah Hagar tuh amaw kyate po ccue vae.

⁷ Bawipaw vaawpaw nynh Hagar kha Shur lang ccianaw laanpi kya umpaw ramkaw e tuidy pe khe a muih.

⁸ “Sarai seenung Hagar, paw kyate nae thua zah teilangmou na cceih cih?” a ci. Hagar nynh, “Ka bawinung Sarai kyate nynh kae ccue,” a ci.

⁹ Bawipaw vaawpaw nynh Hagar kha, “Na bawinung kalan kithui lah a kuihkaw khe la um,” a cipya.

¹⁰ Bawipaw vaawpaw nynh Hagar kha, “Na ciihan hae kha riatae um lei lan kae pungthungsahpah cih,” bua a cipya.

¹¹ Te Bawipaw vaawpaw nynh Hagar kha, “Atu ccaaw na poi zah ccapaw lu kheit na saah cih; a min tuh Ishmael cite na phu cih, pawccecize Bawipaw nynh na riathaenaw kha ae nypya.

¹² Ishmael tuh apuapaw lann hawte athua cih, aning nynh ccungccaw miakaw kha a rawse cih zah ccungccaw miakaw nynh amaw kha a rawse cih; te a puizia balyn te arawsekuh lante a um cih,” a cipya.

¹³ Hagar nynh, “Pachia kha ka muih ccaccing, thuasalama ka hiin ung khaw?” ci zah amaw kalan bya yn hopahpaw Bawipaw kha, “El-roi” cite min a phu; pawccecize Hagar nynh, “Yn muihtupaw kha phe ka muih vae khaw?” a ci.

¹⁴ Tukeiccuze tuisung kha Beer-lahai-roi cite a ko hae, tuh-e tuh Kadesh te Bered laku nynh a um.

¹⁵ Te Hagar nynh Abram kha ccapise lu kheit a saahpya; Hagar nynh a saahpyapaw a ccapaw kha Abram nynh Ishmael cite min a phu.

¹⁶ Hagar nynh Ishmael a saahpya lyaze Abram tuh sung tarya kum taruh acih vae.