FILIPI 3 - Zotung Bible 2016

Ahmepaw Dingnaw

¹ Uteno hae, nyathyakou ka ho rypaw tuh, Bawipaw kya nae lungtua sah. Phe alokuhpaw kha nae kalan bua zei lanpaw hynh kae ka hanlan pawtua-ung khyh zah nae hanlan khynnaw nynh thua.

² Ui hae kha la raeringkuh oh, ahoy leipaw rya a lahtu hae kha la raeringkuh oh, mih vingdung a awkuh hae paw kha la raeringkuh oh.

³ Pawccecize aening tuh Muisaw kya Pachia beik hae paw, Khri Jesu kya lungtua hae paw, te pynsaw lante zynkunaw a hoi lei hae paw, vingdungawkuh ccaccing hae paw nynh ah thua oh.

⁴ Tuhzemah kae mah pynsaw kya zynkunaw a hoipaw nynh ka thua. Lukhakheit nynh pynsaw kya zynkunaw ka hoi cite a tuaku ze kae tuh houh ka hoi:

⁵ nin taryanaw kya vingdungawkuhpaw, Israel minphuin, Benjamin ciihan, Hebru hae kyate yn thopaw Hebru paw, Kawbya te asekuh lante Farasipaw;

⁶ beiknaw kya lungthawsaenaw te asekuh lante khriccaawbuu tungvaw a tuaasahtupaw, Kawbya kya umpaw dingnaw te asekuh lante ccaenaw um leipaw nynh ka thua.

⁷ Thuasalama ka hanlan a la thanepaw tuh-e hae balyn tuh Khri keiccuze shungnawpaw lang nynh ka tua vae.

⁸ Tuhpiaze, ka Bawipaw Khri Jesu nynaw asung-e huaccepaw keiccuze pawpaw balyn kha shungnawpaw lang ka tua. Khri keiccuze pawpaw balyn marya ka shung zah, amaw kha mue kho nawlan tuh-e hae tuh athupaw lang nynh ka ria,

⁹ amaw te tynkaring lan kyngku nawlan Kawbya liate muepaw kamaw dingnaw kha ka hoi khyh, thuasalama Khri zynnaw liate muepaw dingnaw, zynnaw liate athuapaw Pachia kya-e dingnaw kha nynh ka hoi.

¹⁰ Ka rypaw tuh Khri te a thoothuinaw kya-e thungnaw kha nyte, a teingnaw kha neethungkubua te a chinaw kya chibua kha nynh thua.

¹¹ A chih hae paw kyate thoothuinaw kalan pawpawte zemah phyabua ka ry.

Eenaw Kuetung kalan Ccue

¹² Kae nynh tuh-e tuh phe ka mue vae, tuhkhyhze eenaw kya phe ka thua vae cipaw thua khyh; thuasalama Khri Jesu nynh kae kha amaw kya-e lang yn raeku vae keiccuze kae nynh tuh-e tuh ccou kho nawlan palei ka zuaku.

¹³ Uteno hae, tuh-e tuh phe ka ccou vae cite ka tuakuh khyh, thuasalama ka cyipaw uccaw ccangkheit tuh: nulang e uccaw hae kha ningte, malang umpaw uccaw hae kha phya lan ka zuaku,

¹⁴ Khri Jesu liate Pachia nynh vaawlang oun konaw te asekuhpaw lasung kha mue khylan eenaw kuetung kalan ka ccuebua.

¹⁵ Tukeiccuze piccan athua vae paw aening nynh tuhcihawpaw tuanaw kha hoi oh sih; te nanning nynh hankhakheit kya ccanglang te na tua oh ze, tuh-e maw tuh Pachia nynh nae kya ae phypah cih oh.

¹⁶ Pawpawte athua zemah, ah zui vae oh paw phung thyhte tynkaring lan po cceih oh sih.

¹⁷ Uteno hae, kamaw thydokuh hae paw thua oh, kaening kyate na mue oh paw dosuinku lanpaw thyhte a hiin hae paw kha la dokuh oh.

¹⁸ Pawccecize ccungccaw patae tuh Khri vaelantung kha rawsete a hiin hae, tuhte a hiin hae cipaw; minmin kong kha palei kae hopah vae oh, atu mitphi te bua kae hopya oh.

¹⁹ Tuh-e hae athangnaw tuh ronaw nynh thua; mih pachia tuh mih vuebua nynh thua, maethya lan umpaw kyakhe a pookuh hae, mih thinlung kya laephi uccaw hae kha nynh a um.

²⁰ Thuasalama aening kya-e ramccungccaw thuanaw tuh vaawlang khua kya nynh a um; tuin kyate yn thua lanpaw Khumtu, Bawipaw Jesu Khri kha ah ngaehoi oh.

²¹ Pawpaw balyn kha amaw zakaw nung khonawpaw thungnaw liate, anyaapaw aening pyn hynh aphu-epaw amaw pyn alo lante oun rulae cih.