EZRA 1 - Zotung Bible 2016

Sairas nynh Judah hae Kisahnaw

¹ Jeremiah nynh a hopaw Bawipaw bya kha ccingsah khylan, Persia siapharan Sairas nynh siapharan lang a tangnaw masaty kum khe, Bawipaw nynh Persia siapharan Sairas thinlung kha a tuhou keiccuze aning nynh kaw a thopaw ccaw kha a peenaw balyn kalan thaesah hae zah:

² “Persia siapharan Sairas nynh hynhte a ho: Bawipaw , vaawlang Pachia nynh laephi peenaw balyn kha yn pya vae zah, Judah ram Jerusalem khua kya amaw hanlan inn sakpya lan kae kha yn naw.

³ Nanning laku kya Pachia ccungccaw athua hae paw miakaw—minmin kyakhe mih Pachia tuh um vae sah! Judah ram umpaw Jerusalem khua langkhe cceihthung hae sah lah, Bawipaw , Israel Pachia inn kha sak hae sah—aning tuh Jerusalem kya umpaw Pachia nynh thua;

⁴ a hiinhy hae paw balyn tuh, pawpaw kya a um hae zemah, mih umnaw e ccungccaw hae nynh Jerusalem khua umpaw Pachia inn elang lungthote silawnawpaw apiaze sui, ngun, uccaw te sahiin hae kha bawm hae sah,” a ci.

⁵ Tetuh Judah phin te Benjamin phin puizia hae kya-e lu hae, ranpibawi hae te Levi phin hae—Pachia nynh mih thinlung kya a tuhou hae paw miakaw tuh Jerusalem khua umpaw Bawipaw inn kha sakthui khylan a cceihthung hae.

⁶ Mih innpaw hae balyn nynh lungthote a hlu hae paw balyn apiaze, ngun angphe hae, sui, uccaw hae, sahiin hae te amee rupaw lasung hae khate a bawm hae.

⁷ Nebukhadnezzar nynh Jerusalem kyate la phu zah a pachia hae inn kya a la nungpaw Bawipaw inn e angphe hae kha siapharan Sairas nynh a poukhae.

⁸ Tuh-e uccaw hae tuh Persia siapharan Sairas nynh sisuakhaan a ngawtu Mithredath kha a thuaasah, te Judah bawi Sheshbazzar kha riapah zah a pya.

⁹ Uccaw ccazing tuh: sui pakekhupaw sung thum, ngun pakekhupaw thong kheit, tangpaw ccangkuin lae takua;

¹⁰ sui pakekhupaw sung thum, ccangpaw ngun pakekhupaw za pali ccanghaw, ccangpaw angphe hae thong kheit;

¹¹ sui te ngun angphe abalyn tuh thong pangaw za pali acih. Kyng hae zah a cciakhae hae paw kha Babilonia kyate Jerusalem lang he a cciakhae hae te, e uccaw hae balyn hynh Sheshbazzar nynh a cciakhae thung.