EXODUS 21 - Zotung Bible 2016

See Kong Upadi

¹ E phungzae hae hynh Israel hae kalan na pya cih hae:

² Hebru ccungccaw athuapaw seepaw kha na re oh ze, kum taruh lungkhu rya ae lawpah cih oh, thuasalama kum sarinaw kyakhe laebah sang aho lei lante a lue vae cih.

³ A makhaete yn thua lanze a makhaete a pou cih; a zu ryte oun thua lanze a zu ryte a pou cih hae.

⁴ A bawipaw nynh zudypah zah, ccanung ccapaw a saah zetuh a zu te a ccaaw hae tuh a bawipaw ccungccaw hae a thua cih hae zah, a makhaete a pou cih.

⁵ Thuasalama seepaw nynh, “Ka bawipaw, ka zu te ka ccaaw hae kha ka sungsah hae, a luepaw ccungccaw lante ka pou ry khyh,” a ci zetuh

⁶ a bawipaw nynh Pachia malang a thuakhae cih; thuakaw kya khyhze thuakawtung kalan a cciakhae cih zah a nakua kha vinawpaw te a vih cih; te a bawipaw rya kha a hiin lungkhu a lah vae cih.

⁷ Ccungccapaw nynh a ccanung kha see lang a zua ze, tuh-e nung tuh seepaw hae hawte luesah thua lan khyh.

⁸ Tuh-e seenung nynh ryalaw a nawtupaw a bawipaw lungry kha a tung khyh lanze a bawipaw nynh ming hae kha shawkuh oh cite a hopah cih hae; a bawipaw nynh tuh-e seenung kha a hynpya keiccuze ramccang hae kalan zuanaw kaw hoi khyh.

⁹ A bawipaw nynh tuh-e seenung kha a ccapaw zu lang a pya zetuh amaw a ccanung hawte a do-oih cih.

¹⁰ Te ccangpaw zu kha a dy zetuh masaty a dypaw a zu hanlan looh, boeining te zu a thuanaw kha langmawlya hawte a pya cih zah a ccuepe cih.

¹¹ E phin thum hynh nopinung hanlan a cyipya khyh zetuh nopinung kha laebah um lei lante phua ngia leite a pousah cih.

Buakunaw Kong Kawbya

¹² Humhung zemah ccungccaw kha phe chih lan a buapaw tuh chia a thua cih.

¹³ Thuasalama Pachia a ccansahnaw thyhte thua zah, tuakutynaw a um leite a chiasei zetuh a ccue nawlan hmin kha ka nungpah cih.

¹⁴ Thuasalama lukhakheit nynh paccynkute ccangpaw ccungccaw kha a chia zetuh ka silawhang kya a reku zemah chia khylan na sue cih oh.

¹⁵ Humhung zemah a paaw thuasah, a nung thuasah a buapaw tuh chia a thua cih.

¹⁶ Humhung zemah ccungccaw kha a ruhpaw tuh a zua zemah thuasah, a kuih kya a nungku zemah thuasah chia a thua cih.

¹⁷ Humhung zemah a paaw thuasah, a nung thuasah thya a lawpaw tuh chia a thua cih.

¹⁸ Lu kheit te lu kheit pekute ziakuh hae zah lu kheit nynh ccangpaw lu kheit kha lung te a tude ze thuasah, a kuihlung te a thung ze thuasah, vaemaw a muetupaw tuh a chi khyh zemah ikhung kya phang a huekuh ze thuasah,

¹⁹ tukoute yn danhua zah hoitang te a ccia kho ze thuasah, a buatupaw tuh detahnaw ing lan khyh, thuasalama a teingtupaw nynh a shungpaw accyh hanlan te phe a danthyanaw hanlan kha a rung cih.

²⁰ See hoitu nynh seepaw khyhze seenung kha tungbang te bua zah phe a chi kangmaw zetuh see hoitu kha detah a thua cih.

²¹ Thuasalama tuh-e see tuh nin kheit khyhze nin ning a hiin zetuh detahnaw um lan khyh; pawccecize tuh-e see tuh a hoitu kya-e uccaw nynh thua.

²² Ccungccaw hae nynh ziakuh hae zah ccaawpoipaw nopi lu kheit kha a pawling hae keiccuze a ccaaw phe roh zah ccangpaw vaemaw a mue khyh zetuh tuh-e nopinung a vawpaw nynh a ngia zeihte a pawlingtupaw kha detah a thua cih zah byapiatu hae nynh byapia hae zeihte a rung cih.

²³ Ccangpaw vaemaw a mue zetuh hiinnaw hanpaw hiinnaw,

²⁴ mit hanpaw mit, haw hanpaw haw, kuih hanpaw kuih, ccu hanpaw ccu,

²⁵ maee-unaw hanpaw maee-unaw, vaemaw hanpaw vaemaw, buanaw hanpaw buanaw khate a liaru cih.

²⁶ See hoitu nynh seepaw khyhze seenung a mit kha phe roh lan a bua zetuh a mit hanlan seetangnaw kyate a luesah cih.

²⁷ See hoitu nynh seepaw khyhze seenung a haw kha a khyasah zetuh a haw mee lang a luesah cih.

Sahiin Hoitu hae hanlan Kawbya

²⁸ Tangnuapaw nynh ccungccaw pise khyhze nopi kha phe chih lan a dia zetuh tangnuapaw kha lung te deih a thua cih zah a saw kha ae lei lan; thuasalama tangnuapaw a hoitu kha tuh detah thua lan khyh.

²⁹ Thuasalama tuh-e tangnuapaw tuh langmaw zemah ccungccaw dia a la mangpaw thua zah a hoitu kha raeringnaw phe a pya vae hae pite a hoitu nynh phang khung leite nung zah ccungccaw kha a chia zetuh tuh-e tangnuapaw tuh lung te phe chih lan deih a thua cih zah a hoitu kha mah chia a thua cih.

³⁰ Thuasalama a hoitu tuh a hiinnaw kha shawkhawku khylan phua rungsah cite khya a thua zetuh khyapyanaw thyhte a rung cih.

³¹ Tuh-e tangnuapaw nynh milae ccapaw khyhze ccanung kha a dia zetuh hynh-e phung thyhte zui a thua cih.

³² Tangnuapaw nynh seepaw khyhze seenung kha a dia zetuh tangnuapaw a hoitu nynh see a bawipaw kha phua shekel sung thum a rung cih, te tangnuapaw kha lung te phe chih lan deih a thua cih.

³³ Lukhakheit nynh laekarung a uasya ze thuasah, laekarung kha karouh zah ahu hu leite a nung ze thuasah, tangnuapaw khyhze lann nynh tuh-e laekarung lungkhu lang a ccaw zetuh,

³⁴ laekarung a hoitu nynh sahiin a hoitu kha phua a rung cih zah a chihpaw sahiin kha a lawkuh cih.

³⁵ Lukhakheit kya-e tangnuapaw nynh milae kya-e tangnuapaw kha phe chih lan a dia zetuh minmin nynh a hiinpaw tangnuapaw kha a zua cih hae zah a mee kha a neekuh cih hae; achihpaw kha mah a neekuh cih hae.

³⁶ Thuasalama tuh-e tangnuapaw tuh langmaw zemah dia a la mangpaw thua zah, a hoitu nynh phang a khung khyh keiccu athua zetuh a hoitu nynh achihpaw tangnuapaw hanlan tangnua sa kheit kha a rung cih zah achihpaw tangnuapaw kha a lawkuh cih.