EXODUS 15 - Zotung Bible 2016

Moses Hlaw

¹ Oute Moses te Israel hae nynh Bawipaw kha hynh-e hlaw a sahpya hae: Bawipaw hanlan hlaw ka sah cih, pawccecize Bawipaw nynh phu-enaw te a tae vae; marang hae te a ccikuhtu hae kha rili lungkhu lang phe a vua vae hae.

² Bawipaw tuh ka thawzung te ka cyi khonaw thua zah yn khumtu nynh thua; amaw tuh ka Pachia thua zah the ka hoysah cih, ka minpaaw hae Pachia thua zah ka hangthung cih.

³ Bawipaw tuh rhawkaw nynh thua, a min tuh Bawipaw nynh thua.

⁴ Faro a marangle hae te a rhawkaw hae kha rili lungkhu lang a vua hae; Faro nynh a po hae paw ryalahtu bawi hae kha Rili Se kya a phung hae.

⁵ Akhupaw rili nynh minmin kha phe a vu hae; akhunaw langkhe lung hawte a ccah hae.

⁶ Pou Bawipaw , na ranglang kuih tuh huhan liate phu-enaw a um. Pou Bawipaw , na ranglang kuih nynh rhaw hae kha phe a sakhia hae.

⁷ Nang ae rawse hae paw kha alepaw na lesaenaw khate na khulia hae; na thinrianaw kha na langsakuh zah minmin kha maee nynh athupaw hawte a u hae.

⁸ Na naduh kyate apoupaw khisan khate tui kha na sueluasakuh zah aluapaw tui kha pang hawte na thungsaku; rili ngaelung kya akhupaw tui tuh tangkarae lan a um.

⁹ Rhaw nynh, ‘Ka deehui cih hae, ka phah cih hae, minmin kya-e luapaw uccaw kha neeku lan zah ka rypaw kha ka lawkuh cih. Ka thaloi kha ka thuaa cih zah ka kuih te minmin kha ka roh cih hae,’ a ci.

¹⁰ Na khisan kha na zawsah zah rili nynh minmin kha pong a vu hae; minmin tuh athawsaepaw tui lungkhu khe kue hawte a ccah hae.

¹¹ “Pou Bawipaw , pachia hae lakuze nang ae lopaw hummou a um? Nang hawte thyaanaw kya huhan a hoipaw, lesaenaw kya ri lan umpaw, ngaeang lan umpaw uccaw a rae khopaw hummou a um?

¹² Na ranglang kuih kha na dyng zah laephi nynh minmin kha phe a laang hae.

¹³ Na shawkhaw hae paw ccungccaw hae kha atynpaw na sungsahnaw te na cciakhae hae; minmin kha na thawzung te athyaapaw na umnaw langkhe na cciakhae hae.

¹⁴ Minphuin hae nynh thae hae zah a thyngkuh hae; thinphangnaw nynh Filistia ram um hae paw kha a thuanua hae.

¹⁵ Oute Edom lupi hae tuh mih thin a phang; Moab cciakhaetu hae tuh a thyngku cih hae; Kanaan hae balyn tuh mih lung a roh.

¹⁶ Rinaw te thinphangnaw nynh mih tungvaw a thuanua hae; Pou Bawipaw , na ccungccaw hae nynh po a ccia makhia hae, na shawkhawpaw ccungccaw hae nynh po a ccia makhia hae, athawsaepaw na kuih liate minmin tuh lung hawte daebabi lan a um hae.

¹⁷ Pou Bawipaw , na hoipaw mua vawlan, na um nawlan na raepaw hmin kalan khe na ccungccaw hae kha na teekhae hae; Pou Bawipaw , na kuih te na tynsahpaw beikinnthyaa kyakhe na nung cih hae.

¹⁸ Bawipaw nynh zungzae te zungzae cia a uk cih,” a ci hae.

Miriam Hlaw

¹⁹ Faro marang hae, a marangle hae, a marangle mawngtu hae tuh rili lungkhu lang tee hae zah Bawipaw nynh rili tui kha minmin vawlan khe tungsakuh zah a luathin hae; thuasalama Israel hae tuh aroupaw laephi vawlan cceih hae zah rili kha a zua hae.

²⁰ Oute Aaron ccianung, profehnung Miriam nynh tyng kha a lawku, te nopi balyn nynh tyng kha khuakute law hae zah Miriam kha a zui hae.

²¹ Miriam nynh hlawsakhae hae zah, “Bawipaw nynh phu-enaw te a tae vae keiccuze Bawipaw kalan hlawsah oh; marang hae te a ccikuh hae paw kha rili lungkhu lang pong a phung vae hae,” a ci.

Akhahpaw Tui

²² Oute Moses nynh Israel hae kha Rili Se kyate pou lan kawpya hae zah Shur laesia ram khe a tee hae. Tuh-e laesia ram kya nin thum cceih hae zah tui muih khyh hae.

²³ Marah kya thua hae zah Marah tui tuh a khya keiccuze neih kho khyh hae. Tukeiccuze tuh-e hmin tuh Marah cite a ko hae.

²⁴ Ccungccaw hae nynh Moses kha, “Pawmou kae neih cih?” cite a ccohnuaku hae.

²⁵ Moses nynh Bawipaw kalan sia zah Bawipaw nynh thing ccangkheit a muihsah; Moses nynh tuh-e thing kha tui lungkhu lang phung zah tui tuh khah vae khyh. Tuin kyakhe Bawipaw nynh zui lanpaw phungbya te phungzae kha minmin hanlan raepah hae zah syntawtua nawlan a nungpya hae.

²⁶ Bawipaw nynh, “Bawipaw nae Pachia bya kha hoyte na ngae oh zah amaw malang ahmepaw kha na cyi oh ze thuasah, a kawbya hae te a upadi balyn kha na zui oh ze thuasah, Izip hae kya ka thuasahpaw ccinaw kha nanning tungvaw ka thuasah lan khyh; pawccecize kae tuh ae dansah oh paw Bawipaw nynh ka thua,” a ci.

²⁷ Oute minmin nynh tuidy haw lae ning te ungcci ku sung sari a umnaw Elim kya thua hae zah tuin kya tui pe khe a rya hae.