DEUTERONOMY 34 - Zotung Bible 2016

Moses Chinaw

¹ Oute Moses tuh Moab bialae kyate Jeriko khua arawlang umpaw Nebo Mua, Pisgah mua dung langkhe a cceihthung, te Bawipaw nynh ram balyn kha a muihsah: Gilead ram kha Dan kyacia,

² Naftali abalyn, Efraim te Manasseh ram, Judah ram balyn kha Niccaw lang e Rili kyacia,

³ Negeb ram, te Bialae athuapaw ungcci ku khua cikuhpaw Jeriko khua kya-e accya te Zoar kyacia.

⁴ Bawipaw nynh Moses kha, “E ram hynh Abraham, Isak te Jakob kya, ‘Nae ciihan hae kalan ka pya cih hae,’ cite bya ka kinpyaku hae paw ram nynh thua; Na mit te kae muihsah vae, thuasalama khuhlang raw na zua lan khyh,” a cipya.

⁵ Tetuh Bawipaw seepaw Moses tuh Bawipaw nynh kaw a pyanaw Moab ram khe a chih.

⁶ Moses tuh Beth-peor araw lang, Moab ram accya khe a uu hae, thuasalama a uunaw hae hmin kha atunin cia hum nynh sanmah nyh khyh.

⁷ Moses tuh za kheit kum kuin a cih te a chih; a mitmoh khyh zah a thawzung mah zyabung khyh.

⁸ Israel hae tuh Moses hanlan Moab bialae kya nin sung thum rawkhuite a um hae; oute Moses hanlan rawkhuinaw ccyh tuh athang.

⁹ Moses nynh a kuih kha Nun ccapaw Joshua tungvaw a la khang vae keiccuze, Joshua tuh hawnaw muisaw te phe a beih; Israel hae nynh Joshua bya kha ngae hae zah, Bawipaw nynh Moses kaw a la pya hawte a cyi hae.

¹⁰ Bawipaw nynh mitmae hawiliakute a nypaw Moses tahawpaw profeh tuh Israel hae kya kharouh langkuh boi khyh.

¹¹ Bawipaw nynh Moses kha saw zah, Izip ram kya um hae paw Faro te a see hae balyn te a ram kya-e ccungccaw balyn kyakhe muihsahnaw te ngaeangnaw balyn kha a rae hawte ccangpaw profeh nynh rae boi khyh.

¹² Moses nynh Israel hae balyn mitmuihnaw kya a cyipaw athawsaepaw huhan te le zah ri lan umpaw cyisahnaw hae balyn hawte a cyih khopaw ccangpaw profeh um boi khyh.