DEUTERONOMY 33 - Zotung Bible 2016

Israel hae Nyathya Moses Hythua Pyanaw

¹ E hynh Pachia ccungccapaw Moses nynh a chi mawkhe Israel hae hythua a pya hae paw nynh thua.

² Moses nynh: “Bawipaw tuh Sinai mua kyate yn thua zah, Seir kyate aening tungvaw khuanin lang yn thua; Paran Mua kyate yn aw. Amaw ryte mithyaa thong haw a umbua hae; A ranglang kuih kya aruapaw maee a ccyng.

³ A ccungccaw hae kha a sungsah ccaccing hae; a mithyaa hae balyn tuh a kuih kya a um hae; tukeiccuze amaw kya-e ccangpyanaw kha lawkute, a ccunoh kha a zui hae

⁴ Moses nynh upadi kha Jakob phin zapi hae kha pee lan yn pya.

⁵ Ccungccaw cciakhaetu hae ryte Israel phin balyn tuh pynkheihlan he a sueluakuh hae te, Bawipaw tuh Jeshurun kya siapharan lang a tang.

⁶ Reuben tuh a ccungccaw azya zemah, hiinsah lah, chih nan sah,” a ci.

⁷ Te Judah kong kha: “Pou Bawipaw , Judah roi kha ngaepya tua, a ccungccaw hae kalan cciakhae tua; amaw hanlan a kuih kha thawsaesah tua, a rhaw hae dounaw kya bawmtu thuatua,” cite a ho.

⁸ Te Levi kong kha: “Na Thummim te na Urim kha Massah kya na syntawtuapaw, Meribah tui kya na rawsepaw, alungzipaw na ccungccapaw Levi kalan pyatua;

⁹ tuh-e ccungccapaw nynh, ‘Minmin kha pawlang ka ria khyh hae,’ cite a nung te a paaw kong kha a ho; a puizia hae kha peki khyh zah, a ccaaw hae kha nyh khyh. Pawccecize na bya kha ngae hae zah, na byakinnaw kha a tynsah hae.

¹⁰ Minmin nynh Jakob phin kha na phungzae a ccangpah cih hae zah, Israel phin kha na upadi a ccangpah cih hae; na malang khe mynkhuhpaw kha thuasah, na silawhang kyakhe maee-ute silawnawpaw abalyn kha thuasah a nung cih hae.

¹¹ Pou Bawipaw , a sisua kha hythuapya lah, a kuih ryalawnaw kha ccoupya tua; amaw a hua hae paw a rhaw hae tuh bua a thoku khyh ccaw hae, mih cce kha khyatua hae,” cite a ho.

¹² Benjamin kong kha: “Bawipaw nynh a sungsahpaw tuh amaw kyakhe khyndadyh lan a um, Ahangpaw Pachia nynh amaw kha ninlang thungkhaw zah, a raw te a raw laku khe a umsah,” cite a ho.

¹³ Te Josef kong kha: “A ram tuh Bawipaw liate, ahangnaw vaawram kya-e ahoypaw lasung hae khate thuasah, akhunaw e akawlankou umpaw khate thuasah,

¹⁴ khuanin liate apoupaw thae hoypaw te sawpaw liate apoupaw ahoypaw khate thuasah,

¹⁵ langmawlya te a la umpaw mua hae nynh a pousah hae paw ahoy huapaw khate thuasah, zungzae tynpaw mua hae kya-e athae hoypaw patae khate thuasah,

¹⁶ laephi kya-e ahoypaw lasung hae te laephi nynh a pousahpaw aphuinphuin khate thuasah, Sinai mua vawlan a umpaw phungbaryh kya-e sungsah thawccinaw khate thuasah hythuanaw muesah. Hynh-e hae hynh a upaw hae laku kya bawi athuapaw Josef lu vawlan thua hae sah.

¹⁷ Tangnuapaw thanty tuh lesaenaw hoi zah, a ki hae tuh saccung ki nynh thua; tuh-e a ki hae khate ccungccaw hae kha laephi athangnaw cia a dia cih hae; tuh-e hae tuh Efraim ccungccaw thong haw thua hae zah, tuh-e hae tuh Manasseh ccungccaw athong-asan hae nynh thua,” cite a ho.

¹⁸ Zebulun kong kha: “Pou Zebulun, khua na ccongnaw kya na lungtua sah; Pou Issakhar, na bu lungkhu kya na lungtua sah.

¹⁹ Minmin nynh ccungccaw hae kha mua lang ko hae zah, tuin kyakhe ahmepaw silawnaw hae kha a rae hae; pawccecize rili hoirumnaw te laesia kya-e thuruhpaw sisua kha minmin nynh a ccou hae,” cite a ho.

²⁰ Te Gad kong kha: “Gad a pungzaesahtu tuh thehoysah thuasah! Gad tuh chindeih hawte nynh a um; aning nynh kuihbaw te lukhy kha a pae.

²¹ Aning nynh amaw hanlan ahoy huaccepaw kha a poku, pawccecize tuin kyakhe cciakhaetu nynh a ccou lanpaw kha amaw hanlan taekhiate nungpya athua; ccungccaw hae a cciakhaetu hae kalan yn thua zah, Bawipaw kya-e dingnaw te a phungzae hae kha Israel hae hanlan a rae,” cite a ho.

²² Te Dan kong kha: “Dan tuh Bashan kyate yn thohkuhpaw chindeih anopaw nynh thua,” cite a ho.

²³ Te Naftali kong kha: “Pou Naftali, sungsah thawccinaw khate lungryccing khaekuh lah, Bawipaw kya-e hythuanaw te phe beihpaw niccaw lang te alia lang kha ccoutua,” cite a ho.

²⁴ Te Asher kong kha hynhte a ho: Asher tuh ccapaw hae kyaze hythuanaw a ccou huaccepaw nynh thua, a uno hae nynh a sungsahua hae paw thuasah lah, a ccu tuh chitui lungkhu dung sah.

²⁵ Na pangccaw hae tuh sivaw te sohin thua hae zah, Na hiin lungkhu na thawzung um sah.

²⁶ Pou Jeshurun, nang bawm khylan, lesaenaw te phe beih zah vaawlui a ccikuhpaw Pachia tahawpaw um khyh.

²⁷ Zungzae hiinpaw Pachia tuh na umnaw hmin nynh thua, nang bawm khylan zungzae tynpaw kuihbaw a um. Te na rhaw hae kha na malang te sakhia hae zah, “Roh oh!” a ci.

²⁸ Tukeiccuze Israel tuh khyndadyh lan a um, vaawlui nynh vuiraw a ccawsahnaw, ccathae te misutui alungnaw ram kya umpaw Jakob a umnaw tuh vawsawnaw um khyh.

²⁹ Pou Israel, nang tuh lungtuapaw nynh na thua! Bawipaw nynh nang hawte a khumpaw ccungccaw hummou a um? Aning tuh nang ae bawmtu khawriaphua thua zah, na taenawpaw thaloi nynh thua! Na rhaw hae tuh maemuihtangte na kalan oun thua cih hae zah, mih ke kha na syde cih hae.