DEUTERONOMY 19 - Zotung Bible 2016

Khynnaw Khuapi hae Upadi

¹ Bawipaw nae Pachia nynh ae pya cih oh paw ram kya-e minphuin hae kha Bawipaw nae Pachia nynh maemih hae zah, nanning nynh na dee oh zah mih khua hae kya te mih inn hae kya he na um oh te,

² Bawipaw nae Pachia nynh nanning ccou khylan ae pya cih oh paw ram kya-e khuapi khua thum kha na phia cih oh.

³ Ccungccaw a theihtu nynh tuh-e khua khuakhakheit kalan khe a ccue ccaw cite, Bawipaw nae Pachia nynh nanning ccou khylan ae pya oh paw ram kha ccangthum lang na phia cih oh zah, laanpi kha na paccyn cih oh.

⁴ E hynh tuh-e khua lang ccue zah a umpaw ccungccaw a theihtupaw konglang nynh thua, tuh-e tuh huakunaw a la um lei pite ccangpaw ccungccaw kha tuaku ty leite a theihtupaw nynh thua:

⁵ Lukhakheit tuh ccangpaw ccungccaw te thing nge lan ramkaw lang a cceih hae, te (minmin kya-e) lu kheit nynh thingku kha hae te a nge lyakhe, hae tuh haerakoh kyate poh kinsei zah ccangpaw ccungccaw kha a tungsei keiccuze phe a chi lanze, tuh-e a theihtupaw tuh tuh-e khuapi hae kya-e khuakhakheit kalan khe a ccue cih zah a hiin cih.

⁶ Tuhkhyhze tuh, minmin lu ning laku kya huakunaw a la um leipaw thua zah a theihtupaw kha chia lan accan lei pite laanpi tuh myaryamaw asaw lanze, chiise phulahtu nynh thinria lungsote a deehui cih zah he a phah te a theihsei cih.

⁷ Tukeiccuze khuapi khua thum kha na phia cih oh cite kaw kae pya oh.

⁸ Bawipaw nae Pachia nynh nae minpaaw hae kya bya a kinpyaku hae hawte, nae ram kha kosah zah, nanning pya lan cite nae minpaaw hae bya a kinpyaku hae paw ram balyn kha ae pya cih oh zah,

⁹ Bawipaw nae Pachia kha sungsahte thuasah, a laanpi zungzae zuite thuasah atunin kaw kae pya oh paw hynh-e kawbya balyn hynh zuakute na zui oh zetuh, hynh-e khuapi khua thum koute ccangpaw khua thum kha na lungsah chih cih oh,

¹⁰ tuhteze nynh Bawipaw nae Pachia nynh rho lang ae pya cih oh paw ram kya seinaw a hoi leipaw chii kha luasah thua lan khyh, te chiise luasahnaw mee kha nae tungvaw ccah lan khyh.

¹¹ Thuasalama lukhakheit nynh ccangpaw ccungccaw kha a hua keiccuze zya buhkhawte bua zah phe a theih koute tuh-e khuapi khuakhakheit kalan a ccue zetuh,

¹² a theihtupaw a umnaw khuapi kya-e piccan hae nynh ccungccaw a saw cih hae zah atheitupaw kha oun thuakhae cih hae, te amaw kha chia khylan chiise phulahtu kuih kalan a pya cih hae.

¹³ Ngaethya na umsah lan khyh oh; ngedang lungpawte na um nawlan oh, seinaw a hoi leipaw kya-e chiise mee seinaw kha Israel kyate na ccikan cih oh.

Langmaw She e Ramri hae

¹⁴ Bawipaw nae Pachia nynh nanning ccou khylan ae pya cih oh paw ram kyakhe, nae hanlan neethung athuapaw laephi kya, langmaw she e ccungccaw hae nynh a la bing hae paw nae innpaw kya-e loori kha na nue lan khyh oh.

Ccaekia Upadi

¹⁵ Lukhakheit nynh a la cyipaw hoyleinaw kong te kyngkuh zah, hoyleinaw a cyihseipaw khyhze seinaw a raepaw lukhakheit detah lanpaw tuh ccaekia lu kheit te zaw lan khyh. Ccaekia lu ning khyhze lu thum nynh a ho hae paw bya te rou nynh seibenaw tuh tynsah athua cih.

¹⁶ Huanaw thinlung a hoipaw ccaekia nynh a cyihseipaw lukhakheit kha seibe khylan yn thua lanze,

¹⁷ lu ning maw te Bawipaw malang thuasah, tuh ccyh lyaze rya a lahpaw ranpibawi hae te byapiatu hae malang thuasah a langkuh cih hae,

¹⁸ te byapiatu hae nynh akaw-aleih pong a khia cih hae. Ccaekiakhantu tuh ahme leipaw ccaekia thua zah, ccangpaw ccungccapaw kha rawsete ahme lei lante ccaekia a khanku lanze,

¹⁹ ahme leipaw ccaekia nynh tuh-e ccungccapaw tungvaw cyi lan a tuaku hawte, tuh-e ahme leipaw ccaekia tungvaw khe na cyih cih oh. Tuhcite hoyleinaw kha nanning laku kyate na ccikan cih oh.

²⁰ Tuhlaepaw ccungccaw hae nynh a thae hae te a rih cih hae zah, tuhcihawpaw hoyleinaw tuh nanning laku kya kharouh rae vae lan khyh hae.

²¹ Ngaethyaumsah nan oh: hiinnaw hanlan hiinnaw, mit hanlan mit, haw hanlan haw, kuih hanlan kuih, ccu hanlan ccu athua cih.