DANIEL 7 - Zotung Bible 2016

Sarepaw Sa Pali Vizin

¹ Belshazzar nynh Babilon siapharan lang a tangnaw kum kheitnaw kum khe, Daniel tuh a i lyakhe maansah zah vizin kha a muih. Tetuh a maan kha a zei, tuh-e tuh hynhte nynh thua:

² Kae, Daniel nynh khuazi ka vizin kyakhe teitei lang balyn te khisan yn zaw zah rilipi kha tuileih a thosah,

³ te myarya le hae paw sarepaw sa pali tuh rili lungkhu te oun pou hae zah, sa kheit te sa kheit lokuh khyh hae.

⁴ Masaty e sa kheit tuh chindeih te lokuh zah, mosipi sake a hoi. Tuhcite ka do lyakhe a sake hae kha khaee athua, laekhu kyate apyn kha hangthung thua zah, ccungccaw ccu alopaw ccu ccangning khate a thadyn; te aning tuh ccungccaw thinlung kha pya athua.

⁵ Ccangningnaw sarepaw tuh yn langkuh zah, vong te nynh aloku. Anuhlang ccu te thadyn zah, a haw te naru ccangthum kha a tei, te amaw kha, “Thokuh, saw hae kha patae ae!” cite a hopya hae.

⁶ E koute, ka do lyakhe, kaesing te alokuhpaw ccangpaw sa kheit tuh yn langkuh. A ke kya pavaw sake ccangpali a hoi, alu ccangpali hoi zah uknaw kaw kha pya athua.

⁷ E koute, khuazi vizin kyakhe, myaryamaw a thawsae zah ri lan umpaw ccangpalinaw sarepaw kha ka muih. A haw tuh myarya lepaw sivaw nynh thua, zoihtatyh lan a khae koute alaepaw kha a ccu te a syde. Aning maw e sarepaw hae te lokuh khyh, aki ki haw asae.

⁸ A ki ka do cciamang lyakhe, aki hae laku kyate ccangpaw aki taraw ki kheit tuh yn langkuh; tuh-e aki taraw a um nawlan, a umty hae paw aki ki thum kha atharui ryte phoh athua hae. Tuh-e aki taraw kyakhe ccungccaw mit alopaw mit um hae zah, lysakunaw bya a hopaw mung ccangkheit a um.

Pachia Byapianaw

⁹ Ka do lyakhe, bawitungkhung kha nya thua zah, avawlan khe zungzae hiinpaw tuh a haung, a boeining tuh vuiraw hawte raw zah, a sang tuh tuuming thyaararihpaw te nynh aloku; a bawitungkhung tuh ezazaepaw maeesoi thua zah, a leccu hae tuh arua cciamangpaw maee nynh thua.

¹⁰ A umnaw kyate maee tuh aluapaw vaw hawte a pou. Ccungccaw athong patae nynh ryalawpah hae zah, a malang khe ccungccaw athong-asan a thadyn hae. Byapianaw kha tho hae zah ccauh kha a kia hae.

¹¹ Ka do cciamang lyakhe, tuh-e ki taraw nynh a hopaw lysakunaw bya accaepaw keiccuze, tuh-e sarepaw kha theih hae zah apyn kha maee te a u hae.

¹² Tuhlaepaw sarepaw hae tuh mih uknaw kha lawpya athua hae zemah, khyapyapaw accyh kyacia mih hiinshe asae.

¹³ Khuazi vizin ka muihpaw kyakhe, ccungccaw alopaw lu kheit tuh vaawlang e maeking khate yn cciapaw kha ka muih. Te zungzae hiinpaw kalan cceih zah, a malang a thua.

¹⁴ Bya aphuinphuin ho hae paw minphuin hae balyn nynh amaw rya kha a lawpya hae, uknaw kaw, phu-enaw te siapharan lang tangnaw tuh amaw kha pya athua. A uknaw tuh azo cih leipaw zungzae tynpaw uknaw thua zah, a siapharan thuanaw tuh papin roh lan khyh.

Daniel A Vizin Ccaesahnaw

¹⁵ Kae, Daniel tuh ka lungkhu kya ka lungvawsaw zah, ka muihpaw vizin nynh ka thin yn phangsah.

¹⁶ E hae balyn konglang ahmepaw kha khiatua khylan, ka pe um hae paw kya-e lu kheit kalan khe ka cceih. Tukeiccuze aning nynh asuilan kha kae hopah cih yn cipah zah hynhte yn hopya:

¹⁷ E sarepaw alepaw sa pali tuh, laephi vawlan yn langkuh cih paw uknaw ccangpali nynh thua.

¹⁸ Thuasalama Ahang Huaccepaw Pachia mithyaa hae nynh peenaw kha a mue cih hae zah, tuh-e peenaw kha zungzae te zungzae cia a ccou cih hae.

¹⁹ Te sarepaw sapalinaw konglang ahmepaw kha ny ka ry; tuh-e sarepaw tuh ccangpaw hae balyn te lokuh khyh, ri lan myarya um zah a haw tuh sivaw haw nynh thua, te sohin ccutin a hoi, zoihtatyh lan a khae koute alaepaw kha a ccu te a syde;

²⁰ a lu vawlan e aki ki haw konglang kha ny ka ry, te nyalangte aki ki kheit yn sae zah, he yn sae takaw te ccangpaw aki ki thum hae kha poh phoh zah, mit te lysakunaw bya a hopaw mung a hoi keiccuze ccangpaw ki hae laeze alesae huapaw tuh-e aki konglang kha mah ny ka ry.

²¹ Ka do lyakhe, zungzae hiinpaw yn thua maw tuh, tuh-e ki tuh mithyaa hae te rhawdoukuh hae zah a tae hae,

²² te Ahang Huaccepaw kya-e mithyaa hae hanlan byapianaw kha raepya thua zah, tuh-e mithyaa hae nynh peenaw kha a ccou hae ccyh tuh yn thua.

²³ Aning nynh a hopaw tuh: “Sarepaw sapalinaw tuh, laephi vawlan hin ccangpalinaw peenaw yn um cih zah, tuh-e peenaw tuh ccangpaw peenaw hae te lokuh lan khyh; tuh-e peenaw nynh laephi pynpi kha khaleih a ae cih, a syde cih zah zoihtatyh lan a koi cih.

²⁴ Ki kihaw tuh, tuh-e peenaw kyate yn langkuh cih paw siapharan lu haw kha thua hae zah, tuh-e hae koute ccangpaw siapharan lu kheit yn langkuh cih. E siapharan tuh atakaw e siapharan hae te lokuh lan khyh zah, siapharan lu thum hae kha a tae cih hae.

²⁵ Aning nynh Ahang Huaccepaw Pachia kha rawse bya a honua cih zah, Ahang Huaccepaw kya-e mithyaa hae kha vawsaw a pya cih hae, athyaapaw accyh hae te kawbya kha rulae lan a zuakuh cih; mithyaa hae kha a kuih kya ccyh kheit, ccyh ning, ccyh angankuh cia pya athua cih hae.

²⁶ Te byapianaw a um cih, a uknaw kha lawpya athua cih zah maemihpya te khaleih ropya athua cih.

²⁷ Vaawlui zakaw umpaw siapharan thuanaw, uknaw kaw te peenaw hae kya-e lesaenaw tuh Ahang Huaccepaw kya-e mithyaa hae kha pya athua cih hae; mih peenaw tuh zungzae tynpaw peenaw athua cih, kawhoitu hae balyn nynh rya a lawpah cih hae zah mih kaw a ngae cih hae,” a ci.

²⁸ E kyahin e kong tuh athang vae. Kae, Daniel tuh myarya ka thinphang zah, ka maesue phe rulaekuh; thuasalama e uccaw hae hynh ka thinlung kya tyty ka nung.