BYAPIATU 5 - Zotung Bible 2016

Deborah Hlaw

¹ Tuin nin khe Deborah te Abinoam ccapaw Barak nynh hlaw a sah hae paw tuh:

² “Israel hae nynh rhawtuk lan byapaeku hae; Israel hae nynh lungthote mih pyn a pyaku hae keiccuze Bawipaw kha thehoysah oh!

³ “Pou siapharan hae, thaetua oh; pou bawi hae, ngaetua oh; Bawipaw kha hlaw ka sahpah cih, Israel Pachia, Bawipaw kha roi hoypaw te the ka hoysah cih.

⁴ “Pou Bawipaw , Seir mua kyate he na cceih te, Edom ram kyate he na cceih te, laephi tuh hy zah vaawlang te khuaarah, maeking nynh khuaa a rawsah.

⁵ Bawipaw malang khe mua hae tuh a hy hae, Israel Pachia, Bawipaw malang khe Sinai mua tuh a hy.

⁶ “Anath ccapaw Shamgar she lya, Jael she lya tuh laanluepi hae tuh daetedae hae zah, khuaccong hae paw nynh laanpi abypaw kha a zui hae.

⁷ Nang, Deborah nynh Israel ram kya nung hawte na thoku maw tuh Israel ram tuh daetedae.

⁸ Israel nynh pachia thawpaw hae kha he a pokuh hae tuh, koikua hae kya rhawtuk aso. Israel ccungccaw thong sung pali kya khawriaphua thuasah, ccoi thuasah ccangkheit san muih lan a um zawtou?

⁹ Ccungccaw hae laku kya lungthote mih pyn a pyakuh hae paw Israel rhawbawi hae kya ka thinlung a um. Bawipaw kha thehoysah oh!

¹⁰ “Arawpaw lann hae a ccikuh hae paw, amee rupaw boei vawlan a haung hae paw, laanpi kya a cceih hae paw nanning, e konglang hynh hotua oh.

¹¹ Tui bunaw hmin hae kya hlawsah hae paw roi, tuin kyakhe minmin nynh Bawipaw taenaw kha bua a siakhae hae, Israel lungkhu e a khua taraw hae taenaw kha bua a siakhae hae. “Bawipaw ccungccaw hae tuh mimaw koikua kalan a cceih cih hae.

¹² “Thokuh, thokuh, Deborah! Thokuh, thokuh, hlawsahtua! Thoku tua, Barak, pou Abinoam ccapaw, na kyng hae paw kha ccanglang cciakhae hae.

¹³ Te a laehypaw ccungccaw hae tuh a cceihbung hae; Bawipaw ccungccaw hae tuh a thung hae paw kha rawsete amaw hanlan a cceihbung hae.

¹⁴ Efraim kyate accya lang a cceih hae, Benjamin, nang te na puizia hae kha a zui hae; Makhir kyate rhawbawi hae, Zebulun kyate rhawbawi hoitang a ccyngkuh hae paw a cceih hae;

¹⁵ Issakhar bawi hae tuh Deborah ryte oun cceih hae, Issakhar tuh Barak tungvaw a lungzi; minmin tuh accya langkhe Barak nulangte a deekuh hae. Reuben phin hae laku kya thawmawte tua lanpaw a um.

¹⁶ Tuuphu hae konawpaw phyly roi kha thae khylan, pawccemou tuuphu kya phang na um? Reuben phin hae laku kya thinlung phiakunaw a um.

¹⁷ Gilead tuh Jordan vaw khuraw lang a um. Pawccemou Dan tuh sanphalung hae kya a um? Asher tuh rili kin, a sanphalung hae thadynnaw pe kya daebabi lan a um.

¹⁸ Zebulun tuh a hiinnaw pyaku ciate a rawthung; Naftali mah ramkaw ahangnaw kya chi ciate a rawthungpaw nynh thua.

¹⁹ “Siapharan hae tuh oun cceih hae zah rhaw a tuk hae; Megiddo tui pe, Taanak khua khe Kanaan siapharan kha a tuk hae; thuasalama phua kha luadete mue khyh hae.

²⁰ Vaawlang te awsi hae nynh a tuk hae, mih laanpi kya ccia lalia te Sisera kha a tuk hae.

²¹ Kishon vawpi nynh minmin kha a lou hae, a thawrupaw tuithaw, athawsaepaw Kishon. Pou ka muisaw, thawsaenaw te po cciatua!

²² “Tetuh marang hae tuh mih ccukoh te laephi kya suakute roi phe ccae lante a ccue hae.

²³ “Meroz kha thyalaw oh, cite Bawipaw vaawpaw nynh a ci, a kya um hae paw kha phe ccih lante thyalaw oh, pawccecize Bawipaw bawm khylan oun cceih khyh hae, a thungpaw kha rawsete Bawipaw kha bawm khylan oun cceih khyh hae.

²⁴ “Ken minphuinnung Heber zu Jael tuh nopi hae kyaze hythua a ccou huacce nung thua zah, bu kya umpaw nopi hae kyaze hythua a ccou huacce nung nynh thua.

²⁵ Sisera nynh tui ngia zah mateitui kha a pya, bawi banang te samateihaw kha a pya.

²⁶ Bu khiadenawpaw ccong kha lawkuh zah, a ranglang kuih te ryalawnawpaw khynlyng kha ccyngte Sisera kha bua zah a lu kha a tude, a nakalia kha po zua lan a thuing.

²⁷ Siseria tuh bakhung zah a khuliakuh, Jael ccu kya a huekuh; Jael ccu kya bakhung zah a khuliakuh; a bakhungnaw kya chih zah a huekuh.

²⁸ “Thanlan-aw kyate a do, Sisera a nung nynh zokhawboei kyate do zah: ‘Pawccemou a marangle tuh khaw cia yn thua khyh? Pawccemou a marangle ccu aroi tuh ccyh aro?’ a ci.

²⁹ A haw huapaw a nopi hae nynh bya a khung hae; amaw toulou nynh mah byakhungkuh zah:

³⁰ ‘Luadepaw uccaw kha muih hae zah a neekuh cciamang hae ngawrei? Rhawkaw miakaw hanlan liaccaw lu kheit tou lu ning tou, Sisera hanlan asi ohkuhpaw luadepaw boeining, haetapaw soikuh zah asi ohkuhpaw luadepaw boeining, ka nging kya oiku lanpaw haetapaw soikuh zah asi ohkuhpaw luadepaw boeining zung ning kha a neekuh cciamang hae ngawrei?’ a ci.

³¹ “Pou Bawipaw , tuhcite na rhaw hae balyn tuh marya roh hae sah! Thuasalama na ruiban hae tuh a thungnaw te yn thuapaw khuanin hawte thua hae sah,” cite hlaw a sah hae. Te ram tuh kum sung pali adae.