BYAPIATU 4 - Zotung Bible 2016

Deborah te Barak

¹ Ehud a chih koute Israel hae nynh Bawipaw muihnaw kya hoyleinaw kha bua a rae hae.

² Tukeiccuze Bawipaw nynh Hazor khua a ukpaw Kanaan siapharan Jabin kuih kya a zua hae; a rhawbawipaw tuh Harosheth-hagoiim kya umpaw Sisera nynh thua.

³ Tetuh Israel hae nynh Bawipaw kalan bawmnaw ngiakute a sia hae; pawccecize Jabin tuh sivaw marangle za takua hoi zah Israel hae kha kum kuin lungkhu thawte a tuaa a sah hae.

⁴ Tuh ccyh lyakhe Lappidoth zu, profehnung Deborah tuh Israel hae kya byapiatu lang a tang.

⁵ Aning tuh Efraim muaram e Ramah khua te Bethel khua laku umpaw Deborah ungcci ku kaw khe leih haung zah, Israel hae tuh byapiaku lan a kalan leih a thua hae.

⁶ Naftali ram, Kedesh khua umpaw Abinoam ccapaw Barak tuh Deborah nynh kosah hae zah, “Bawipaw , Israel Pachia nynh nang kha, ‘La cceih lah, Naftali phin te Zebulun phin kya-e ccungccaw thong haw kha Tabor Mua lang ko hae.

⁷ Jabin a rhawbawi lepaw Sisera tuh a marangle hae te a rhawkaw hae ryte Kishon vaw kin khe nang te tungku khylan kae cciakhae cih zah, na kuih kya kae ap cih,’ cite kaw ae pya,” a cipya.

⁸ Barak nynh Deborah kha, “Nae cciakhae zetuh ka cceih cih; nae cciakhae khyh zetuh ka cceih lan khyh,” a cipya.

⁹ Te Deborah nynh, “Kae cciakhae ccaccing cih; thuasalama na laanccia nynh phu-enaw ae ccousah lan khyh, pawccecize Bawipaw nynh Sisera kha nopi kuih kya a zua cih,” a cipya. Te Deborah tuh thokuh zah Barak ryte Kedesh khua lang a cceih hae.

¹⁰ Barak nynh Zebulun te Naftali kha Kadesh lang a ko hae; rhawkaw thong haw nynh a zui hae; Deborah mah amaw kya a cceihbua.

¹¹ Ken minphuinpaw Heber tuh Moses a pupaw Hobah ciihan ccangpaw Ken minphuin hae kyate phiakuh zah Kedesh pe, Zaanannim kya umpaw phaesi ku kaw khe bu sakkute a um.

¹² Abinoam ccapaw Barak tuh Tabor Mua lang a kaethung cipaw kha Sisera kya he a hopah hae tuh,

¹³ Sisera nynh a marangle balyn, sivaw marangle za takua te amaw kya um hae paw rhawkaw hae kha Harosheth-hagoiim khua kyate Kishon Vaw kyacia a pum hae.

¹⁴ Te Deborah nynh Barak kha, “Thokuh! Atunin tuh Bawipaw nynh Sisera kha na kuih kya ae pya nin nynh thua. Bawipaw tuh na malang a cceih ccaccing,” a cipya. Tukeiccuze Barak tuh ccungccaw thong haw ryte Tabor Mua kyate a cceihbung hae.

¹⁵ Bawipaw nynh Sisera te a marangle hae balyn, a rhawkaw hae balyn kha Barak malang khe mih lung a muasah hae; Sisera tuh a marangle kyate rung zah a ccu te a ccue.

¹⁶ Barak nynh marangle hae te rhawkaw hae kha Harosheth-hagoiim kyacia a dee hae. Sisera a rhawkaw hae balyn tuh lu kheit san a laehy lei lan ciate thaloi te a chih hae.

¹⁷ Sisera tuh Ken minphuinpaw Heber zu Jael a bu kyacia a ccu te a ccue; pawccecize Hazor siapharan Jabin te Ken minphuinpaw Heber phin tuh a ccawkuh hae.

¹⁸ Sisera te tungku khylan Jael nynh yn toinuakuh zah, “Rang, ka bawipaw, ka kalan yn cceih, rih nan,” a cipya. Tukeiccuze aning tuh Jael bu lungkhu lang tee zah, Jael nynh boei te a bong.

¹⁹ Te Sisera nynh Jael kha, “Ka tuihaw zah nia lanpaw tui beihtaraw yn pyabua,” a cipya. Tukeiccuze Jael nynh vaetua mateitui saving bawng kha hung zah a niasah koute boei te bua a bong.

²⁰ Sisera nynh Jael kha, “Bu thuakaw kya thadyn lah, lukhakheit nynh, ‘E kya ccungccaw a um tou?’ cite ae khia ze, ‘Um khyh,’ na cipah cih,” a cipya.

²¹ Thuasalama Sisera tuh a thawbang zah a i lyakhe, Heber zu Jael nynh bu khiadenawpaw ccong te khynlyng kha ccyngkute yccae leite ccianua zah laekhu lang po zua lan a nakalia kha khiade zah phe a chih.

²² Sisera a deehuipaw Barak nynh he yn tee lyakhe, Jael nynh tungku khylan toinuakuh zah, “Rang, na ccungpaw ccungccapaw kha kae muihsah cih,” a cipya. Tukeiccuze Barak tuh Jael bu lungkhu lang a tee; a nakalia kya ccong phang bingkuhpaw, a huekuhpaw Sisera rhua tuh tuin kya a la um.

²³ Tuhcite tuin nin khe Pachia nynh Kanaan siapharan Jabin tuh Israel hae malang khe a biabung.

²⁴ Kanaan siapharan Jabin kha a ro mawlaezung hae, Israel hae kuih tuh houhouh athung.