BYAPHY 22 - Zotung Bible 2016

Hiinnaw Tui

¹ Tuinte vaawpaw nynh Pachia bawitungkhung te Tuutaw bawitungkhung kyate yn luapaw, lung-awmatei hawte awrarihpaw hiinnaw tui vawpi kha yn muihsah.

² Tuh-e vawpi tuh khualae e laanpi angaelung khe lua zah, tuh-e vawpi sirawkhuraw te thingthae phuin haw lae ning a thaepaw hiinnaw thingku a um; tuh-e thingku tuh sawpaw sah takyhte athae thae zah, tuh-e thingku anaw tuh minphuin hae dansahnaw hanlan nynh thua.

³ Thyalawnaw kharouh um vae lan khyh, Pachia kya-e te Tuutaw kya-e bawitungkhung tuh tuh-e khuapi kya a um cih zah, Pachia rya a lawpatu hae nynh amaw kha a beik cih hae.

⁴ Minmin nynh amaw mae kha a muih cih hae zah amaw min tuh mih terui kya zei athua cih.

⁵ Tuin kya khuazi um vae lan khyh; minmin tuh maeekhua kya-e awnaw te khuanin kya-e awnaw kha ho vae lan khyh, pawccecize Bawipaw Pachia nynh minmin kha awnaw a pya hae, minmin nynh zungzae te zungzae cia a uk vae cih hae.

⁶ Vaawpaw nynh kamaw kha, “Hynh-e bya tuh zyn lan umpaw te ahmepaw nynh thua. Profeh hae muisaw a peetu Bawipaw Pachia nynh aro mawze yn cyihkuh hahe cih paw uccaw hae kha a ryalahtu hae kalan langsahpya khylan a vaaw ccungccapaw kha yn saw vae,” cite yn hopya.

⁷ “Dotua oh, kae tuh arangte kae thua cih. E ccauh kya-e profehbya hae a zuipaw ccungccaw tuh hythua a ccoupaw nynh thua,” a ci.

Thangsahnaw te Nyathya Sawsang

⁸ Kae, Johan nynh hynh-e uccaw hae hynh ka muih zah ka thae. Tuh-e hae tuh ka thae zah he ka muih tuh, hynh-e uccaw hae yn muihsahpaw vaawpaw cculeihpaw khe beik lan cite ka bakhung.

⁹ Aning nynh, “Hynhte cyih nan! Kae tuh nang te ryalahkheihtu nynh ka thua, na uno hae profeh hae te hynh-e ccauh kya umpaw bya a zui hae paw ryte ryalahkheihtu nynh ka thua. Pachia palia kha beik,” yn cipya.

¹⁰ Aning nynh kamaw kha, “E ccauh kya-e profehbya hae hynh tazeihkhia nan; pawccecize accyh anae vae.

¹¹ Hoyleinaw a raepaw ccungccaw tuh hoyleinaw kha rae ccaleih hin sah, a nungsikuhpaw tuh nungsikuh ccaleih hin sah, a dingpaw tuh ding ccaleih hin sah, a thyaapaw tuh thyaa ccaleih hin sah,” yn cipya.

¹² “Dotua oh, kae tuh arangte kae thua cih; ccungccaw miakaw kha a ryalaw thyhte pya khylan ka kya-e ryalaw mee kha kae ccyngbia cih.

¹³ Kae tuh Alfa te Omega, athonaw te athangnaw, masaty te nyathyakou nynh ka thua,” a ci.

¹⁴ A kawbya hae kha zui hae zah, hiinnaw thingku kya-e athae aenaw kaw a hoi hae paw te khuapi lungkhu lang koikua hae kyate teenaw kaw a hoi hae paw tuh hythua a ccou hae paw nynh thua.

¹⁵ Tuhzemah atolang tuh ui hae, naawthya hae paw, a ohhuakuh hae paw, ccungccaw theih hae paw, zohtuh beik hae paw te hynbya kha sungsah zah a hopaw miakaw nynh a um hae.

¹⁶ “Kae, Jesu nynh hynh-e uccaw hae hynh khriccaawbuu hae kya ccaekiakhan sah khylan ka vaaw ccungccapaw kha nae kalan kae saw. Kae tuh David tharui te a ciihan ka thua zah, phaephae akpaw nizy awsi nynh ka thua,” a ci.

¹⁷ Akaepaw liaccanung te Muisaw nynh, “Rang!” a ci hae. A thaepaw ccungccaw nynh, “Rang!” ci sah. A tuihawpaw ccungccaw tuh yn cceih sah. A rypaw ccungccaw tuh hiinnaw tui hynh amee leite lawkuh sah.

¹⁸ E ccauh kya a umpaw profehbya hae a thaepaw ccungccaw miakaw kalan kae nynh ccaekia ka khanpaw tuh: Lukhakheit nynh hynh-e uccaw hae hynh a biachih lanze, Pachia nynh tuh-e paw tungvaw kya hynh-e ccauh lungkhu azeikuhpaw shethya hae kha a biachih cih.

¹⁹ Lukhakheit nynh hynh-e ccauh lungkhu e profehbya hae kha a lawbang lanze, hynh-e ccauh kya azeikuhpaw hiinnaw thingku kyate thuasah, athyaapaw khuapi kyate thuasah Pachia nynh a hanpaw kha a lawpah ru cih.

²⁰ Hynh-e uccaw hae kong ccaekiakhantupaw nynh, “Thanccingte, kae tuh arangte kae thua vae cih,” a ci. Amen. Bawipaw Jesu, yn thua ccavae!

²¹ Bawipaw Jesu a thawccinaw tuh mithyaa hae balyn kya la um sah. Amen.