BYAPHY 20 - Zotung Bible 2016

Kum Thong Kheit

¹ A kuih kya adianaw um lei lan akhupaw laekarung toh te myarya lepaw sivawrui a ccyngpaw vaawpaw lu kheit tuh vaawlang te yn rungbungpaw kha ka muih.

² Aning nynh langmawlya e hupaw, Raerangsaro te Satan athuapaw nakaa-hupi kha kyng zah kum thong kheit lungkhu phang a khii.

³ Kum thong kheit accing cia minphuin hae kha a ling vae khyh ccaw hae cite amaw kha tuh-e laekarung lungkhu lang vua zah a khawsung koute a vawlan khe tazeih a khia. Kum thong kheit accing koute aning tuh ccyh sosoh supya athua cih.

⁴ Tuinte bawitungkhung hae te tuh-e vawlan a haung hae paw kha ka muih, minmin tuh byapianaw kaw a mue hae. Sarepaw te sarepaw azuh kha a beik lei hae paw, mih terui kya khyhze mih kuih kya sarepaw syntawnaw a hoi lei hae paw te Jesu ccaekia lang a tang keiccu te Pachia bya keiccuze mih lu pae hae paw mih muisaw hae kha ka muih; minmin tuh oun hiin hae zah Khri ryte kum thong kheit a uk hae.

⁵ Thuasalama tuhlaepaw a chih hae paw tuh kum thong kheit athang makhia bua hiin khyh hae. Hynh-e tuh masaty thoothuinaw nynh thua.

⁶ Masaty thoothuinaw kya a um buapaw tuh hythua a ccoupaw te a thyaapaw nynh thua. Tuhcihawpaw ccungccaw tungvaw kya vaening chinaw nynh kaw hoi vae khyh; minmin tuh Pachia ranpibawi hae te Khri ranpibawi hae athua vae cih hae zah, Khri ryte kum thong kheit a uk vae cih hae.

Satan Shungnaw

⁷ Kum thong kheit he athang te, Satan tuh thong a ccawnaw kyate supya athua cih zah,

⁸ laephi ki kipali kya a um hae paw minphuin hae athuapaw Gog te Magog kha ling khylan te rhawtuk khylan minmin kha suelua lan po a cceih cih, minmin tuh milu lante rili laesia zeih a cih hae.

⁹ Minmin tuh laephi vaw balyn pazaekuh hae zah mithyaa hae umnaw hmin te sungsahpaw khuapi kha po a koihlu hae; thuasalama vaawlang te maee yn ccah zah minmin kha marya a u hae.

¹⁰ Minmin a lingtu hae paw Satan kha sarepaw te lingthya profeh a umnaw hae, kemaee te maee tuili lungkhu langkhe ccaring vua athua; minmin tuh khuazi khuadae zungzae te zungzae cia vawsawnaw pya athua vae cih hae.

Michi hae Byapianaw

¹¹ Myarya lepaw bawitungkhung arawpaw te tuh-e vawlan a haungpaw kha ka muih, tuh-e paw malang kyate vaaw te lae tuh ccue hae zah, mih hanlan umnaw um vae khyh.

¹² Michi hae adih te ale nynh bawitungkhung malang a thadyn hae paw kha ka muih; te ccauh hae kha a kia hae. Hiinnaw ccauh athuapaw ccangpaw ccauh kha mah kia athua. Michi hae tuh mih ryalaw thyhte, tuh-e ccauh hae kya azeiku thyhte byapia athua hae.

¹³ Rili nynh a kya umpaw michi hae kha a poukhae. Chinaw te michi khua hae nynh mih kya umpaw michi hae kha a poukhae hae. Ccungccaw hae balyn tuh mih ryalaw thyhte byapia athua hae.

¹⁴ Chinaw te michi khua tuh maee tuili lungkhu lang vua athua hae. Tuh-e maee tuili tuh vaening chinaw nynh thua.

¹⁵ Hiinnaw ccauh kya a min zei athua leipaw miakaw tuh maee tuili lungkhu lang vua athua hae.