BYAPHY 2 - Zotung Bible 2016

Efesa Khriccaawbuu kalan Byataw

¹ “Efesa khua umpaw khriccaawbuu kya-e vaawpaw kalan hynhte zei: A ranglang kuih kya awsi ccangsari a ccyngtupaw, sui maeekhuatung ccangsari hae laku kya a cceihtupaw nynh hynhte a ho.

² “Na ryalaw hae, thawte rya na lawpaw te na ngaesangnaw hae kha ka ny, ccungccaw hoylei hae paw kha na ngaesangpah khyh hae cipaw kha thuasah, locceihtu hae nynh kae thua a ci hae zemah locceihtu athua lei hae paw kha akaw-aleih bya na khia hae zah mihyn hae nynh athua hae cipaw kha thuasah nang nynh phe na muih cipaw ka ny;

³ nang tuh ngaesangnaw na hoi zah ka min keiccuze na teing zah na lungthawthang khyh cipaw ka ny.

⁴ Thuasalama nang kha kae ccaenaw a um, pawccecize masaty na hoipaw sungsahnaw kha phe na cciataw vae.

⁵ Tukeiccuze paw kyate nynh ka khuliaku cipaw kha liathui lah, ngaesikute masaty e na ryalaw kha lawtua. Tukhyhze tuh na kalan arangte kae thua cih zah na ngaesikuh khyh ze, na maeekhuatung kha a umnaw kyate kae nuepah cih.

⁶ Thuasalama poo lan na ccannaw a um, kae nynh mah ka huapaw Nikolas zuitu hae mih cyisahnaw kha nang nynh na hua.

⁷ Muisaw nynh khriccaawbuu hae kalan a hopaw kha nakaring a hoipaw ccungccaw tuh thae sah. A taetupaw tuh Pachia kya-e paradis kya umpaw hiinnaw thingthae kha aenaw kaw ka pya cih.

Smyrna Khriccaawbuu kalan Byataw

⁸ “Smyrna khua kya umpaw khriccaawbuu kya-e vaawpaw kalan hynhte zei: Chih zah bua a hiinpaw, masaty te nyathyakou athuapaw nynh hynhte a ho.

⁹ “Na vawsawnaw te na ryachinaw kha ka ny. Thuasalama nang tuh a hoirumpaw nynh na thua. Judah hae nynh kae thua a ci hae zemah athua lei hae paw, Satan ccungccaw athua hae paw nynh na thethya ae ho hae paw kha ka ny.

¹⁰ Na teing lanpaw vawsawnaw kha rih nan. Dotua, nanning tuh syntawnaw teing khylan Satan nynh nanning kyaze abang kha thonginn lungkhu lang a sang cih hae, te nin haw lungkhu vawsawnaw na tung cih oh. Nang tuh chinaw kyacia a lungzipaw la thua, tuhteze tuh hiinnaw bawilukhung kha kae pya cih.

¹¹ Muisaw nynh khriccaawbuu hae kalan a hopaw kha nakaring a hoipaw ccungccaw tuh thae sah. A taetupaw tuh vaening chinaw kha teing vae lan khyh.

Perkamum Khriccaawbuu kalan Byataw

¹² “Perkamum khua kya umpaw khriccaawbuu kya-e vaawpaw kalan hynhte zei: Kyn ning te ahepaw thaloi a hoitupaw nynh hynhte a ho.

¹³ “Na umnaw hmin kha ka ny, tuin kya Satan bawitungkhung a um. A lungzipaw ka ccaekia Antipas tuh Satan a umnaw hmin athuapaw nanning laku chia athua nin kya heize nang tuh ka min kha tynkaring lan na kyngkuh zah kae nae zynnaw kha na vua khyh.

¹⁴ Thuasalama nang kha kae ccaenaw ccapyh a um. Pawccecize nae laku kya Balaam ccangpyanaw a kyngkuh hae paw abang a um hae; Israel hae nynh zohtuh hae kalan silawnawpaw uccaw hae kha ae khylan te ohhuakunaw rae khylan mih malang khe thykunawpaw kha nungkhaw khylan Balaam nynh Balak kha a ccangpya.

¹⁵ Tuhawte nae laku kya Nikolas ccangpyanaw a kyngkuh hae paw a um hae.

¹⁶ Tukeiccuze ngaesikuh, na ngaesiku khyh ze, na kalan arangte kae thua cih zah ka khalang kya-e thaloi khate minmin kha rhaw ka tuk cih hae.

¹⁷ Muisaw nynh khriccaawbuu hae kalan a hopaw kha nakaring a hoipaw ccungccaw tuh thae sah. A taetupaw kha thuruhpaw manna sanlou abang kha ka pya cih, arawpaw lung kha mah ka pya cih, tuh-e lung vawlan khe min thawpaw azeikuh, tuh-e min kha tuh-e lung a muepaw laelan hum nynh san nyh khyh.

Thiatira Khriccaawbuu kalan Byataw

¹⁸ “Thiatira khua kya umpaw khriccaawbuu kya-e vaawpaw kalan hynhte zei: Maeesoi alopaw mit a hoitupaw, thyaararihpaw sohin alopaw ccu a hoitupaw Pachia Ccapaw nynh hynhte a ho.

¹⁹ “Na ryalaw hae, na sungsahnaw, na zynnaw, rya na lawpyanaw te na ngaesangnaw kha ka ny; nyalang e na ryalaw tuh masaty e laeze alunghua cipaw ka ny.

²⁰ Thuasalama nang kha kae ccaenaw a um; pawccecize ka rya yn lawpatu hae kha ohhuakunaw raesah khylan te zohtuh hae kalan silawnawpaw kha aesah khylan ccangpyate hynpah hae zah amaw te amaw kha profehnung a cikuhnung Jezebel kha nang nynh kaw na ua.

²¹ A ohhuakunaw konglang te ngaesikunaw ccyh ka pya zahmah aning nynh ngaesiku lan phe mya.

²² Dotua, amaw kha ikhung vawlan ka vua cih, te amaw ryte a seikheih hae paw kha mih cyisahnaw a ngaesiku khyh hae lanze, myarya lepaw vawsawrunaw lungkhu lang ka vua cih hae.

²³ A ccaaw hae kha chinaw te ka theih cih hae. Kae tuh tuanaw te thinlung a ccungtu nynh ka thua cipaw kha khriccaawbuu hae balyn nynh yn nyh cih hae; nanning milu raveih kha nae ryalaw thyhte kae pya cih oh.

²⁴ Thuasalama nae kalan te Thiatira khua kya umpaw tuhlaepaw hae kalan kae hopya oh, tuh-e nopinung ccangpyanaw kha a kyngkuh lei hae paw te ‘Satan kya-e akhupaw uccaw hae,’ cite abang nynh a ho hae paw kha mah a nyh lei hae paw nanning nae tungvaw kya ccangpaw phupaw kha kae khang vae lan khyh oh.

²⁵ Na hoi oh paw kha kamaw kae thua cia varyng kyngkuh oh.

²⁶ Taetu athuapaw te athangnaw cia ka ryalaw a lahpaw tuh, minphuin hae tungvaw kawhoinaw kha ka pya cih;

²⁷ aning nynh minmin kha sivaw hoitang te a uk cih hae; laephi ang kha zoihtatyh lan koi hawte minmin kha a koi cih hae; tuh-e tuh kae nynh ka Paaw kyate ka muepaw kawhoinaw te alokuh,

²⁸ tuh-e paw tuh nizy awsi kha mah ka pya cih.

²⁹ Muisaw nynh khriccaawbuu hae kya a hopaw kha nakaring a hoipaw ccungccaw tuh thae sah.